Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Agosto de 2016

Okachi ma tiktekichiuilikan Jehová

Okachi ma tiktekichiuilikan Jehová

“Nochipa xikimpoilijto n kualitlájtoli nochteh n tokniwah xikinyolchikawa iwa xikinmachti” (1 TIMOTEO 4:13).

TLAKUIKALMEJ: 45 UAN 42

1, 2. (1) ¿Ken mochijtok Isaías 60:22 itech ninmej tonalmej? (2) ¿Tlen okachi moneki tikchiuaskej itech ialtepe Jehová?

“TLEN tsikitsin mochiuas mil, uan tlen amo ueyi mochiuas se altepetl chikauak” (Isaías 60:22). Nin profecía mochijtok axkan itlamian tonalmej. Se neskayotl, itech xiuitl 2015 kanaj 8,220,105 (ocho millones doscientos veinte mil ciento cinco) iTlaixpantijkauan Jehová otetlapouijkej itech nochi Tlaltikpak. Jehová okijto ken momiaktiliskia ialtepe: “Ne Jehová noneuian, nikchiuas totoka ma mochiua ijkuak monekis”. Nin kijtosneki yetos okachi miak tekitl. ¿Timochijchikajtokej okachi titetlapouiskej uan titlamachtiskej itech iTekiuajkayo toTajtsin Dios? Miakej tokniuan katej ken precursores regulares uan auxiliares. Sekimej yauij itech okse altepetl pampa okachi tetlapouiskej uan oksekimej tlapaleuiaj ijkuak mochijchiuaj kalmej kanin monechikoskej tokniuan.

2 Sejse xiuitl mochiuaj kanaj 2,000 tlanechikolmej. Itech nonmej tlanechikolmej moneki ma yetokan tlayekankej uan siervos ministeriales. Ik non, moneki okachi tokniuan ma mochiuakan siervos ministeriales uan  satepan ma mochiuakan tlayekankej. Ken tikitaj, maski titlakamej noso tisiuamej, tinochtin moneki okachi tikchiuaskej “iteki n Toteko” (1 Corintios 15:58).

¿TLEN MONEKI TIKCHIUASKEJ PAMPA OKACHI TIKTEKICHIUILISKEJ JEHOVÁ?

3, 4. ¿Tlen uelis tikchiuaskej pampa okachi tiktekichiuiliskej Jehová?

3 (Xiktlajtolti 1 Timoteo 3:1). Tlatitlanil Pablo okinyolchika tokniuan tlen ‘okinekiah kinyakanaskeh n tokniwah’ itech tlanechikol. Tlen okijto Pablo kijtosneki ijkuak ikaj mochijchikaua noso kimelaua ima pampa uelis kikitskis itlaj tlen uejka kajki. Se neskayotl, ma timokuayejyekokan se tokni kineki yetos siervo ministerial. Pero moneki okachi kipias iyelis ken Cristo. Ijkuak ijkon kichiuas uan yetos siervo ministerial, ok mochijchikauas pampa uelis yetos tlayekanki.

4 Sekimej tokniuan kipatlatokej inyelis pampa okachi kitekichiuiliskej Jehová. Sekimej kinekij yetoskej precursores noso tekitiskej itech Betel uan oksekimej kinekij tlapaleuiskej ijkuak mochijchiuaj kalmej kanin monechikoaj iTlaixpantijkauan Jehová. Ma tikitakan ken uelis techpaleuis Biblia okachi ma tiktekichiuilikan Jehová.

OKACHI MA TIKTEKICHIUILIKAN JEHOVÁ

5. Ken telpokamej kipiaj miak chikaualistli, ¿ken uelis okachi kitekichiuiliskej Jehová?

5 Telpokamej kipiaj miak chikaualistli, ik non, okachi uelis kitekichiuiliskej Jehová (xiktlajtolti Proverbios 20:29). * Sekimej telpokamej tlen katej Betel kinchijchiuaj amochmej. Oksekimej tlapaleuiaj ijkuak mochijchiuaj noso moyektlaliaj kalmej kanin monechikoaj iTlaixpantijkauan Jehová. Oksekimej kinpaleuiaj tokniuan ijkuak panoa se tlaxixinilistli. Uan miakej telpokamej uan ichpokamej tlen precursores momachtiaj okse tlajtoli uan yauij itech okseki altepemej tetlapouitiuij.

6-8. (1) ¿Tlen okipaleui Aarón okachi ma yolpaki ijkuak kitekichiuilia Jehová uan ken momachilia axkan? (2) ¿Ken uelis tikteititiskej “Jehová yolkuali”?

6 Maski tiktlasojtlaj Jehová uan tiknekij okachi tiktekichiuiliskej, uelis timomachiliskej ken se tokni tlen itoka Aarón. Ye okinekiaya yolpakis ijkuak okitekichiuiliaya Jehová, pero amo oyolpakiaya. Nochipa omosotlauaya ijkuak omonechikoaya uan otetlapouiaya. ¿Tlen okichi?

7 Aarón mojmostla opejki kitlajtoltia Biblia, omomachtiaya uan otlanankiliaya itech nechikolmej uan opejki nochipa motlatlaujtia. Nin okipaleui okachi ma kitekichiuili Jehová. Opejki okachi kuali kixmati Jehová uan okachi kitlasojtla. Ijkuakon, opejki okachi yolpaki. Omochi precursor, otlapaleui kanin omochi tlaxixinilistli uan otetlapouito itech okse ueyi altepetl. Axkan ye tlayekanki uan tekiti itech Betel. ¿Ken momachilia? Ye kijtoa yokitak “Jehová yolkuali”. Uan axkan kineki okachi kitekichiuilis. Aarón kimati Jehová kiteochijtok.

 8 Se salmista okijto: “Xikyejyekokan uan xikitakan Jehová yolkuali”. Uan satepan okijto: “Akinmej kitemoaj Jehová, amo kinpolos itlaj tlen kuali” (xiktlajtolti Salmo 34:8-10). * Ijkuak okachi tiktekichiuiliaj Jehová, sapanoa tiyolpakij uan tikmatij non tlen kipaktia. Uan ye techmaluis.

AMO MA TIMOSOTLAUAKAN

9, 10. ¿Tleka moneki ma timochiakan?

9 Uelis tiknekij okachi tiktekichiuiliskej Jehová. Pero uelis yiuejkika timochixtokej ma techmakakan okachi tekitl itech tlanechikol noso tikchixtokej ma mopatla tlen techpanotok. Tla ijkon techpanoa, ma timochiakan (Miqueas 7:7). Uelis Jehová kikajtok nochi tlamantli ijkon ken kajki. Pero itech ma titlaneltokakan uan ye nochipa techpaleuis. Ma timokuayejyekokan itech Abrahán. Jehová okilui kimakaskia se ikone pero opanok miak xiuitl hasta ijkuak oneski Isaac. Opanok miak xiuitl pero Abrahán omochixki uan nochipa otlaneltokak itech Jehová (Génesis 15:3, 4; 21:5; Hebreos 6:12-15).

10 Pero ualeua oui timochiaskej (Proverbios 13:12). Tla san timokuayejyekojtokej itech tlen techpanoa, okachi timosotlauaskej. Okachi kuali ma timochijchikauakan tikpiaskej toyelis ken moneki pampa okachi tikseliskej tekitl itech tlanechikol. Ma tikitakan eyi tlamantli tlen uelis tikchiuaskej.

Tla tiktlajtoltiaj Biblia uan itech timokuayejyekoaj, tiyetoskej tiixtlamatkej, kuali timokuayejyekoskej uan kuali tikpejpenaskej tlen tikchiuaskej

11. ¿Ken moneki tikpiaskej toyelis uan tleka?

11 Ma tikpiakan toyelis ken moneki. Tla tiktlajtoltiaj Biblia uan itech timokuayejyekoaj, tiyetoskej tiixtlamatkej, kuali timokuayejyekoskej uan kuali tikpejpenaskej tlen tikchiuaskej. Tokniuan tlakamej moneki ijkon ma kichiuakan pampa kimaluiskej tlanechikol (Proverbios 1:1-4; Tito 1:7-9). Ijkuak timomachtiaj Biblia, tikitaj ken mokuayejyekoa Jehová itech miak tlamantli. Non uelis techpaleuis mojmostla kuali tikpejpenaskej tlen tikchiuaskej uan ijkon tikyolpaktiskej Jehová. Se neskayotl, tikmatiskej ken timouikaskej iuan oksekimej, ken kuali tiktekitiltiskej tomin, ken moneki timotlakentiskej uan ken uelis timoyolpaktiskej.

12. ¿Ken uelis kiteititiskej tokniuan kuali kichiuaj tekitl tlen kinmakaj?

12 Kuali ma tikchiuakan tekitl tlen techmakaj. Ijkuak ialtepe toTajtsin Dios okiyektlalijtoka teokali, omonekiayaj tlakamej tlen kipaleuiskiaj Nehemías itech miak tekitl. ¿Akinmej  okinpejpenki? Akinmej intech kuali otlajtoayaj. Nehemías okimatiaya yejuan okitlasojtlayaj toTajtsin Dios uan kuali kichiuaskiaj san tlen tekitl kinmakaskiaj (Nehemías 7:2; 13:12, 13). Axkan noijki ijkon panoa. Tla se tokni yolmelajki uan kuali tekiti, kuali itech tlajtoskej. Ik non, uelis kimakaskej okachi tekitl (1 Corintios 4:2). Maski titlakamej noso tisiuamej, tinochtin kuali ma tikchiuakan san tlen tekitl techmakaj (xiktlajtolti 1 Timoteo 5:25).

13. ¿Ken uelis tikchiuaskej ken José ijkuak ikaj techchiuilia tlen amo kuali?

13 Ma timopaleuikan itech Jehová. Tla ikaj techchiuiliaj itlaj tlen amo kuali, ¿tlen tikchiuaskej? Uelis tikiluiskej ken timomachiliaj. Pero tla san tiknekij tikteititiskej tejuan amo totlajtlakol, uelis okachi tikueyitiliskej ouijkayotl. Ma timokuayejyekokan itech José. Ikniuan okichiuilijkej tlen amo kuali, uan satepan ikaj okitelui itech itlaj tlen amo okichi uan okitsakej. Pero ye omopaleui itech Jehová. Omokuayejyeko itech tlen kichiuas toTajtsin Dios uan okatka yolmelajki (Salmo 105:19). Ijkuak ijkon otlajyoui, non okipaleui ma yeto okachi ixtlamatki pampa kuali kichiuaskia tekitl tlen satepan kimakaskia (Génesis 41:37-44; 45:4-8). Tla ikaj otechchiuili itlaj tlen amo kuali, ma tikiluikan Jehová ma techmaka ixtlamatilistli. Ye techmakas yolseuilistli uan  techpaleuis kuali ma timotlapouikan iuan akin otechchiuili tlen amo kuali (xiktlajtolti 1 Pedro 5:10).

OKACHI KUALI MA TITETLAPOUIKAN

14, 15. (1) ¿Tleka moneki ma timotlachilikan ken titlamachtiaj? (2) ¿Tlen uelis tikchiuas pampa okachi kuali titetlapouis? (Xikinmita tlaixkopinalmej tlen ika peua tlamachtil uan recuadro tlen itoka “ ¿Ken uelis tikintlapouiskej akinmej amo tikinmajsij inkalijtik?”).

14 Pablo okilui Timoteo okachi kuali ma kiyekijto iTlajtol toTajtsin Dios. Uan noijki okilui: “Ximotlachili te monewia iwa kuali xikita tlan tiktemachtia” (1 Timoteo 4:13, 16). Timoteo yokipiaya miak xiuitl yotetlapouiaya. Pero ¿tleka omonekiaya okachi kuali tlamachtis? Pampa innemilis tlaltikpaktlakamej uan okseki tlamantli mopatlati. Tla Timoteo okinekiaya ma kikakikan, omonekiaya okachi kuali tlamachtis. Tejuan noijki ijkon moneki ma tikchiuakan.

15 Ijkuak titetlapouiaj, ualeua amo tikinmajsij tlaltikpaktlakamej itech inkalijtik. Noso ualeua katej inkalijtik pero tejuan amo ueli ompa tipanoaj. Tla ijkon techpanoa, uelis timokuayejyekoskej ken tikchiuaskej pampa uelis tikintlapouiskej.

16. ¿Ken uelis kuali titetlapouiskej kanin katej miakej tlaltikpaktlakamej?

16 Miakej tokniuan kinpaktia tetlapouiskej kanin katej miakej tlaltikpaktlakamej ken kanin moketsa tren, carro, itech tiankisko uan parques. ¿Ken peuaj tetlapouiaj? Sekimej kijtoaj itlaj tlen yikin opanok. Oksekimej kinmiluiaj itlaj kuali intech inkoneuan noso kintlajtlaniaj itech inteki. Tla kitaj okachi kinekij inmiuan ma motlapouikan, kinmiluiaj tlen kijtoa Biblia uan kintlajtlaniaj tlen mokuayejyekoaj. Ijkon kualtsin motlapouiaj itech Biblia.

17, 18. (1) ¿Tlen uelis techpaleuis okachi ma titetlapouikan kanin katej miakej tlaltikpaktlakamej? (2) ¿Tleka uelis techpaleuis tla timomachiliaj ken David ijkuak titetlapouiaj?

17 Uelis oui techchiuilia timotlapouiskej iuan akinmej amo tikinmixmatij. Ijkon okipanoaya Eddie, se precursor tlen chanti itech altepetl Nueva York. ¿Tlen okipaleui ma tetlapoui? Eddie kijtoa ijkuak ye uan isiua momachtiaj Biblia kitemoaj ken uelis kinnankiliskej tlaltikpaktlakamej itech tlen kintlajtlaniaj noso kinmiluiaj. Noijki kintlajtlaniaj oksekimej tokniuan ken tetlapouiaj. Axkan Eddie ika pakilistli tetlapouia kanin katej miakej tlaltikpaktlakamej.

18 Tla timochijchikauaj okachi kuali titetlapouiaj uan tikchiuaj ika pakilistli, oksekimej kitaskej okachi kuali tiktekichiuilijtokej Jehová (xiktlajtolti 1 Timoteo 4:15). Hasta uelis tikpaleuiskej ikaj ma mochiua iTlaixpantijka Jehová. David okijto: “Nochipa nikueyichiuas Jehová; nokamak nochipa kiueyichijtos. Niyolpakis itech Jehová; akinmej yolkualmej tlakakiskej uan yolpakiskej” (Salmo 34:1, 2).

OKACHI MA TIKTEKICHIUILIKAN JEHOVÁ UAN IJKON TIKUEYICHIUASKEJ

19. ¿Tleka uelis yolpakis se itekipanojka Jehová maski amo uelis kitekichiuilis ken kinekiskia?

19 David noijki okijto: “Nochi tekitl tlen otikchi mitsueyichiuas, oh  Jehová, uan akinmej yolmelajkej mitsueyichiuaskej. Yejuan tlajtoskej itech motlanauatijkayo tlen ueyititok uan tlajtoskej itech mochikaualis, pampa tlaltikpaktlakamej ma kimatikan nochi tlen kichiua ika chikaualistli uan iueyilis itlanauatijkayo” (Salmo 145:10-12). Akinmej kitlasojtlaj Jehová uan yolmelajkej ika nochi inyolo kinekij tetlapouiskej itech Jehová. Pero tla yotiueuejtikej noso yotikokoxkatikej, uelis ayakmo okachi titetlapouiaj ken tiknekiskiaj. ¿Tlen uelis tikchiuaskej? Ma tikilnamikikan tikueyichiuaj Jehová ijkuak tikintlapouiaj akinmej touan katej ken akinmej tlapajtiaj noso enfermeras. ¿Uan tla titsaktokej? Uelis tikintlapouiskej oksekimej itech Jehová uan nin kiyolpaktia toTajtsin Dios (Proverbios 27:11). Noijki kiyolpaktia ijkuak tiktekichiuiliaj maski tokalchanejkauan amo kitekichiuiliaj (1 Pedro 3:1-4). Hasta ijkuak sapanoa tikpiaj ouijkayotl uelis tikueyichiuaskej Jehová, okachi kuali iuan timouikaskej uan okachi tiktekichiuiliskej.

20, 21. Tla timochijchikauaj okachi kuali tiktekichiuiliskej Jehová, ¿ken kinpaleuis oksekimej?

20 Jehová sapanoa techteochiuas tla timochijchikauaj okachi kuali iuan timouikaskej uan okachi kuali tiktekichiuiliskej. Tla tikpatlaj itlaj itech tonemilis noso tlen hora titetlapouiaj, okachi tikinpaleuiskej tlaltikpaktlakamej ma kimatikan nochi tlen kualtsin kichiuas toTajtsin Dios. Noijki uelis okachi tikinpaleuiskej tokniuan. Ijkuak yejuan kitaskej timochijchikauaj okachi kuali titekitiskej itech tlanechikol, okachi techtlasojtlaskej.

21 Maski yitikpiaj miak xiuitl tiktekichiuiliaj Jehová noso amo, tinochtin uelis okachi kuali iuan timouikaskej uan noijki okachi kuali tiktekichiuiliskej. Itech okse tlamachtil tikitaskej ken uelis tikinpaleuiskej oksekimej okachi kuali ma kitekichiuilikan Jehová.

^ párr. 5 Proverbios 20:29 kijtoa: “Telpokamej ueyititokej pampa kipia chikaualistli, uan akinmej kipiaj miak xiuitl motaj kuajkualtsitsintin pampa yokuaistayakej”.

^ párr. 8 Salmo 34:8-10 kijtoa: “Xikyejyekokan uan xikitakan Jehová yolkuali; yolpaki tlakatl tlen itech mopaleuia. Xikmauilikan Jehová, namejuan tlen iaxkauan tlen chipauakej, pampa amo itlaj kinpoloa akinmej kimauiliaj. Hasta leontsitsintin tlen chikauakej apismikij, pero akinmej kitemoaj Jehová, amo kinpolos itlaj tlen kuali”.