Xikita nochi

Tlen kiualika

¿Ken uelis yolpakiskej akinmej yomonamiktijkej?

¿Ken uelis yolpakiskej akinmej yomonamiktijkej?

“Tlakatl makitlasojtla isiwa kemi ye inewia motlasojtla, iwa n tesiwa noiwa makitlakita iokich” (EFESIOS 5:33).

TLAKUIKALMEJ: 18 UAN 3

1. Maski akinmej yikin monamiktiaj sapanoa yolpakij, ¿tlen uelis panos satepan? (Xikita tlaixkopinal tlen ika peua tlamachtil).

IJKUAK novios okachi motlasojtlaj kijtoaj monamiktiskej. Ijkuak ajsi tonal monamiktiskej uan novio kita inovia, sapanoa yolpakij. Kijtoaj nochipa san sekan yetoskej. Itech non tonal ik tlayekapan, moneki mochijchikauaskej san sekan yetoskej. Jehová okitlali namiktilistli uan kineki akinmej yomonamiktijkej ma yolpakikan uan kuali ma yetokan. Ik non, ika Biblia kinmiluia tlen uelis kichiuaskej (Proverbios 18:22). Pero ken tinochtin titlajtlakolejkej, Biblia noijki kijtoa akinmej monamiktiaj “panoskeh itech miak tlaijyowílistli” (1 Corintios 7:28). ¿Ken uelis kichiuaskej akinmej yomonamiktijkej pampa amo okachi kipiaskej ouijkayotl? ¿Tlen uelis kichiuaskej pampa yolpakiskej?

2. ¿Ken uelis kiteititiskej melauak motlasojtlaj akinmej yomonamiktijkej?

2 Biblia techmachtia miak ipati ma titetlasojtlakan. Pero  akinmej yomonamiktijkej moneki ma kiteititikan melauak motlasojtlaj ika tlen kichiuaj uan kijtoaj. Uan moneki okachi ijkon kichiuaskej tla kinpiaj inkoneuan. Pero moneki okachi ma motlasojtlakan ijkon ken kijtoa Biblia. Tlatitlanil Pablo okijto ken uelis kichiuaskej: “Nochi tlakatl makitlasojtla isiwa kemi ye inewia motlasojtla, iwa n tesiwa noiwa makitlakita iokich” (Efesios 5:33).

¿TLEN MONEKI KICHIUASKEJ TLAKAMEJ UAN SIUAMEJ TLEN YOMONAMIKTIJKEJ?

3. ¿Kech moneki motlasojtlaskej akinmej yomonamiktijkej?

3 Pablo okijkuilo: “Tlakamej, xikintlasojtlajtokan namosiuauan, ijkon ken Cristo okitlasojtlak tlanechikol uan omotemakak ipatka” (Efesios 5:25, TNM). Axkan akinmej kichiuaj ken Cristo noijki motlasojtlaj ijkon ken ye okintlasojtlak imachtijkauan (xiktlajtolti Juan 13:34, 35; 15:12, 13). Akinmej yomonamiktijkej moneki sapanoa motlasojtlaskej hasta uelis kitemakaskej inyolilis inpatka innamik. Pero ijkuak kipiaj ouijkayotl, uelis mokuayejyekoaj amo okachi motlasojtlaj. ¿Tlen uelis kinpaleuis? Ma motlasojtlakan ken kijtoa Biblia. ¿Tleka? Pampa “akin tetlasojtla nochi kijyowia, nochi kineltoka, kimati moyekchia iwa nochi kixikoa” uan non “tlasojtlálistli ayik tlamis” (1 Corintios 13:7, 8). Akinmej yomonamiktijkej moneki kilnamikiskej okijtojkej nochipa motlasojtlaskej uan amo keman mokajkauaskej. Nin kinyolinis ma kiluikan Jehová ma kinpaleui ijkuak kipiaskej ouijkayotl uan san sekan ma kiyektlalikan.

4, 5. (1) ¿Tlen moneki kichiuas tlakatl? (2) ¿Ken moneki kitas siuatl iteki? (3) ¿Tlen okichi Cathy uan inamik?

4 Pablo okijto tlen moneki kichiuas tlakatl uan siuatl. Okijto: “Nomejwah siwameh, moneki xikmokawilikah manomechyakana nomookich, ijkó kemi nonmotekawiliah manomechyakana n Toteko Cristo. Porke n tlakatl ye akin kiyakanas isiwa, ijkó kemi Cristo kinyakana akimeh kineltokah” (Efesios 5:22, 23). Tlakatl moneki kinyekanas ikalchanejkauan ika tlasojtlalistli ijkon ken kichiua Jesús, akin kiyekana tlanechikol. Siuatl amo mokuayejyekoa amo kipia ipati pampa moneki kitlakamatis inamik. Jehová okijto siuatl kipaleuia inamik: “Amo kuali kajki ma yeto iselti tlakatl. Nikchijchiuilis akin kipaleuis, tlen yetos iajsikayo” (Génesis 2:18). Siuatl moneki kipaleuis inamik kuali ma kinyekana inkalchanejkauan. Ijkuak tlakatl tetlasojtla ken Jesús, siuatl kuali momachilia uan amo oui kichiuilia kitlakaitas uan kipaleuis inamik itech tlen kijtos kichiuas.

Ijkuak kitlakamatij Jehová, akinmej yomonamiktijkej okachi san sekan katej

5 Se tokni tlen itoka Cathy kijtoa: “Ijkuak onikatka noselti ne onikpejpenaya tlen nikchiuas uan noneuia onimomaluiaya. Pero ijkuak onimonamikti, omonekiaya niktlakamatis nonamik”. Tokni kijtoa ualeua oui ijkon kichiuas, pero okachi san sekan katej pampa kitlakamatij Jehová [1] (xikita nota kanin tlami tlamachtil). Inamik Cathy tlen itoka Fred kijtoa: “Nochipa oui onechchiuili nikpejpenas tlen nikchiuas. Uan ijkuak se monamiktia okachi oui, pampa moneki  tikkakis tlen kijtoa monamik. Pero axkan amo okachi oui pampa nikiluia Jehová ma nechpaleui uan kuali nikkaki tlen kijtoa nosiua. Nikita kuali timouikaj uan timopaleuiaj”.

6. ¿Tleka moneki ma kimopialikan tlasojtlalistli akinmej yomonamiktijkej ijkuak kipiaj ouijkayotl?

6 Tla akinmej yomonamiktijkej kinekij kuali yetoskej, moneki ma moxikojtokan uan sepa ma motlapojpoluikan. Ken tinochtin titlajtlakolejkej, tlakatl uan siuatl kichiuaskej tlen amo kuali uan kipiaskej ouijkayotl. Ijkuak ijkon kinpanos, moneki mochijchikauaskej, motlapojpoluiskej uan motlasojtlaskej ijkon ken kijtoa Biblia, “porke n tlasojtlálistli, ye tlan techyekseitilia” (Colosenses 3:13, 14). Akinmej yomonamiktijkej moneki ma yetokan yolkualmej, amo san niman ma kualanikan ‘nion matekokolikah’ (1 Corintios 13:4, 5). Ijkuak kipiaj ouijkayotl, moneki san niman ma kiyektlalikan achto tlamis tonal (Efesios 4:26, 27). Moneki ma yetokan yolyamankej uan ma mochijchikauakan ma kiluikan innamik: “Xinechtlapojpolui”. Ijkuak motlapojpoluiaj, kiyektlaliaj ouijkayotl uan okachi kuali mouikaj.

MONEKI MA MOTLASOJTLAKAN AKINMEJ YOMONAMIKTIJKEJ

7, 8. (1) ¿Tlen kijtoa Biblia ijkuak tlakatl moteka iuan isiua? (2) ¿Tleka moneki ma motlasojtlakan akinmej yomonamiktijkej?

7 Biblia kijtoa ken moneki kitaskej akinmej yomonamiktijkej ijkuak se tlakatl moteka iuan isiua (xiktlajtolti 1 Corintios 7:3-5). Moneki tlakatl uan siuatl kuali ma kimatikan tlen kimachilia uan kineki inamik. Tla tlakatl amo kitlasojtla isiua, uelis amo okachi kinekis iuan motekas. Biblia kiluia tlakatl moneki ma ‘kajsikamati isiwa’ (1 Pedro 3:7). Tlakatl amo ma kichiualti isiua iuan ma moteka. Nin moneki kichiuaskej ijkuak yejuan kinekiskej. Ualeua ye tlakatl akin okachi kineki motekas iuan isiua. Pero moneki motekaskej ijkuak kuali yetoskej uan ijkuak kuali momachiliskej.

8 Biblia amo kijtoa ken kiteititiskej motlasojtlaj ijkuak motekaj akinmej yomonamiktijkej. Pero kijtoa moneki ma motlasojtlakan (El Cantar de los Cantares 1:2; 2:6). Ken tikitaj, akinmej yomonamiktijkej moneki kiteititiskej motlasojtlaj.

9. ¿Tleka amo kuali ma tiknojnotsakan nion ma tikixuetskilikan akin amo tonamik?

9 Sekimej ayakmo kuali katej iuan innamik pampa kitaj pornografía noso kinpaktia okse tlakatl noso okse siuatl. Nin tlamantli amo kuali uan moneki timochijchikauaskej amo tikchiuaskej. Tla melauak tiktlasojtlaj Jehová uan tonamik, amo tikkajkayauaskej. Amo ikaj tiknojnotsaskej nion tikixuetskiliskej pampa non kiteititis amo tiktlasojtlaj tonamik. Ma tikilnamikikan toTajtsin Dios kimati nochi tlen timokuayejyekoaj uan tikchiuaj. Non techpaleuis ma tikyolpaktikan Jehová uan amo ma  tikkajkayauakan tonamik (xiktlajtolti Mateo 5:27, 28; Hebreos 4:13).

¿TLEN TIKCHIUASKEJ IJKUAK TIKPIASKEJ OUIJKAYOTL ITECH TONAMIKTILIS?

10, 11. (1) ¿Kox miakej mokajkauaj inmixpan tekiuajkej? (2) ¿Tlen kijtoa Biblia ijkuak moxeloaj akinmej yomonamiktijkej? (3) ¿Tleka akinmej yomonamiktijkej moneki kuali ma mokuayejyekokan tla kinekij moxeloskej?

10 Sekimej kijtoaj moxeloskej noso mokajkauaskej inmixpan tekiuajkej ijkuak amo uelij kiyektlaliaj ouijkayotl. Itech miakej uejueyij altepemej, kanaj tlajko akinmej monamiktiaj satepan mokajkauaj inmixpan tekiuajkej. ITlaixpantijkauan Jehová amo okachi ijkon kinpanoa pero sekimej kipiaj miak ouijkayotl.

11 Biblia kijtoa: “Tesiwa amo makikajkawa iokich [...]. Pero tla n tesiwa kikajkawa iokich, ayakmó oksepa mamonamikti, noso mamotlapojpolwi iwa n iokich, iwa n teokich amo makikajkawa isiwa” (1 Corintios 7:10, 11). Sekimej akinmej yomonamiktijkej mokuayejyekoaj amo keman uelis kiyektlaliskej ouijkayotl, ik non, moneki moxeloskej. Pero Jesús otemachti kuali ma mokuayejyekokan tla kinekij ijkon kichiuaskej. Satepan noijki okijto ken okinekiaya toTajtsin Dios ma yeto namiktilistli uan noijki okijto: “Tlan Dios yokiseitili, amaka makinxexelo” (Mateo 19:3-6; Génesis 2:24). Jehová kineki nochipa san sekan ma yetokan akinmej yomonamiktijkej (1 Corintios 7:39). Tinochtin moneki ma tikilnamikikan Jehová techtlajtlanis tlen otikchijkej. Nin techpaleuis san niman ma tikyektlalikan ouijkayotl pampa amo okachi moueyitilis.

Tokniuan kuali kichiuaj ijkuak kiyektlaliaj ouijkayotl uan kikauiliaj toTajtsin Dios ma kinyekana

12. ¿Tleka uelis mokuayejyekoskej sekimej moneki moxeloskej?

12 ¿Tleka sekimej akinmej yomonamiktijkej sapanoa kipiaj ouijkayotl? Sekimej moyolkokoaj noso kualanij pampa amo opanok tlen okichiayaj itech innamiktilis. Ualeua kipiaj ouijkayotl pampa tlatlamantli omoskaltijkej noso tlatlamantli tlen kimachiliaj. Ualeua kipiaj ouijkayotl iuan inkalchanejkauan, inkoneuan noso amo kipiaj tomin. Pero tokniuan kuali kichiuaj ijkuak kiyektlaliaj ouijkayotl uan kikauiliaj toTajtsin Dios ma kinyekana.

13. ¿Keman uelis moxeloskej akinmej yomonamiktijkej?

13 Onka miak tlamantli tlen uelis kichiuas sekimej ma moxelokan. Sekimej moxeloaj pampa inkalchanejkauan amo kipiaj tlen ika mopanoltiskej, sapanoa kinuitekij noso amo kinkauiliaj ma kitekichiuilikan Jehová. Ijkuak tokniuan kipiaj miak ouijkayotl moneki kinmiluiskej tlayekankej ma kinpaleuikan. Yejuan ixtlamatkej uan uelis kinpaleuiskej ma kintlakamatikan itlanauatiluan toTajtsin Dios. Tla akinmej yomonamiktijkej kiluiaj Jehová ma kinmaka iespíritu santo, uelis kitlakamatiskej Biblia uan kichiuaskej tlen moneki (Gálatas  5:22, 23) [2] (xikita nota kanin tlami tlamachtil).

14. ¿Tlen kinmiluia Biblia tokniuan tlen innamik amo iTlaixpantijka Jehová?

14 Biblia kinyoleua akinmej yomonamiktijkej ma mochijchikauakan amo ma moxelokan, maski innamik amo iTlaixpantijka Jehová (xiktlajtolti 1 Corintios 7:12-14). Akin amo iTlaixpantijka Jehová “kiselia itlatiochiwalis Dios” pampa omonamikti iuan se iTlaixpantijka Jehová. Uan inkoneuan tlen ok tsikitsitsintin “yolchipawakeh”, ik non, toTajtsin Dios kinmaluia. Pablo okinmilui akinmej okichiuayaj ken Cristo: “¿Ken tikmati te siwatl, kox weletis tikpalewis mokich iwa Dios kimakixtis? ¿Noso te tlakatl ken tikmati kox satepa Dios kimakixtis mosiwa?” (1 Corintios 7:16). Miakej tokniuan yokinpaleuijkej innamik noijki ma kitekichiuilikan Jehová.

15, 16. (1) ¿Tlen kinmiluia Biblia tokniuan siuamej tlen innamik amo kitekichiuilia Jehová? (2) ¿Tlen amo kichiuas se tokni tla inamik “non amo kineltokah Cristo” kineki kikajkauas?

15 Tlatitlanil Pedro kinmiluia tokniuan siuamej tlen panos tla kintlakaitaj innamik: “Non amo tlaneltokakeh, tlaneltokaskeh ijkuak omechitaskeh kenijki nontetlakitah, iwa mach ok monekis xiktetlapowikah itlajtol Dios. Porke yejwah kitaskeh kenomi nonmoyekuikah iwa nonmotlakitah”. Tokni siuatl moneki ‘kipias se espíritu yámanki ika yolsewílistli, ni tlan okachi ipati ixpa n Dios’ (1 Pedro 3:1-4). Tla ijkon kichiua, okachi kipaleuis inamik ma mochiua iTlaixpantijka Jehová uan amo ijkuak san kitlapouijtos itech tlen kineltoka.

16 Pero ¿tlen panos tla akin amo iTlaixpantijka Jehová kineki kikajkauas inamik? Biblia kijtoa: “Tla n teokich noso n tesiwa non amo kineltokah Cristo,  mochijchikawa kikajkawas se tokni, makikajkawa. Porke Dios otéchnotski para matiyetokah ika yolsewílistli” (1 Corintios 7:15). Ken tikitaj, akin iTlaixpantijka Jehová amo moneki kitlatlaujtis inamik tlen amo kitekichiuilia Jehová iuan ma mokaua. Uan maski uelis inkalchanejkauan kipiaskej yolseuilistli ijkuak yas, tokni amo uelis oksepa monamiktis. Satepan akin amo kitekichiuilia Jehová uelis kinekis mokuepas uan hasta uelis noijki kinekis kitekichiuilis Jehová.

¿TLEN OKACHI IPATI ITECH NAMIKTILISTLI?

Tla akinmej yomonamiktijkej mochijchikauaj kitekichiuiliskej Jehová, sapanoa yolpakiskej. (Xikita párrafo 17).

17. ¿Tlen moneki okachi kipatioitaskej akinmej yomonamiktijkej?

17 Ken tikatej itech “iksemi tonatijmeh” onka “miak tlaijyowílistli” (2 Timoteo 3:1-5). Ik non, moneki kuali ma timouikakan iuan Jehová uan ijkon uelis timomaluiskej. Pablo okijto: “Ayakmó tikpiah miak tonati”. Uan satepan okijto “akimeh ya kipiah insiwa manemikah kemi akimeh ayamó monamiktiah” uan akinmej kitekitiltiaj tlen onka itech Tlaltikpak, ma kichiuakan ken akinmej amo nochi kitekitiltiaj (1 Corintios 7:29-31). Pablo amo okijto tokniuan amo ma motekipachokan intech innamik. Pero ken tikatej itech “iksemi tonatijmeh”, okachi moneki ma tikpatioitakan tiktekichiuiliskej Jehová (Mateo 6:33).

18. ¿Ken uelis yolpakiskej akinmej yomonamiktijkej?

18 Itech ninmej tonalmej, miakej akinmej yomonamiktijkej mokajkauaj inmixpan tekiuajkej. Ik non, ¿ken uelis yolpakiskej akinmej yomonamiktijkej? Moneki nochipa yetoskej iuan Jehová noijki iuan ialtepe, moneki kitlakamatiskej itlanauatiluan uan kikauiliskej ma kinyekana ika iespíritu santo. Tla ijkon kichiuaskej, kipatioitaskej “tlan Dios yokiseitili” (Marcos 10:9).

^ [1] (párrafo 5): Otikinpatilijkej intoka.

^ [2] (párrafo 13): Xikita amochtli “Xiyetokan itech itlasojtlalis toTajtsin Dios”, itech okseki tlamachtilmej, itech tlamachtil tlen itoka “¿Tlen kijtoa Biblia ijkuak akinmej yomonamiktijkej moxeloaj noso mokajkauaj inmixpan tekiuajkej?”.