Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Abril de 2017

“Tlen tikiluiaj Jehová tikchiuaskej, ma tikchiuakan”

“Tlen tikiluiaj Jehová tikchiuaskej, ma tikchiuakan”

“Tla itla yotiksentlalili Dios, moneki tikchiwas” (MATEO 5:33).

TLAKUIKALMEJ: 18 UAN 7

1. (1) ¿Tlen okichi Jefté uan Ana? (Xikita tlaixkopinal tlen ika peua tlamachtil). (2) ¿Tlen tlajtlanilmej tikinnankiliskej?

JEFTÉ akin okinyekanaya soldados kuali okimatiaya tlen kichiuas uan okatka yolchikauak. Ana okatka yolyamanki, okimaluiaya inamik uan ikalijtik. Jefté uan Ana okichijkej tlen okijtojkej. Yejuan ome okiueyichiuayaj Jehová. Uan okiluijkej Jehová itlaj kichiuaskiaj uan ijkon okichijkej. Yejuan se kuali neskayotl itech ninmej tonalmej para akinmej kiluiaj Jehová kichiuaskej tlen kijtoaj. Pero ¿tlen kijtosneki ijkuak tikijtoaj itlaj tikchiuaskej? ¿Tleka amo san ma tikajauilmatikan tlen tikiluiaj Jehová tikchiuaskej? ¿Tlen techmachtia tlen okichi Jefté uan Ana? Itech nin tlamachtil tikinnankiliskej ninmej tlajtlanilmej.

2, 3. (1) ¿Tlen kijtosneki ijkuak tikijtoaj itlaj tikchiuaskej? (2) ¿Tlen techiluia Biblia ijkuak itlaj tikiluiaj Jehová tikchiuaskej?

2 Itech Biblia kijtoa ijkuak tikiluiaj Jehová itlaj tikchiuaskej, tikijtojtokej melauak tikchiuaskej. Se neskayotl, uelis tikiluiskej itlaj tikchiuaskej, itlaj tikmakaskej, peuas okachi tiktekichiuiliskej noso tikiluiaj ayakmo tikchiuaskej  seki tlamantli. Ijkuak ijkon tikiluiaj kisa itech toyolo uan amo ikaj techchiualtia. Pero tla tikiluiaj Jehová tikchiuaskej tlen otikiluijkej, ma tikilnamiktokan moneki tikchiuaskej porque ye amo san kajauilmati. Para toTajtsin Dios melauak tikiluijtokej tikchiuaskej. Nin tlamantli ken ijkuak ikaj kijtoa melauak kichiuas noso amo kichiuas tlen kijtojtok (Génesis 14:22, 23; Hebreos 6:16, 17). Ijkon ken kijtoa Biblia, ¿tleka moneki tikpatioitaskej tlen tikiluiaj Jehová tikchiuaskej?

3 Tlanauatil tlen okijkuilo Moisés okijtoaya ijkuak ikaj okiluiaya itlaj Jehová omonekiaya ijkon kichiuas. Okijtoaya: “Moneki kichiuas nochi tlen okijto” (Números 30:2). Satepan, Salomón okinmijkuilo ninmej tlajtolmej: “Nochipa ijkuak tikiluis toTajtsin Dios itlaj tikchiuas, amo xiuejkaua tikchiuas, porque ye amo moyolpaktia itech akinmej xoxojtin. Tlen tikijtoa tikchiuas, xikchiua” (Eclesiastés 5:4). Uan Jesús otlamachti amo san ma tikajauilmatikan ijkuak tikiluiaj Jehová tikchiuaskej tlen tikiluiaj. Ye okijto: “Tla itla yotiksentlalili Dios, moneki tikchiwas” (Mateo 5:33).

4. (1) ¿Tleka amo san ma tikajauilmatikan tlen tikiluiaj Jehová tikchiuaskej? (2) ¿Tlen techmachtia ineskayo Jefté uan Ana?

4 Ma tikchiuakan tlen tikiluiaj Jehová uan amo san ma tikajauilmatikan. Tikchiuaskej noso amo tlen otikiluijkej Jehová, kichiuas kuali noso amo iuan ma timouikakan. David okijkuilo: “¿Akin uelis tlejkos itech itepe Jehová uan akin uelis moketos kanin ye kajki kanin tlachipauak?”. Uan Jehová okijto kiselia ‘akin amo kijtoa itlaj tlen amo melauak ika iyolilis nion tlakajkayaua’ (Salmo 24:3, 4). Jefté uan Ana, ¿tlen okiluijkej Jehová kichiuaskiaj? ¿Oui kichiuaskej tlen okiluijkej Jehová?

OKICHIJKEJ TLEN OKILUIJKEJ JEHOVÁ

5. ¿Tlen okijto kichiuaskia Jefté uan tlen opanok?

5 Ijkuak Jefté moteuiskia iuan ammonitas akinmej okikokoliayaj ialtepe Jehová, okilui Jehová itlaj kichiuaskia (Jueces 10:7-9). Ijkuak Jefté okitlatlaujti Jehová ma kipaleui ijkin okilui: “Tla te nomak tikintlalis ammonitas, ijkuakon, akin ualkisas itech nokalijtik uan nechnamikiti ijkuak ne nimokuepati ika yolseuilistli intech ammonitas, moneki yetos iaxka Jehová uan niktemakas ken se tlamanali tlen kitlatiaj”. ¿Tlen opanok? Jehová okikak Jefté uan okichi ma kintlanili ammonitas. Uan ijkuak oajsito ikalijtik, ichpoch akin sapanoa okitlasojtlaya, okinamikito. Axkan yetoskia iaxka Jehová (Jueces 11:30-34). ¿Tlen okichi ichpoch?

Jefté uan ichpoch okatkaj yolmelajkej, ik non, amo keman okijtojkej ayakmo kichiuaskej tlen okiluijkej Jehová

6. (1) ¿Tleka oui okichiuili Jefté uan ichpoch para kichiuaskej tlen okiluijkej Jehová? (2) ¿Tlen techmachtia Deuteronomio 23:23 uan Salmo 15:4 ijkuak tikijtoaj itlaj tikchiuaskej?

6 Para mochiuaskia tlen okijto Jefté,  ichpoch omonekiaya yas itech tabernáculo uan ompa nochipa kitekichiuiliskia Jehová. ¿Jefté san okiluijtikiski Jehová tlen kichiuaskia? Amo. Uelis yokimatiaya ye ichpoch akin achto kisaskia kinamikiti. Pero oui kichiuiliskia Jefté uan ichpoch. Ijkuak okitak ichpoch, sapanoa omoyolkoko. Uan ichpoch oyajki ochokato. ¿Tleka? Porque amo keman monamiktiskia nion kinpiaskia ikoneuan. Uan Jefté ayakmo okinpiaya ikoneuan, ik non, ayakmo kinpiaskia ikalchanejkauan. Pero Jefté uan ichpoch kuali okimatiayaj okatka itlaj okachi ipati uan amo tlen okimachiliayaj. Jefté okijto: “Ne yonikilui Jehová tlen nikchiuas uan amo uelis nimoyolkuepas”. Uan ichpoch okijto: “Notajtsin, tla yotikilui Jehová, xikchiua ijkon ken yotikilui, porque Jehová yokichi miak tlamantli para xikintlanili ammonitas akinmej mitskokoliaj” (Jueces 11:35-39). Jefté uan ichpoch okatkaj yolmelajkej, ik non, amo keman okijtojkej ayakmo kichiuaskej tlen okiluijkej Jehová maski oui kinchiuiliskia (xiktlajtolti Deuteronomio 23:23; * Salmo 15:4). *

7. (1) ¿Tlen okijto kichiuaskia Ana uan tleka? (2) ¿Ken okinankili Jehová Ana? (3) ¿Ken okitak Samuel tlen okijto kichiuaskia inantsin? (Xikita tlajtoli tlen kiualika tlakxitlan).

7 Ijkuak Ana otlajyouijtoka noijki okilui Jehová kichiuaskia tlen okijto. Sapanoa omotekipachoaya porque amo ueli okinpiaya ikoneuan uan okipinauiayaj (1 Samuel 1:4-7, 10, 16). Ana okilui Jehová ken omomachiliaya uan okilui: “Oh Jehová te akin tikinyekana soldados, tla tikitas ken tlajyouijtok motlakeual uan melauak tinechilnamikis uan amo tikilkauas motlakeual uan tla tikchiuas ma nikpia se chokotsin, ne nimitsmaktilis inemilis uan amo keman kiximaskej” * (xikita tlajtoli tlen kiualika tlakxitlan) (1 Samuel 1:11). Jehová okikak Ana uan opanok seki kauitl okipixki ikone uan okitokayoti Samuel. Maski sapanoa oyolpakik, amo okilka tlen okilui Jehová kichiuaskia. Ijkuak oneski ikone ye okijto: “Oniktlajtlanili Jehová” (1 Samuel 1:20).

Ana amo san okajauilmatki tlen okilui Jehová uan okitemakak ikone

8. (1) ¿Oui kichiuaskia Ana tlen okilui Jehová? (2) ¿Tleka techilnamiktia Salmo 61 tlen okichi Ana?

8 Ijkuak Samuel okipiaya kanaj eyi xiuitl, Ana okichi tlen okilui Jehová. Okiuikak ikone itech tabernáculo tlen okatka Siló. Okiuikak ixpan ueyi teopixki Elí uan okilui: “Onimotlatlaujti ma nikpia nin chokotsin uan Jehová onechmakak tlen oniktlajtlanili. Axkan nikmaktilia Jehová. Nochi inemilis yetos iaxka Jehová” (1 Samuel 1:24-28). Ijkuakon Samuel ochantik itech tabernáculo. Uan  Biblia kijtoa “Samuel omoskaltijtia ixpan Jehová” (1 Samuel 2:21). Uelis Ana oui okichiuili kichiuas tlen okilui Jehová. ¿Tleka? Porque amo kitaskia ken moskaltiskia ikonetsin akin sapanoa okitlasojtlaya. Pero Ana amo san okajauilmatki tlen okilui Jehová. Ana okitemakak ikone uan okiyolpakti Jehová (1 Samuel 2:1, 2; xiktlajtolti Salmo 61:5, 8). *

¿Tikchijtokej tlen otikiluijkej Jehová tikchiuaskej?

9. ¿Axkan tlen timomachtiskej?

9 Ken yotikitakej, amo san ma tikajauilmatikan tlen tikiluiaj Jehová tikchiuaskej. Axkan tikitaskej tlen uelis tikiluiskej Jehová tikchiuaskej uan tleka moneki ijkon tikchiuaskej.

IJKUAK TIKILUIAJ JEHOVÁ IXPAN TIMOTEMAKAJ

Ijkuak timotemakaj ixpan Jehová. (Xikita párrafo 10).

10. ¿Tlen tlamantli okachi ipati tlen tikiluiaj Jehová tikchiuaskej uan tleka?

10 Ijkuak timotemakaj ixpan Jehová, sapanoa miak ipati tlen ompa tikijtoaj tikchiuaskej. Ijkuak toselti tiktlatlaujtiaj  Jehová, tikiluiaj nochipa tiktekichiuiliskej maski tikpiaskej ouijkayotl. Tikiluiaj san ye achto yetos itech tonemilis uan san ye itech timotekipachoskej. Jesús okijto ayakmo ma tikchiuakan san tlen tejuan tiknekiskej (Mateo 16:24). Desde ijkuak ixpan otimotemakakej ‘tiiaxkawan toTajtzin Dios’ (Romanos 14:8NHY). Nin amo san ma tikajauilmatikan. Timomachiliaj ken se salmista akin okijto: “¿Tlen ika niktlaxtlauilis Jehová nochi tlamantli kuali tlen nechmaka? Tlen onikilui Jehová nikchiuas, kema, nikchiuas ixpan nochi ialtepe” (Salmo 116:12, 14).

11. ¿Tlen tikteititiaj ijkuak timoapolaktiaj?

11 ¿Yotimotemakakej ixpan Jehová uan yotimoapolaktijkej? Tla ijkon yotikchijkej, sapanoa kuali tlen otikpejpenkej. ¿Tikilnamikij tlapoualistli tlen okitemakakej ijkuak otimoapolaktijkej? Tokni tlen okitemakak tlapoualistli otechtlajtlani kox yotimotemakakej ixpan Jehová uan kox otikajsikamatiayaj tlen kijtosneki ijkuak timotemakaj uan ijkuak timoapolaktiaj techixmatiskej ken iTlaixpantijkauan Jehová. Ijkuak otikijtojkej kema, nochtin tlen ompa okatkaj okimatkej tejuan yotimotemakakej ixpan Jehová uan yitikchijtokej nochi tlen moneki para timoapolaktiskej uan tiyetoskej tiitekipanojkauan Jehová. Sapanoa otikyolpaktijkej Jehová.

12. (1) ¿Tlen moneki ma timotlajtlanikan? (2) ¿Tlen otechilui tlatitlanil Pedro ma tikchiuakan?

12 Ijkuak otimoapolaktijkej, otikiluijkej Jehová nochipa tiktekichiuiliskej uan timochijchikauaskej tiktlakamatiskej. Pero ijkuak timoapolaktiaj yikin ompa tipeuaj. Ik non, moneki ma timotlajtlanikan: “¿Okachi nimouika iuan Jehová desde ijkuak onimoapolakti? ¿Ok niktekichiuilijtok ika nochi noyolo?” (Colosenses. 3:23). “¿Nochipa niktlatlaujtia Jehová? ¿Nochipa niktlajtoltia Biblia? ¿Nochipa nimonechikoa? ¿Nimochijchikaua nitetlapouis? ¿Noso ayakmo niyolpaki niktekichiuilis Jehová?”. Tlatitlanil Pedro okijto ma timomaluikan porque uelis ayakmo okachi tiknekiskej tiktekichiuiliskej Jehová. Pero nin amo techpanos tla timochijchikauaj okachi titlaneltokaskej, okachi timomachtiskej, titlaxikoskej uan okachi tiktlasojtlaskej toTajtsin Dios (xiktlajtolti 2 Pedro 1:5-8).

13. ¿Tlen moneki kilnamiktos akin yomotemakak ixpan Jehová uan yomoapolakti?

13 Tla yotikiluijkej Jehová tiktekichiuiliskej, ayakmo uelis tikiluiskej ayakmo tikchiuaskej. Akin peua mosotlaua kitekichiuilis Jehová uan ayakmo kineki kichiuas ken Cristo, amo uelis kijtos amo keman melauak omotemakak ixpan Jehová uan amo itlaj ipati ijkuak omoapolakti * (xikita tlajtoli tlen kiualika tlakxitlan). Tla ikaj tlajtlakolchiua, moneki kiluis Jehová uan tlanechikol (Romanos 14:12). Jesús okijto okatkaj sekimej tokniuan tlen ayakmo okitlasojtlayaj Jehová ken achto. Amo tiknekij ijkon ma techpano, okachi kuali, tiknekij ma techilui Jesús ninmej tlajtolmej: “Ne nikmati nochi tlan tikchiwa. Nikixmati motetlasojtlalis, motlaneltokalis, iwa kenijki tikimpalewia oksikimeh, noiwa kemi titlaxikoa ijkuak titlaijyowia, noiwa onikma  axa titekititok okachi ke achto” (Apocalipsis 2:4, 19). Tiknekij tikyolpaktijtoskej Jehová uan tikchiuaskej tlen otikiluijkej ijkuak ixpan otimotemakakej.

IJKUAK TIMONAMIKTIAJ

Ijkuak timonamiktiaj. (Xikita párrafo 14).

14. ¿Tlen okse tlamantli tikiluiaj Jehová melauak tikchiuaskej uan tleka miak ipati?

14 Okse tlamantli tlen tikijtoaj tikchiuaskej uan tlen miak ipati: ijkuak timonamiktiaj. Namiktilistli tlateochiuali, ik non, Jehová amo san kajauilmati. Ijkuak akinmej monamiktiaj kijtoaj kichiuaskej tlen kijtojtokej, kiluijtokej Jehová uan akinmej ompa katej. Yejuan kimoiluiaj motlasojtlaskej, momaluiskej uan motlakaitaskej nochi tonalmej tlen chantiskej san sekan itech Tlaltikpak ijkon ken okijto toTajtsin Dios. Uelis amo nochtin novios kintekitiltiaj ninmej tlajtolmej. Pero nochtin kiluiaj toTajtsin Dios kichiuaskej tlen okijtojkej. Ijkuak novios kimoiluijtokej melauak kichiuaskej tlen okijtojkej, kiteititiaj yomonamiktijkej uan nochipa san sekan yetoskej (Génesis 2:24; 1 Corintios 7:39). Jesús okijto: “Tlan Dios yokiseitili, amaka makinxexelo”. Akinmej monamiktiaj amo keman ma mokuayejyekokan uelis mokajkauaskej inmixpan tekiuajkej tla kipiaj ouijkayotl (Marcos 10:9).

15. ¿Tleka akinmej kichiuaj ken Cristo amo san kajauilmatij namiktilistli?

15 Ken tinochtin titlajtlakolejkej, uelis tikpiaskej ouijkayotl. Ik non, Biblia kijtoa “akimeh monamiktiah, panoskeh itech miak tlaijyowílistli” (1 Corintios 7:28). Miakej amo kipatioitaj namiktilistli. Mokuayejyekoaj tla kipiaskej ouijkayotl, uelis mokajkauaskej inmixpan tekiuajkej ijkuak yejuan kinekiskej. Pero akinmej tikchiuaj ken Cristo amo ijkon timokuayejyekoaj. Akinmej yomonamiktijkej kimatokej yokiluijkej Jehová melauak kichiuaskej tlen okijtojkej. Tla amo kichiuaskej ken okijtojkej, yetoskia ken kikajkayajtokej toTajtsin Dios uan ye kinkokolia akinmej tlakajkayauaj (Levítico 19:12; Proverbios 6:16-19). Akinmej yomonamiktijkej moneki kilnamiktoskej tlen okijto tlatitlanil Pablo: “Tla tikpia mosiwa, amo xikkajkawa” (1 Corintios 7:27). Ijkon okijto Pablo porque okimatiaya Jehová kikokolia akin kikajkayaua inamik (Malaquías 2:13-16).

16. ¿Tlen kijtoa Biblia ijkuak akinmej yomonamiktijkej moxeloaj noso mokajkauaj inmixpan tekiuajkej?

16 Jesús okijto uelis mokajkauaskej ixpan tekiuajkej tla ikaj oauilnenki uan inamik amo kineki kitlapojpoluis (Mateo 19:9; Hebreos 13:4). ¿Uan tla san kinekij moxeloskej? Biblia noijki techtlapouia itech nin tlamantli (xiktlajtolti 1 Corintios 7:10, 11). Biblia amo kijtoa tlen ika uelis moxeloskej. Pero akinmej yomonamiktijkej ualeua mokuayejyekoaj kinekij moxeloskej porque kipiaj seki ouijkayotl. Se neskayotl, sekimej kijtoaj tla amo moxeloskej uelis kinkojkoskej noso uelis kinmiktiskej noso ayakmo mouikaskej iuan Jehová porque innamik kintlajyouiltia noso yomoxelo itech Jehová * (xikita tlajtoli tlen kiualika tlakxitlan).

17. ¿Tlen uelis kichiuaskej akinmej yomonamiktijkej para okachi kuali ma yeto innamiktilis?

17 ¿Tlen uelis kichiuaskej tlayekankej tla akinmej yomonamiktijkej kinmiluiaj  ma kinpaleuikan okachi kuali ma yeto inamiktilis? Tlayekankej uelis kintlajtlaniskej kox yokitakej video ¿Tlen kijtosneki tlasojtlalistli tlen melauak? uan kox yomomachtijkej amatlajkuilol Mokalchanejkauan uelis yolpakiskej. Nin video uan amatlajkuilol kipiaj principios bíblicos tlen kinpaleuis okachi ma yolpakikan akinmej yomonamiktijkej. Se namiktilistli okijto: “Ijkuak opejki timomachtiaj nin amatlajkuilol okachi opejki tiyolpakij”. Se tokni tlen yikipia 22 xiuitl omonamikti, omokuayejyeko inamiktilis ayakmo uelis moyektlaliskia. Pero ijkuak okitakej video ¿Tlen kijtosneki tlasojtlalistli tlen melauak? okijto: “Maski tiome yotimoapolaktijkej amo otiyolpakiayaj. Video okiski ijkuak okachi omonekiaya. Axkan okachi kuali tikatej”. Tla akinmej yomonamiktijkej kitlakamatij tlen Jehová kinmiluia, okachi yetos chikauak innamiktilis uan okachi yolpakiskej.

IJKUAK TIKILUIAJ JEHOVÁ OKACHI TIKTEKICHIUILISKEJ

18. ¿Tlen yokichijkej miakej tetajmej?

18 Achto yotimotlapouijkej itech tlen okijtojkej kichiuaskiaj Jefté uan Ana. Porque okichijkej tlen okijtojkej, ichpoch Jefté uan ikone Ana okitekichiuilijkej Jehová tlen okatka sapanoa miak ipati. Axkan miakej tetajmej kinmiluiaj inkoneuan okachi ma kitekichiuilikan Jehová uan ma kichijtokan itech nochi innemilis. Tinochtin uelis tikinyolchikauaskej telpokamej uan ichpokamej okachi ma kitekichiuilikan Jehová (Jueces 11:40; Salmo 110:3).

Ijkuak tikiluiaj Jehová okachi tiktekichiuiliskej. (Xikita párrafo 19).

19. Tokniuan tlen okachi kitekichiuiliaj Jehová, ¿ken kichiuaj tlen okijtojkej kichiuaskej?

19 Axkan katej kanaj 67,000 tokniuan tlen pouij itech Orden Mundial de Siervos Especiales de Tiempo Completo de los Testigos de Jehová. Sekimej tekitij Betel, oksekimej kinchijchiuaj kalmej kanin timonechikoaj, sekimej katej ken tlayekankej itech circuito. Oksekimej tlamachtiaj itech Tlamachtilmej para akinmej kichiuaj ken Cristo, sekimej precursores especiales, misioneros, sekimej tekitij itech kalmej kanin mochiuaj uejueyij nechikolmej noso tlayektlaliaj kanin mochiuas se tlamachtil. Uan kijtoaj mochijchikauaskej kichiuaskej nochi tekitl tlen kinmakaskej para kitekichiuiliskej Jehová. Noijki kitemitiaj se amatl kanin kijtoaj tetlakamatiskej uan amo tekitiskej para kitlaniskej tomin, san uelis kichiuaskej tla kinkauiliskej. Yejuan amo sapanoa inpati porque okachi kitekichiuiliaj Jehová, pero tekitl tlen kichiuaj miak ipati. Yejuan yolyamankej uan yokipejpenkej kichiuaskej tlen yokijtojkej.

20. ¿Ken moneki tikitaskej tlen tikiluiaj Jehová tikchiuaskej uan tleka?

20 Itech nin tlamachtil otimomachtijkej itech eyi tlamantli tlen tikiluiaj toTajtsin Dios tikchiuaskej. Uelis yotikchijkej se, pero moneki ma tikilnamiktokan nin amo san ma tikajauilmatikan uan moneki tikchiuaskej ken yotikijtojkej (Proverbios 20:25). Titlajyouiskej tla amo tikchiuaskej ken otikiluijkej Jehová (Eclesiastés 5:6). Ma tikchiuakan ken salmista akin okijto: “Nochipa nikueyichiuas motoka ika tlakuikalmej para mojmostla nikchiuas tlen onikijto” (Salmo 61:8).

^ párr. 6 Deuteronomio 23:23 kijtoa: “Xikilnamikto tlen otikijto uan moneki tikchiuas tlen otikijto ken yetoskia tiktemakas tlamanali ixpan Jehová moDios”.

^ párr. 6 Salmo 15:4 kijtoa: “Ye kixtopeua akin amo yolkuali pero kintlakaita akinmej kimauiliaj Jehová. Kichiua tlen kijtoa maski tlajyouis”.

^ párr. 7 Ana okilui Jehová tla kimakaskia se ikone, nin konetl nochipa yetoskia nazareo. Nin kijtosneki sapanoa miak ipati Samuel nochipa kitekichiuiliskia Jehová (Números 6:2, 5, 8).

^ párr. 8 Salmo 61:5, kijtoa: “Porque te otikkak tlen onimitsilui nikchiuas, oh toTajtsin Dios. Otinechmakak tetliokolil para akinmej tikmauiliaj motoka. Uan 61:8 kijtoa: “Ik non, nochipa nikueyichiuas motoka ika tlakuikalmej para mojmostla nikchiuas tlen onikijto”.

^ párr. 13 Ken tlayekankej moneki kitaskej miak tlamantli achto ikaj kiluiskej kox uelis moapolaktis, amo ikaj uelis kijtos amo ipati ijkuak omoapolakti.

^ párr. 16 Xikita okseki tlamachtilmej “¿Tlen kijtoa Biblia ijkuak akinmej yomonamiktijkej moxeloaj noso mokajkauaj inmixpan tekiuajkej?” itech amochtli “Xiyetokan itech itlasojtlalis toTajtsin Dios”.