Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Agosto de 2016

Ma tikinmachtikan oksekimej

Ma tikinmachtikan oksekimej

“Ne kuali namechmachtis” (PROVERBIOS 4:2).

TLAKUIKALMEJ: 50 UAN 1

1, 2. ¿Tleka moneki ma tikinmachtikan oksekimej?

JESÚS omochijchika tetlapouis itech kuali tlajtolmej itech Tekiuajkayotl. Pero noijki okinmititi imachtijkauan ken kuali tlamachtiskiaj uan yetoskiaj tlajpixkej yolkualmej tlen kinmaluiskiaj itekipanojkauan toTajtsin Dios (Mateo 10:5-7). Se neskayotl, Felipe nochipa otetlapouiaya. Pero noijki okinmachti ichpokauan ma tetlapouikan (Hechos 21:8, 9). Axkan noijki moneki tikinmachtiskej oksekimej. ¿Tleka?

2 Itech nochtin tlanechikolmej itech nochi Tlaltikpak, katej miakej tlaltikpaktlakamej tlen yikin opejkej momachtiaj Biblia uan ayamo moapolaktiaj. Moneki ma tikinmachtikan. Ma tikinpaleuikan ma kajsikamatikan tleka moneki inneuian kitlajtoltiskej uan momachtiskej Biblia. Noijki ma tikinmachtikan ma tetlapouikan uan ma tlamachtikan itech Tekiuajkayotl. Ma tikinpaleuikan tokniuan tlakamej tlen yikin omoapolaktijkej pampa yetoskej siervos ministeriales uan tlayekankej. Nochtin tokniuan uelis kinpaleuiskej akinmej yikin peuaj momachtiaj (Proverbios 4:2).

 MA TIKINMACHTIKAN AKINMEJ YIKIN PEUAJ MOMACHTIAJ INNEUIAN MA MOMACHTIKAN BIBLIA

3, 4. (1) ¿Ken okijto Pablo uelis techpaleuis tla timomachtiaj Biblia ijkuak titetlapouiskej? (2) ¿Tlen moneki tikchiuaskej achto tikinmiluiskej oksekimej ma momachtikan Biblia?

3 Tinochtin akinmej tiktekichiuiliaj Jehová moneki ma tiktlajtoltikan uan ma timomachtikan Biblia pampa tikmatiskej tlen kineki toTajtsin Dios. Tlatitlanil Pablo okinyekilui nin tlamantli tokniuan tlen ochantiayaj itech altepetl Colosas. Okinmilui: “Tejwan mach tikkawaj de timotiotzajtziliaj por amejwan. Tiktlajtlaniliaj in Dios ma amechpalewi para xikmatikan nochi tlan Yej kineki”. ¿Tleka omonekiaya ma kitlajtoltikan uan ma momachtikan iTlajtol toTajtsin Dios? Pablo okijto nin kinmakaskia ixtlamatilistli uan kinpaleuiskia ma kipiakan innemilis ken kipaktia Jehová. Noijki kinpaleuiskia ma kichiuakan “nochi tlamantle tlan kuale” tlen Jehová okinekiaya ma kichiuakan, ken tetlapouiskiaj kuali tlajtolmej (Colosenses 1:9, 10, ITlajtol toTajtzin Dios). Ik non, ijkuak titlamachtiskej itech Biblia, moneki ma tikinpaleuikan tlaltikpaktlakamej ma kajsikamatikan tla kitlajtoltiskej uan momachtiskej Biblia, kinpaleuis ma kitekichiuilikan Jehová.

4 Tla tiknekij tikinyoleuaskej akinmej tikinmachtiaj inneuian ma momachtikan Biblia, moneki tejuan noijki timomachtiskej. Tla nochipa tiktlajtoltiaj Biblia uan itech timokuayejyekoaj, techpaleuis itech tonemilis uan ijkuak titetlapouiskej. Se neskayotl, tla ijkuak titetlapouiaj ikaj techtlajtlania itlaj tlen oui, uelis tiknankiliskej ika Biblia. Noso ijkuak tiktlajtoltiaj itech Biblia ken Jesús, Pablo uan oksekimej omoyolchikajkej tetlapouiskej, tejuan noijki timoyolchikauaskej uan titetlapouiskej maski ualeua oui. Ijkuak tikintlapouiaj oksekimej tlen yotimomachtijkej itech Biblia uan ken techpaleuia, yejuan noijki kinekiskej okachi momachtiskej uan noijki kinpaleuis ma kitekichiuilikan Jehová.

5. Xikijto ken uelis tikinpaleuiskej akinmej tikinmachtiaj pampa uelis inneuian momachtiskej Biblia.

5 Uelis timotlajtlaniaj ken tikpaleuiskej akin tikmachtiaj nochipa ma momachti Biblia. Ma tikititikan ken moyektlalis pampa iuan timomachtiskej. Se neskayotl, uelis tikiluiskej ma kintemo tlaxelolmej tlen uitsej itech párrafos. Tla iuan timomachtijtokej amochtli ¿Tlen melauak tlamachtia Biblia?, uelis tikiluiskej ma momachti tlen kijtoa okseki tlamachtilmej tlen kipia amochtli. Satepan uelis tikmachtiskej ken moyektlalis  pampa nechikolmej uan ijkon tlanankilis. Noijki uelis tikiluiskej ma kintlajtolti nochtin revistas Akin Tetlapouijtok uan ¡Despertad! Noijki uelis tikmachtiskej ma kinnankili tlajtlanilmej itech Biblia ika Watchtower Library noso itech AMATLAJKUILOLMEJ ITECH INTERNET Watchtower. Ijkuak momachtis ika nochi nin tlamantli, yolpakis uan kinekis okachi momachtis.

6. (1) ¿Ken uelis tikpaleuiskej akin tikmachtiaj ma kipatioita iTlajtol toTajtsin Dios? (2) ¿Tlen kinekis kichiuas akin tikmachtiaj ijkuak kipatioitas iTlajtol toTajtsin Dios?

6 Ijkuak ikaj tikmachtiaj ika Biblia, ma tikititikan Biblia miak ipati pampa kipaleuia ma kixmati Jehová. Noijki ma tikititikan uelis yolpakis ijkuak momachtis pero amo ma tikchiualtikan ma momachti. Ijkuak okachi momachtis, okachi kinekis kimatis. Ijkuakon, uelis momachilis ken salmista akin okijto: “Nimotokis iuan toTajtsin Dios non okachi kuali. Itech Jehová akin Ueyi Tekiua nimopaleuia” (Salmo 73:28). Kema, iespíritu Jehová kipaleuis ma kineki iuan mouikas.

MA TIKINMACHTIKAN AKINMEJ YIKIN PEUAJ TETLAPOUIAJ KUALI MA TETLAPOUIKAN UAN MA TLAMACHTIKAN

7. ¿Ken okinyektlali Jesús itlatitlaniluan pampa tetlapouiskiaj? (Xikita tlaixkopinal tlen ika peua tlamachtil).

7 Uelis timomachtiskej miak tlamantli itech ken Jesús okinmachti itlatitlaniluan. Ye inmiuan otetlapoui uan okitakej ken otlamachtiaya. Jesús noijki okinmilui ken tetlapouiskiaj (Mateo, tlakotonal 10) [1] (xikita nota kanin tlami tlamachtil). San itech tepitsin kauitl tlatitlanilmej okimatiayaj ken tlamachtiskej tlen melauak itech toTajtsin Dios (Mateo 11:1). Ma tikitakan ome tlamantli tlen uelis tikinmachtiskej akinmej yikin peuaj momachtiaj ijkuak titetlapouiaj.

8, 9. (1) ¿Ken okintlapouiaya Jesús tlaltikpaktlakamej? (2) ¿Ken uelis tikinpaleuiskej akinmej yikin peuaj tetlapouiaj ma tlamachtikan ken Jesús?

8 Ma motlapouikan iuan tlaltikpaktlakamej. Jesús amo san okintlapoui miakej tlaltikpaktlakamej ijkuak san sekan okatkaj. Noijki okinmachtiaya sejse tlaltikpaktlakamej uan nochipa okichiuaya ika pakilistli. Se neskayotl, se tonal kualtsin omotlapoui iuan se siuatl tlen okikuito atl itech se atekochtli ik kanin okatka altepetl Sicar (Juan 4:5-30). Okse tonal Jesús omotlapoui iuan se tlakatl tlen okololoaya tomin tlen omotokayotiaya Mateo Leví. Jesús okiyole ma mochiua imachtijka uan ye okijto kema. Satepan, Mateo okiyole Jesús uan oksekimej ma tlakuatij ikalijtik. Ompa Jesús okintlapoui miakej tlaltikpaktlakamej (Mateo 9:9; Lucas 5:27-39).

Tla tiyolkualmej iuan tlaltikpaktlakamej uan kualtsin tikintlapouiaj, okachi kinekiskej techkakiskej

9 Se tlakatl tlen omotokayotiaya Natanael okijto seki tlamantli tlen amo kuali itech akinmej ochantiayaj itech altepetl Nazaret, ialtepe Jesús. Pero Jesús kuali okinotski. Ik non, Natanael ayakmo ijkon omokuayejyeko uan okinekiaya okachi kimatis itech Jesús (Juan 1:46-51). ¿Tlen techmachtia tlen okichi Jesús? Tla tiyolkualmej iuan  tlaltikpaktlakamej uan kualtsin tikintlapouiaj, okachi kinekiskej techkakiskej [2] (xikita nota kanin tlami tlamachtil). Ma tikinmachtikan akinmej yikin peuaj tetlapouiaj ma yetokan yolkualmej iuan tlaltikpaktlakamej uan kualtsin ma kintlapouikan. Ijkon okachi yolpakiskej ijkuak tetlapouiskej.

10-12. (1) ¿Tlen okichi Jesús pampa tlaltikpaktlakamej kikakiskiaj ijkuak okintlapouiaya? (2) ¿Ken uelis tikinpaleuiskej akinmej yikin peuaj tetlapouiaj kuali ma tlamachtikan itech Biblia?

10 Ma kinmachtikan akinmej kinekij tlakakiskej. Jesús nochipa okipiaya miak tlamantli tlen kichiuas. Pero ijkuak tlaltikpaktlakamej okinekiayaj kikakiskej, inmiuan omotlapouiaya uan okinmachtiaya miak tlamantli. Se neskayotl, se tonal miakej oajsitoj itempa atl pampa okinekiayaj kikakiskej. Jesús otlejkok itech se barca iuan Pedro uan ompa okinmachti. Satepan, itlaj okimachti Pedro. Okichi se milagro ijkuak okipaleui Pedro ma kinkitski miakej michimej. Uan okilui: “Axa te ayakmó timichmas, yej pewas tikinmichmas tlakah”. Pedro uan akinmej iuan okatkaj san niman “okwalinkixtijkeh inbarkajwah itempa n atl, okikakajtejkeh nochi” uan san niman omochijkej imachtijkauan Jesús (Lucas 5:1-11).

11 Se tlakatl tlen omotokayotiaya Nicodemo noijki okinekiaya okachi momachtis itech Jesús. Pero opouiaya iuan akinmej okachi oueyititokaj itech tlayekankej judíos. Ik non, okimomojtiaya tlen oksekimej uelis kijtoskiaj tla kitaskiaj motlapouijtok iuan Jesús. Ik non, okitato yoak. Jesús iuan omotlapoui ika pakilistli uan okiyekilui miak tlamantli tlen miak ipati (Juan 3:1, 2). Jesús nochipa omajxili kinmachtis tlaltikpaktlakamej tlen melauak uan okinpaleui ma kipiakan chikauak intlaneltokilis. Tejuan noijki moneki timajxiliskej tikinmachtiskej tlaltikpaktlakamej ijkuak yejuan uelis momachtiskej uan ijkon tikinpaleuiskej ma kajsikamatikan Biblia.

12 Ijkuak titetlapouiaj iuan akinmej yikin peuaj tetlapouiaj, uelis tikinmiluiskej touan ma tlamachtikan uan touan ma yakan ijkuak oksepa tikintlajpalotiuij tlaltikpaktlakamej. Ijkon uelis kuali tlamachtiskej ika Biblia uan yolpakiskej pampa uelis kinpaleuiskej oksekimej ma kixmatikan Jehová. Noijki pakiskej ijkuak oksepa kintlajpalotiuij akinmej otlakakej uan kinmachtiskej itech Biblia. Noijki uelis moyolchikauaskej pampa amo ma mosotlauakan uan ma mochiakan tla amo san niman kinmajsij tlaltikpaktlakamej ijkuak tetlapouiaj (Gálatas 5:22) (xikita recuadro tlen itoka “ Amo omosotla”).

MA TIKINMACHTIKAN AKINMEJ YIKIN PEUAJ MOMACHTIAJ MA KINPALEUIKAN TOKNIUAN

13, 14. (1) ¿Tlen timomachtiaj itech tokniuan tlen okinpaleuijkej oksekimej? (2) ¿Ken uelis tikinmachtiskej telpokamej uan ichpokamej uan akinmej yikin peuaj momachtiaj ma kinpaleuikan tokniuan?

13 Jehová kineki tiitekipanojkauan ma timotlasojtlakan ken tiiknimej uan ma timopaleuikan (xiktlajtolti Lucas 22:24-27; 1 Pedro 1:22). Biblia kijtoa Jesús omochijchika miak kinpaleuis tlaltikpaktlakamej. Hasta topatka omotemakak (Mateo 20:28). Se tokni tlen omotokayotiaya Dorcas “nochipa okichiwaya tlan kuali iwa okimpalewiaya akimeh amitla okipiayah” (Hechos 9:36, 39). Uan okse tokni tlen omotokayotiaya María otekitik miak pampa kinpaleuis tokniuan tlen ochantiayaj itech ueyi altepetl Roma (Romanos 16:6). ¿Ken uelis tikinpaleuiskej  akinmej yikin peuaj momachtiaj ma kimatikan moneki ma kinchiuilikan tlen kuali tokniuan?

Ma tikinpaleuikan akinmej yikin peuaj momachtiaj ma kimatikan moneki ma kinchiuilikan tlen kuali tokniuan. (Xikinmita párrafos 13 uan 14).

14 Uelis tikinyoleuaskej akinmej yikin peuaj momachtiaj touan ma yakan ma tikintlajpalotij tokniuan tlen yikipiaj miak xiuitl noso akinmej mokokoaj. Tla uelis, tetajmej ma kinuikakan inkoneuan ijkuak kintlajpalotiuij ninmej tokniuan. Tlayekankej uelis kinmiluiskej telpokamej noso ichpokamej ma kinuikilikan tlakuali tokniuan tlen yikipiaj miak xiuitl noso ma kiyektlalikan tlen moneki itech inkalijtik. Tla telpokamej uan ichpokamej uan akinmej yikin peuaj momachtiaj kitaj ken momaluiaj tokniuan, yejuan noijki kinekiskej ijkon kichiuaskej. Ma tikitakan tlen okichiuaya se tokni tlayekanki. Ijkuak otetlapouiaya itech altepetsitsintin, okintlajpaloaya tokniuan tlen ompa ochantiayaj pampa kimatiskia ken okatkaj. Ijkon, se telpochtli tlen iuan oyaya, okimatki ken uelis kinpaleuiskia tokniuan (Romanos 12:10).

15. ¿Tleka moneki tlayekankej ma kinpaleuikan tokniuan itech tlanechikol?

15 Jehová kintekitiltiaj tlakamej pampa techmachtis iTlajtol. Ik non, tokniuan moneki kuali ma tlamachtikan ijkuak kitemakaj se tlapoualistli. Tlayekankej uelis kinpaleuiskej tokniuan okachi kuali ma tlamachtikan. Se neskayotl, uelis kikakiskej se siervo ministerial ijkuak kiojpauis tlapoualistli tlen kitemakas (Nehemías 8:8) [3] (xikita nota kanin tlami tlamachtil).

16, 17. (1) ¿Ken okiteititi Pablo okinekiaya Timoteo kuali ma kichiua iteki? (2) ¿Ken uelis tlayekankej kinmachtiskej akinmej satepan tlayekanaskej itech tlanechikol?

16 Moneki okachi ma kinmachtikan tokniuan tlakamej tlen yetoskej ken tlajpixkej itech tlanechikol (xikita recuadro “¿Tlen kijtosneki?”). Pablo okimachti Timoteo uan okilui ma kinmachti oksekimej. Okilui ma kichiua nin: “Ximoyolchikawa por tikpiah ikualtilis Cristo Jesús. Tlan te yotechkakili onikijto inmixpah miakeh tlaneltokakeh, noni xikinmachti n tokniwah non milák motemaktiah inawak Dios, ijkó yejwah noiwa kinmachtiskeh oksikimeh” (2 Timoteo 2:1, 2). Timoteo omomachti miak tlamantli itech Pablo, akin okatka tlayekanki uan tlatitlanil. Se neskayotl, omomachti ken uelis kuali tetlapouiskia uan ken kinpaleuiskia tokniuan itech tlanechikol (2 Timoteo 3:10-12).

17 Pablo kuali okimachti Timoteo pampa okinekiaya kuali ma kichiua iteki (Hechos 16:1-5). ¿Ken uelis kichiuaskej tlayekankej  ken Pablo? Uelis kinmiluiskej siervos ministeriales tlen kuali tlamachtiaj ma kintlajpalotij sekimej tokniuan. Ijkon, siervos ministeriales uelis kimatiskej ken kinmachtiskej oksekimej, mochiaskej uan tetlasojtlaskej. Noijki kimatiskej moneki kitlajtlaniliskej Jehová ma kinyekana pampa uelis kinmaluiskej tokniuan (1 Pedro 5:2).

MIAK IPATI MA TIKINMACHTIKAN OKSEKIMEJ

18. ¿Tleka moneki ma tikinmachtikan oksekimej kuali ma kitekichiuilikan Jehová?

18 Itech ninmej tonalmej miakej moneki kimatiskej okachi kuali tetlapouiskej. Noijki moneki tokniuan tlakamej tlen kiyekanaskej tlanechikol. Jehová kineki tinochtin tiitekipanojkauan kuali ma tikchiuakan toteki uan ma tikinpaleuikan akinmej yikin peuaj momachtiaj. Ik non, ma tikinmachtikan oksekimej ijkon ken okichi Jesús uan Pablo. Moneki nochtin tikinmachtiskej, pampa ok moneki okachi titetlapouiskej achto tlamis nochi tlen amo kuali.

19. ¿Ken tikmatij uelis tikinpaleuiskej tokniuan tla timochijchikauaj tikinmachtiskej?

19 Ma timochijchikauakan ma tikinmachtikan oksekimej. Pero ma tikilnamikikan Jehová uan Jesús techpaleuiaj kuali ma tikinmachtikan. Uan tiyolpakiskej ijkuak tikinmitaskej kuali kichiuaj inteki itech tlanechikol uan mochijchikauaj tetlapouiskej (1 Timoteo 4:10). Uan noijki ma timochijchikauakan chikauak tikpiaskej totlaneltokilis, okachi kuali tikpiaskej toyelis uan okachi kuali ma timouikakan iuan Jehová.

^ [1] (párrafo 7): Se neskayotl, Jesús okinmilui imachtijkauan omonekiaya kichiuaskej nin: (1) ma tetlapouikan itech Tekiuajkayotl; (2) ma kineltokakan Jehová kinmakaskia tlen kikuaskiaj uan tlen kimokentiskiaj; (3) amo ma mokualanikan iuan tlaltikpaktlakamej; (4) ma tlaneltokakan itech Jehová ijkuak kintlajyouiltiskiaj uan (5) amo ma kinmauilikan tlaltikpaktlakamej.

^ [2] (párrafo 9): Xikita amochtli Benefíciese de la Escuela del Ministerio Teocrático, páginas 62 a 64. Ompa kijtoa ken kuali tikintlapouiskej tlaltikpaktlakamej.

^ [3] (párrafo 15): Xikita amochtli Benefíciese de la Escuela del Ministerio Teocrático, páginas 52 a 61. Ompa kijtoa tlen kinpaleuis tokniuan okachi kuali ma tlamachtikan.