Xikita nochi

Tlen kiualika

Sekimej techtlajtlaniaj

Sekimej techtlajtlaniaj

¿Tleka amo ma tikintlalikan amatlajkuilolmej itech Internet tlen kinchijchiuaj iTlaixpantijkauan Jehová?

Ken ialtepe Jehová techmaka amatlajkuilolmej uan amo tikintlaxtlauaj, sekimej mokuayejyekoaj uelis kintlaliskej oksekan itech Internet noso itech redes sociales. Uan miakej kixnamikij tlen kijtoa Términos y Condiciones de Uso *, ik non, onka miak ouijkayotl. Ompa kijtoa tlen amo tikchiuaskej ika “fotos, amatlajkuilolmej electrónicas, jw, jw.org, tlatsotsonali, videos uan okseki tlamantli tlen kajki itech Internet (uan amo ma tikintlalikan itech redes sociales nion páginas kanin kintlaliaj videos noso okseki tlamantli)”. ¿Tleka techiluiaj amo ijkon ma tikchiuakan?

Tekiuajkej kimatij akin inmiaxka páginas tlen tikinpiaj itech Internet, ik non, amo ikaj uelis kintlalis itech okseki páginas.

Tekiuajkej kimatij akin inmiaxka páginas tlen tikinpiaj itech Internet. Akinmej yomoxelojkej itech Jehová uan tlen kixnamikij, kintlaliaj amatlajkuilolmej itech okseki páginas para ma kinmitakan iTlaixpantijkauan Jehová uan oksekimej. Pero yejuan kitlaliaj okseki tlamantli para oksekimej ma mokuayejyekokan kox melauak tlen kineltokaj iTlaixpantijkauan Jehová (Sal. 26:4; Prov. 22:5). Oksekimej kintekitiltiaj toamatlajkuiloluan noso logotipo jw para ika tlanemakaskej uan aplicaciones para teléfonos uan tabletas. Ken tekiuajkej yikimatij akin iaxka nochi tlen pouij itech jw, ik non, ialtepe Jehová kinpia seki tlanauatilmej kanin kijtoa tleka amo tikintekitiltiskej ijkon ken yotikijtojkej (Prov. 27:12). Noijki tekiuajkej amo techpaleuiskej itlaj ma tikinmiluikan akinmej kixnamikij ialtepe Jehová noso akinmej tlanemakaj, tla ialtepe Jehová kinkauiliskia sekimej ma kitlalikan itech Internet nochi tlen poui itech jw noso kinkauiliskia ma kitekitiltikan logotipo jw para ika tlanemakaskej.

 Timoouijtiliskej tla amo tikinkixtiskej amatlajkuilolmej itech jw.org. Jehová yokitlali “tlakeuali yolmelajki uan ixtlamatki” para ma tikpiakan tlen ika tikchikauaskej totlaneltokilis (Mat. 24:45TNM). “Tlakeuali yolmelajki uan ixtlamatki” kintlalia amatlajkuilolmej itech página www.jw.org, tv.jw.org, uan wol.jw.org. Noijki san tikinpiaj eyi aplicaciones para teléfonos uan tabletas JW Language®, JW Library® uan JW Library Sign Language®. Itech ninmej páginas uan aplicaciones amo itlaj monemaka nion nelitok iuan tlen kiyekana Satanás. Uan tla tejuan tikinkixtiskej amatlajkuilolmej itech okseki páginas uan aplicaciones, xamo yokipatilijkej noso yokajxitilijkej seki tlamantli tlamachtilmej (Sal. 18:26; 19:8).

Noijki tla ikaj kintlalis amatlajkuilolmej itech Internet para ma kijtokan tlen mokuayejyekoaj oksekimej, kinkauilis akinmej yomoxelojkej ixpan Jehová uan akinmej amo kinpaktia ma titetlapouikan, ma kijtokan kox melauak tlen tikneltokaj uan kichiuaskej ayakmo ma titlaneltokakan itech ialtepe Jehová. Sekimej tokniuan mokualaniaj iuan oksekimej itech nonmej páginas uan ijkon okachi kisokiotiaj itoka Jehová. Itech nonmej páginas amo uelis tikinmachtiskej ‘ika yamankatlajtol’ akinmej amo kinekij techkakiskej (2 Tim. 2:23-25; 1 Tim. 6:3-5). Noijki yotikinmajsikej miakej redes sociales uan itech Internet kitekitiltiaj itoka ialtepe Jehová, Cuerpo Gobernante uan akinmej ompa pouij. Pero nion se tokni tlen poui itech Cuerpo Gobernante kipia se página itech Internet nion itech redes sociales.

Titlapaleuiaj ma motetlapoui ijkuak tikinmiluiaj oksekimej ma kalakikan itech jw.org (Mat. 24:14TNM). Nochi tlen moajsi itech páginas kinyektlalijtokej para okachi kuali ma titetlapouikan uan tiknekij nochtin ma kinpaleui. Ik non, tla kanin kijtoa “tla tiktekitiltis” kijtoa uelis tiktitlaniskej ika correo amatlajkuilol noso tiktitlaniskej kanin uelis kikixtiskej amatlajkuilol itech jw.org, uelis ijkon tikchiuaskej. Tla tikinmiluiskej oksekimej ma kalakikan itech páginas tlen tikinpiaj, tikinmititiaj ma kixmatikan “tlakeuali yolmelajki uan ixtlamatki” akin kitemaka tlen ika tikchikauaskej totlaneltokilis.

^ párr. 1 Nin tikajsis itech jw.org/ncx kanin kijtoa tla tiktekitiltis. Ompa techiluia tlen amo tikchiuaskej ika nochi tlen poui itech jw.