Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Abril de 2017

¿Tlen tlamantli ayakmo yetos ijkuak ualtlanauatis iTekiuajkayo toTajtsin Dios?

¿Tlen tlamantli ayakmo yetos ijkuak ualtlanauatis iTekiuajkayo toTajtsin Dios?

“Nochi tlan onka itech nin tlaltíkpaktli ya tlanti, iwa nochi tlan pitsotik, pero akin kichiwah tlan Dios kineki nochipa yolitos” (1 JUAN 2:17).

TLAKUIKALMEJ: 55 UAN 24

1, 2. (1) ¿Tleka nochi tlen amo kuali yetoskia ken tlakatl tlen kimiktiskej? (Xikita tlaixkopinal tlen ika peua tlamachtil). (2) Ijkuak ayakmo yetos tlen amo kuali, ¿ken momachiliskej tlen katej iluikak uan tlen yetoskej Tlaltikpak?

XIMOKUAYEJYEKO se tlakatl amo yolkuali kiuikaj sekimej policías. Uan peua kijtoaj: “¡Nin tlakatl yomikik!”. Pero ¿tleka ijkon kiluiaj tla nin tlakatl yoltok? Porque yokichi miak tlamantli amo kuali, ik non, yokiluijkej kimiktiskej. Ik non, yetoskia ken yomikik * (xikita tlajtoli tlen kiualika tlakxitlan).

2 Uelis tikijtoskej nochi tlen amo kuali onka yetoskia ken tlakatl tlen amo yolkuali kiuikaj kimiktitiuij. Biblia kijtoa “nochi tlan onka itech nin tlaltíkpaktli ya tlanti” (1 Juan 2:17). Jehová yokijto kitlajtlamis nochi tlen amo kuali. Pero se tlamantli kijtosneki ijkuak kitlajtlamiskej nochi tlen amo kuali uan okse tlamantli kijtosneki ijkuak kimiktiskej tlakatl tlen amo yolkuali tlen  itech otimotlapouijkej. Uelis sekimej kijtoskej kox melauak kuali okitakej tlen okichi tlakatl uan ipatka tlajtoaj amo ma kimiktikan. Pero Jehová ye se juez akin kichiua nochi ika melajkayotl uan yokijto kitlajtlamis tlen amo kuali (Deuteronomio 32:4). Ayakmo miak poliui kitlajtlamiskej tlen amo kuali. Ijkuak Jehová ijkon kichiuas, nochtin tlen katej itech iluikak uan tlen yetoskej itech Tlaltikpak, kijtoskej Jehová okichi ika melajkayotl. ¡Melauak yetos yolseuilistli!

3. ¿Tlen naui tlamantli ayakmo yetos ijkuak ualtlanauatis iTekiuajkayo Jehová?

3 ¿Tlen tlamantli ayakmo yetos ijkuak kachiuaskej tlen amo kuali? Tlamis nochi tlamantli tlen techtlajyouiltia uan nin mouika iuan “kuali tlajtolmej itech Tekiuajkayotl” tlen motetlapouiskia (Mateo 24:14TNM). Ik non, tikitaskej naui tlamantli tlen kitlajtlamiskej ijkuak ualtlanauatis iTekiuajkayo toTajtsin Dios: akinmej amo yolkualmej, organizaciones tlen kichiuaj amo kuali, nochi tlen amo kuali uan tlajyouilistli. Pero ijkuak timomachtijtiaskej tikitaskej ken techtlajyouiltia, tlen kichiuas Jehová uan tlen ika kipatkayotis tlen amo kuali.

AKINMEJ AMO YOLKUALMEJ

4. ¿Ken techtlajyouiltia tlen kichiuaj akinmej amo yolkualmej?

4 ¿Ken techtlajyouiltia tlen kichiuaj akinmej amo yolkualmej? Tlatitlanil Pablo okijto “itech iksemi tonatijmeh yetos miak tlaijyowílistli” uan noijki okijto tlaltikpaktlakamej “amokualteh iwa tekajkayajkeh okachi kijtlakojtiaskeh inyolo” (2 Timoteo 3:1-5, 13). ¿Amo melauak mochijtok nin tlamantli? Ualeua yotechtlajyouiltijkej akinmej amo yolkualmej, akinmej kinpaktia moteuiskej uelis yotechmojmojtijkej noijki akinmej kinpaktia tekokoliskej noso akinmej tlamiktiaj. Sekimej teixpan kichiuaj tlen amo kuali. Oksekimej kichiuaj ken kinekij tepaleuiskej pero amo kuali inyelis. Maski amo keman yotechtlajyouiltijkej, noijki tiktlaxtlajtiuij tlen kichiuaj. ¿Amo techmomojtia ken kintlajyouiltiaj konemej, akinmej yikipiaj miak xiuitl uan oksekimej tlen amo uelij mopaleuiaj? Sekimej yetoskiaj ken yolkamej noso ken amo kuali ejekamej (Santiago 3:15). Pero Biblia techmaka se chialistli.

5. (1) ¿Tlen kinkauilijtok Jehová ma kichiuakan tlaltikpaktlakamej? (2) ¿Tlen kinpanos akinmej amo kinekij kipatlaskej inyelis?

5 ¿Tlen kichiuas Jehová? Itech ninmej tonalmej kinkauilijtok tlaltikpaktlakamej ma kipatlakan innemilis (Isaías 55:7). Maski yitlamis tlen amo kuali, Jehová ayamo kinmixkomaka akinmej amo yolkualmej. ¿Tlen kinpanos akinmej amo kinekij kipatlaskej innemilis uan kipaleuijtokej nochi tlen amo kuali hasta ijkuak uits ueyi tlajyouilistli? Jehová yokijto kinmixpolos (xiktlajtolti Salmo 37:10). * Miakej san ichtaka kichiuaj tlen amo kuali uan ken san ichtaka kichiuaj, amo ikaj kinmita (Job 21:7, 9). Pero Biblia kijtoa: “Porque toTajtsin Dios tlachixtok itech inmiojui tlaltikpaktlakamej uan ye kita kanin tlaksatiuij. Amo onka tlayoali nion ekauitl kanin sapanoa tlayoatok kanin uelis motlatiskej akinmej kichiuaj tlen amo kuali” (Job 34:21, 22). Amo ikaj uelis kimotlatilis Jehová. Jehová kita nochi tlen kichiuaj akinmej amo yolkualmej. Ijkuak tlamis Armagedón ayakmo yetoskej akinmej amo yolkualmej. Ayakmo keman tikinmitaskej (Salmo 37:12-15).

6. ¿Akinmej mokauaskej ijkuak kinmixpoloskej akinmej amo yolkualmej uan tleka nin sapanoa kuali?

 6 ¿Akinmej mokauaskej ijkuak kinmixpoloskej akinmej amo yolkualmej? Jehová techiluia: “Pero akinmej yolkualmej yetoskej itech Tlaltikpak, uan melauak yolpakiskej porque yetos miak yolseuilistli”. Uan noijki kijtoa: “Yolmelauakej yetoskej itech Tlaltikpak, uan itech chantiskej nochipa” (Salmo 37:11, 29). ¿Akinmej “yolkualmej” uan akinmej “yolmelauakej”? Yejuan akinmej yolkualmej kiseliaj ma kinmachti Jehová uan kitlakamatij. Noijki moixmatij ken yolmelauakej porque ika yolpakilistli kichiuaj tlen Jehová kita kuali. Axkan okachi katej tlaltikpaktlakamej tlen amo yolkualmej. Pero itech yankuik Xochitlali tlen tikchiaj, yetoskej san akinmej yolkualmej uan yolmelauakej. Yejuan kikuepaskej Tlaltikpak se kualtsin Xochitlali.

ORGANIZACIONES TLEN KICHIUAJ TLEN AMO KUALI

7. ¿Ken techtlajyouiltiaj organizaciones tlen kichiuaj tlen amo kuali?

7 ¿Ken techtlajyouiltiaj organizaciones tlen kichiuaj tlen amo kuali? Miak tlamantli tlen amo kuali amo kichiuaj tlaltikpaktlakamej, kichiuaj organizaciones. Sekimej tlaneltokalismej yokinkajkayajkej sapanoa miakej tlaltikpaktlakamej. Yejuan amo kijtoaj tlen melauak itech toTajtsin Dios uan amo kijtoaj tlen chialistli kipiaj tlaltikpaktlakamej uan Tlaltikpak. Noijki tlamachtiaj amo melauak tlen kijtoa Biblia. Noijki tekiuajkej tlapaleuiaj ma mochiuakan guerras uan ma moteuikan tlaltikpaktlakamej. Noijki kintlajyouiltiaj akinmej amo itlaj kipiaj uan akinmej amo uelij mopaleuiaj. Kipiaj tomin porque tlakajkayauaj noso ikaj kipaleuiaj. Uan uejueyij empresas sapanoa tlaixnekij, kisokiotiaj Tlaltikpak uan kixpoloaj nochi tlen onka. Kintekitiltiaj tlaltikpaktlakamej para kipiaskej tomin. Ken tikitaj, intlajtlakol organizaciones tlen kichiuaj tlen amo kuali ma yeto tlajyouilistli.

8. ¿Tlen kijtoa Biblia kinpanos organizaciones tlen motaj chijchikauakej?

8 ¿Tlen kichiuas Jehová? Ueyi tlajyouilistli peuas ijkuak organizaciones políticas kintlajyouiltiskej tlaneltokalismej, tlen kinyekana “mekatanajsiwatl” tlen motokayotia Ueyi Babilonia (Apocalipsis 17:1, 2, 16; 18:1-4). Ninmej organizaciones itech tlaneltokalismej kinpojpoloskej. Uan ¿tlen kinpanos okseki organizaciones tlen kichiuaj tlen amo kuali? Biblia kijtoa ninmej organizaciones katej ken islas uan tepeyo porque motaj chijchikauakej (xiktlajtolti Apocalipsis 6:14). Pero noijki kijtoa kinmixpoloskej tekiuajkej uan organizaciones tlen amo kipaleuiaj iTekiuajkayo toTajtsin Dios. Uan nin panos itlamian ueyi tlajyouilistli (Jeremías 25:31-33). Sepa kinpojpoloskej ninmej organizacciones tlen kichiuaj tlen amo kuali.

9. ¿Ken tikmatij “yankuik tlali” kuali kiyekanaskej?

9 ¿Tlen kinpatkayotis organizaciones tlen kichiuaj tlen amo kuali? ¿Ok yetos se organización itech Tlaltikpak ijkuak tlamis Armagedón? Biblia kijtoa: “Pero tejwah tikchiah tlan Dios yokijto techmakas, se yankuik ilwikak iwa se yankuik tlali, iwa ompa yetos milajkachiwálistli” (2 Pedro 3:13). Iluikak tlen panos kijtosneki tekiuajkej tlen okichijkej tlen amo kuali uan tlali tlen panos kijtosneki akinmej okinnauatiayaj. ¿Tlen kinpatkayotis ijkuak kinpojpoloskej?  “Se yankuik ilwikak iwa se yankuik tlali”. “Se yankuik ilwikak” kijtosneki se yankuik Tekiuajkayotl tlen kiyekanas Jesucristo uan 144,000. Uan “se yankuik tlali” kijtosneki tlaltikpaktlakamej tlen kikauaskej ma kinyekana iTekiuajkayo toTajtsin Dios. Jesús uan akinmej iuan tlanauatiskej kiteititiskej iyelis Jehová akin kipaktia nochi kuali ma yeto (1 Corintios 14:33). Nin kuali mochiuas porque yejuan kuali kinyekanaskej tlaltikpaktlakamej. Tlayekanaskej tlakamej yolkualmej tlen kuali kichiuaskej inteki uan kitlakamatiskej Jesús uan 144,000 (Salmo 45:16). Ximokuayejyeko ken yetos tonemilis ijkuak organizaciones kinpatkayotiskej ika ialtepe toTajtsin Dios uan amo keman kichiuas tlen amo kuali.

TLEN AMO KUALI

10. (1) ¿Tlen tlamantli amo kuali onka ik kanin tichanti? (2) ¿Ken uelis mitsijtlakos te uan mokalchanejkauan nochi tlen amo kuali?

10 ¿Ken techtlajyouiltia tlen amo kuali? Axkan sekimej sapanoa auilnemij, tlakajkayauaj uan sapanoa moteuiaj. Kichiuaj kualtsin ma mota tlen amo kuali uan ijkon kinpinauiaj itlanauatiluan Jehová kanin kijtoa tlen kuali uan tlen amo kuali (Isaías 5:20). Tetajmej moneki kinmaluiskej inkoneuan itech nochi nin tlamantli. Akinmej melauak kichiuaj ken Cristo sapanoa mochijchikauaj kuali mouikaskej iuan Jehová para amo ma kichiuakan tlen oksekimej kichiuaj.

11. ¿Tlen techmachtia ijkuak Jehová okipojpolo Sodoma uan Gomorra?

11 ¿Tlen kichiuas Jehová? Ma tikitakan tlen okichi Jehová itech Sodoma uan Gomorra (xiktlajtolti 2 Pedro 2:6-8). Lot uan ikalchanejkauan sapanoa otlajyouiayaj ika tlen amo kuali okichiuayaj akinmej amo yolkualmej. Jehová okipojpolo non altepetl para kinmixpolos akinmej amo yolkualmej. Okichi para “mamawikah n tlakah tlajtlakolejkeh non satepa nemiskiah itech nin tlaltíkpaktli”. Ijkon ken Jehová okipojpolo nochi auilnemilistli, ijkon kitlajtlamis tlen amo kuali tlen axkan tikitaj.

12. ¿Tlen mitspaktiskia tikchiuas ijkuak ayakmo yetos tlen amo kuali?

12 ¿Tlen ika kipatkayotiskej tlen amo kuali? Nochi tlen tikchiuaskej itech Xochitlali techyolpaktis. Ximokuayejyeko ken sapanoa kualtsin yetos ijkuak tikkuepaskej Tlaltikpak se kualtsin Xochitlali noso ijkuak tikinchijchiuaskej kalmej para ompa tichantiskej iuan tokalchanejkauan. Noijki sapanoa miakej kinyolitiskej uan tikinseliskej, tikinmachtiskej itech Jehová uan itech nochi tlen yokichi (Isaías 65:21, 22; Hechos 24:15). Tikpiaskej tekitl tlen techyolpaktis uan kiueyichiuas Jehová.

TECHTLAJYOUILTIA TLEN PANOA ITECH TONEMILIS

13. ¿Tlen techpanotok porque Satanás, Adán uan Eva okixnamikej toTajtsin Dios?

13 ¿Ken techtlajyouiltia tlen panoa itech tonemilis? Axkan techpanoa miak tlamantli itech tonemilis porque onka tlen amo kuali uan organizaciones kichiuaj tlen amo kuali. Tinochtin titlajyouiaj ijkuak mochiuaj guerras, ijkuak amo onka tomin, mochikoitaj, kokolistli noso mikilistli. Nochi nin panotok porque Satanás, Adán uan Eva okixnamikej toTajtsin Dios. Ik non, tinochtin titlajyouiaj.

14. ¿Tlen kichiuas Jehová ika tlen techpanotok itech tonemilis?

14 ¿Tlen kichiuas Jehová? Ma tikitakan  tlen kichiuas Jehová para kitlajtlamis tlen amo kuali panoa itech tonemilis. Jehová yokijto kintlajtlamis guerras (xiktlajtolti Salmo 46:8, 9). * Kitlajtlamis kokolistli (Isaías 33:24). Kitlajtlamis mikilistli (Isaías 25:8). Kichiuas ma yeto miak tlakuali (Salmo 72:12-16). Kipatlas nochi tlamantli tlen techtlajyouiltia. Noijki kitlajtlamis nochi tlen Satanás kinauatijtok uan amo kuali ejekamej (Efesios 2:2).

Ximokuayejyeko ayakmo yetos guerras, kokolistli uan mikilistli. (Xikita párrafo 15).

15. ¿Tlen tlamantli ayakmo yetos ijkuak tlamis Armagedón?

15 Ximokuayejyeko ijkuak ayakmo yetos guerras, kokolistli uan mikilistli. Amo yetoskej soldados, teposmej tlen ika moteuiskej nion monumentos. Ayakmo yetoskej hospitales, akinmej tlapajtiaj uan kanin kintokaj mikamej. Ken ayakmo yetoskej akinmej amo yolkualmej, ayakmo yetoskej policías nion alarmas. Nion ayakmo titlatsakuaskej ika llaves. Nochi tlen axkan techtekipachoa ayakmo yetos.

16, 17. (1) ¿Ken momachiliskej akinmej ok yoltoskej ijkuak tlamis Armagedón? Xikijto se neskayotl. (2) ¿Tlen tikchiuaskej para timomakixtiskej?

16 ¿Ken timomachiliskej ijkuak ayakmo titlajyouiskej? Ualeua oui timokuayejyekoskej ken kualtsin tichantiskej. Uelis yotimomatkej tichantiskej ken axkan tikatej uan ayakmo tikitaj nochi tlajyouilistli tlen panotok. Uelis akinmej chantij inauak se carretera yomomatkej kinkakiskej carros. Noijki yomomatkej akinmej chantij ik kanin kitlamotlaj tlajsoli uan ayakmo kijnekuij kox potoni. Pero tla ayakmo panoskiaj carros uan poliuiskia tlen potoni, okachi kuali yetoskiaj. Ijkon timomachiliskej ijkuak Jehová kitlajtlamis nochi tlen amo kuali tlen axkan techpanoa itech tonemilis.

17 ¿Tlen kipatkayotis tlen axkan techtekipachoa? Salmo 37:11 kijtoa “akinmej yolkualmej yetoskej itech Tlaltikpak, uan melauak yolpakiskej porque yetos miak yolseuilistli”. Melauak techyolpaktia tikmatiskej tlen Jehová kineki kichiuas para tejuan. Ik non, ma timochijchikauakan ma timouikakan iuan Jehová uan ma tiyetokan itech ialtepe. Ma timokuayejyekokan itech nin chialistli, ma tikitakan melauak mochiuas uan nochipa itech ma titetlapouikan (1 Timoteo 4:15, 16; 1 Pedro 3:15). Uan ijkuak kitlajtlamiskej nochi tlen amo kuali, tejuan nochipa tiyoltoskej uan tiyolpakiskej.

^ párr. 1 Nin párrafo techiluia tlen okichiuayaj itech seki telpiloyan itech altepetl Estados Unidos.

^ párr. 5 Salmo 37:10 kijtoa: “Uan san tepitsin poliui uan akinmej amo yolkualmej ayakmo yetoskej, maski melauak tikintemos ayakmo ompa yetoskej”.

^ párr. 14 Salmo 46:8, 9 kijtoa: “Kitlajtlamia guerras ipan nochi tlaltikpak. Kiposteki arco uan kipojposteki inlanza; uan kintlatia incarros de guerra ika tlitl. Kitlajtlamia guerras itech nochi Tlaltikpak. Kiposteki arco uan kitsojtsonteki lanza; kintlatia carruajes itech tlitl”.