Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Abril de 2017

“Akin Juez itech nochi Tlaltikpak” nochipa kichiua tlen melauak

“Akin Juez itech nochi Tlaltikpak” nochipa kichiua tlen melauak

“Ye ken se Tepexitl, melauak nochi kuali tlen kichiua, porque nochi iojuiuan kipiaj melajkayotl” (DEUTERONOMIO 32:4).

TLAKUIKALMEJ: UAN 11

1. Ken okijto Abrahán otlaneltokaya itech Jehová? (Xikita tlaixkopinal tlen ika peua tlamachtil).

SE TONAL Abrahán akin okatka yolmelajki okitlajtlani Jehová: “¿Amo kichiuas tlen melauak akin Juez itech nochi Tlaltikpak?” (Génesis 18:25). Amo okitlajtlani porque amo itech otlaneltokaya. Ijkon okitlajtlani para kiteititiskia melauak tlaneltoka itech Jehová ijkuak kixkomakaskia altepetl Sodoma uan Gomorra uan kichiuaskia ika melajkayotl. Abrahán kuali okimatiaya Jehová amo keman kixpoloskia “akin yolmelauak ijkon ken akin amo yolkuali”. Kuali okimatiaya amo keman ijkon kichiuaskia. Satepan, Jehová okijto nin: “Ye ken se Tepexitl, melauak nochi kuali tlen kichiua, porque nochi iojuiuan kipiaj melajkayotl. ToTajtsin Dios akin amo keman tekaua amo keman kichiua tlen amo melauak; ye yolmelauak uan nochi kichiua ika melajkayotl” (Deuteronomio 31:19; 32:4).

2. ¿Tleka Jehová kichiua nochi ika melajkayotl?

2 ¿Tleka okimatiaya Abrahán Jehová nochi kichiua ika  melajkayotl? Porque Jehová se kuali neskayotl itech melajkayotl. Ken itlanauatiluan Jehová kintlalia ika melajkayotl, ye nochi kichiua ika melajkayotl. Biblia kijtoa Jehová kipatioita melajkayotl (Salmo 33:5).

3. Xikijto se neskayotl tlen amo kuali kinchiuiliaj sekimej.

3 Techyolchikaua tikmatiskej Jehová nochi kichiua ika melajkayotl. Pero itech Tlaltikpak sapanoa kichiuaj tlen amo kuali (xikita recuadro “¿Tlen kijtosneki?”). Se neskayotl, sekimej tlen tsaktokej itech telpiloyan yokinmiluijkej keski xiuitl tsaktoskej maski amo itlaj okichijkej. Satepan kinkixtiaj porque kitaj amo itlaj intlajtlakol. Nin kichiua miakej ma kualanikan uan ma moyolkokokan. Pero akinmej kichiuaj ken Cristo onka okseki tlamantli tlen okachi kinyolkokoa. ¿Tlen tlamantli?

UALEUA TECHCHIUILIAJ ITLAJ AMO KUALI ITECH TLANECHIKOL

4. ¿Tlen uelis kiyejyekos totlaneltokilis?

4 Akinmej tikchiuaj ken Cristo yitikmatij techchiuiliskej itlaj amo kuali tlaltikpaktlakamej pero amo itech tlanechikol. Pero uelis moyejyekos totlaneltokilis tla otechchiuilijkej itlaj amo kuali itech tlanechikol. ¿Tlen tikchiuaskej tla techchiuiliskej itlaj amo kuali?

5. ¿Tleka amo techtlajtlachialtia ijkuak tikitaj noso techchiuiliaj itlaj tlen amo kuali itech tlanechikol?

5 Tinochtin titlajtlakolejkej uan timotlapololtiaj. Uan non kichiuas ikaj ma tikchiuilikan tlen amo kuali noso techchiuiliskej tlen amo kuali (1 Juan 1:8). Pero amo nochipa ijkon panoa. Uan ijkuak ijkon panoa, akinmej tiyolmelajkej amo timotlajtlachialtiaj nion techtsakuilia non tlamantli. Jehová techtlapouia ika Biblia para ika timopaleuiskej ma tiyetokan tiyolmelajkej ijkuak se tokni techchiuilis tlen amo kuali (Salmo 55:12-14).

6, 7. (1) ¿Tlen ouijkayotl okipanok tokni Diehl? (2) ¿Uan tlen okinpaleui ma yetokan yolmelajkej?

6 Ma tikitakan tlen okipanok Willi Diehl. Itech xiuitl 1931, ye opejki tekiti itech Betel itech altepetl Berna (Suiza). Itech xiuitl 1946, oyajki itech Tlamachtil ika Biblia tlen kichiua Watchtower itech Galaad itech altepetl Nueva York (Estados Unidos). Ijkuak otlanki omomachti uan opanok seki xiuitl, opejki tekiti ken tlayekanki itech circuito itech ueyi altepetl Suiza. Ijkuak tokni Diehl otlajto itech inemilis, okijto itech metstli mayo, xiuitl 1949 okinmilui tokniuan akinmej tlayekanaj itech kali Betel yimonamiktiskia. Tokniuan okiluijkej kikixtiliskia nochi tekitl tlen okipiaya itech ialtepe Jehová. San yetoskia precursor. Tokni Diehl okijto: “Amo onechkauiliayaj ma nikintemaka tlapoualismej”. Noijki okijto: “Miakej ayakmo otechtlajpaloayaj, otechitayaj ken yotechkixtijkej itech tlanechikol”.

7 ¿Tlen okichi tokni Diehl? Ye uan isiua kuali okimatiayaj monamiktiskej amo okixnamikiaya Biblia. Yejuan omotlatlaujtiayaj uan otlaneltokakej itech Jehová. Maski miakej tokniuan  amo okajsikamatiayaj ken kita Jehová namiktilistli, satepan tokniuan okajsikamatkej uan oksepa okikauilijkej tokni Diehl okachi ma kitekichiuili Jehová. Jehová okinteochi porque okatkaj yolmelajkej * (xikita tlajtoli tlen kiualika tlakxitlan). ¿Tlen tikchiuaskiaj tla ijkon techpanoskia? ¿Timochiaskiaj uan tikkauiliskiaj Jehová ma kiyektlali ouijkayotl? ¿Noso san totech titlaneltokaskiaj uan tikyektlaliskiaj ouijkayotl? (Proverbios 11:2; xiktlajtolti Miqueas 7:7). *

Ken titlajtlakolejkej uelis amo kuali otikajsikamatkej tlen opanok

8. ¿Tleka uelis timotlapololtiskej ijkuak techchiuiliskej itlaj amo kuali noso oksekimej kinchiuiliskej?

8 Tla timokuayejyekoaj itlaj amo kuali otechchiuilijkej itech tlanechikol, ma tikilnamikikan noijki uelis timotlapololtiskej. Ken titlajtlakolejkej uelis amo kuali otikajsikamatkej tlen opanok. Uelis amo kuali tikmatij nochi tlen opanok. Moneki ma tiktlatlaujtikan Jehová itech nin tlamantli maski tlen kijtoaj melauak opanok noso amo. Ma tikkauakan ouijkayotl imak Jehová uan ma tiyetokan tiyolmelajkej. Ijkon amo tikualaniskej “iuan Jehová” (xiktlajtolti Proverbios 19:3). *

9. ¿Tlen timomachtiskej axkan uan chikome?

9 Ma tikinmitakan eyi neskayomej tlen yiuejkika opanokej itech ialtepe Jehová. Itech nin tlamachtil tikitaskej ineskayo José akin okatka iojpa ixui Abrahán. Tikitaskej ika tlen okichiuilijkej ikniuan sapanoa otlajyoui. Uan chikome timomachtiskej tlen okipejpenki Jehová kichiuilis ueyi tekiua Acab uan tlen okichi tlatitlanil Pedro ijkuak okatka Antioquía de Siria. Ijkuak timomachtiskej ninmej neskayomej, ma timokuayejyekokan ken moneki tikitaskej tlamantli ken Jehová kita uan ken uelis iuan timouikaskej. Nin techpaleuis tla yotechchiuilijkej itlaj amo kuali.

JOSÉ OKICHIUILIJKEJ ITLAJ TLEN AMO KUALI

10, 11. (1) ¿Tlen ouijkayotl okixiko José? (2) ¿Tlen okichi José ijkuak otsaktoka?

10 José okatka yolmelajki ixpan Jehová uan sapanoa otlajyoui. Pero tlen okichiuilijkej ikniuan okachi okiyolkoko. Ijkuak okipiaya 17 xiuitl, ikniuan okichtekej uan okinemakakej inmak sekimej tlaltikpaktlakamej tlen okiuikakej Egipto (Génesis 37:23-28; 42:21). Itech altepetl Egipto okitlajtlakoltijkej okinekiaya kipinatis se siuatl uan san niman okitsakej maski amo okitakej kox melauak ijkon  okichi (Génesis 39:17-20). Kanaj 13 xiuitl José okatka tlakeuali uan otsaktoka. ¿Ken uelis techpaleuis ineskayo José tla tokniuan techchiuiliaj itlaj tlen amo kuali?

11 Ijkuak José otsaktoka, akin okinyekanaya tlen okimakayaj vino tekiua iuan okitsakuatoj. Se yoak nin tlakatl okochtemik uan Jehová okipaleui José ma kiyekilui tlen okochtemik. José okilui kisaskia uan oksepa kitekichiuiliskia faraón. Pero noijki okilui tlen ye okipanotoka. Tlen okilui José techpaleuis pero noijki techpaleuis tlen amo okilui (Génesis 40:5-13).

12, 13. (1) ¿Okiseli José tlen amo kuali okichiuilijkej uan amo itlaj okichi? (2) ¿Tlen okilui akin kitemaka vino?

12 (Xiktlajtolti Génesis 40:14, 15). * José okijto “onechichtekej”. Ken tikitaj, José okichiuilijkej tlen amo kuali. Ye noijki okijto amo melauak okinekiaya kipinatis non siuatl. Ik non, okilui akin okitemakaya vino ma kitlapoui faraón itech José uan ma kikixti.

13 ¿Uelis tikijtoskej José okiseli tlen  okipanotoka uan amo itlaj okichi? Amo. Ye kuali okimatiaya amo kuali tlen okichiuilijkej. Ik non, okiyekilui akin okitemakaya vino tlen melauak opanok para ma kipaleui. Biblia amo kijtoa José okinmilui oksekimej akinmej okinemakakej nion faraón okilui. Ijkuak ikniuan oajsitoj Egipto uan omotlapojpoluijkej iuan José, faraón kuali okinseli. Noijki faraón okinmilui ompa uelis mokauaskiaj uan kipiaskiaj nochi tlen okipiaya Egipto (Génesis 45:16-20).

San okachi tikueyitiliskej ouijkayotl tla tikijtojtinemiskej tlen amo kuali otechchiuilijkej. (Xikita párrafo 14).

14. Tla techchiuiliaj itlaj tlen amo kuali itech tlanechikol, ¿tlen techpaleuis amo ma tikijtokan itlaj tlen teyolkoko?

14 Tla tikitaj otechchiuilijkej itlaj tlen amo kuali itech tlanechikol, amo ma tikijtojtinemikan. Pero tla se tokni kichiua se ueyi tlajtlakoli, moneki timotlapouiskej iuan tlayekankej uan ma kipaleuikan (Levítico 5:1). Pero ualeua amo mochiua se ueyi tlajtlakoli. Ijkuak ijkon panos, uelis timotlapojpoluiskej iuan tokni uan amo tikijtojtinemiskej tlen opanok. Uelis amo moneki tikinmiluiskej tlayekankej (xiktlajtolti Mateo 5:23, 24; 18:15TNM). * Ma tiyetokan tiyolmelajkej uan ma timoyekanakan ika principios bíblicos ijkuak techchiuiliaj itlaj tlen amo kuali. Uelis satepan tikitaskej otimotlapololtijkej uan amo melauak itlaj otechchiuilijkej. Tla ijkon techpanoskia, techyolseuiskia amo otikijtojtinenkej tlen amo melauak okichi tokni. Maski melauak tlen opanok noso amo, amo tikyektlaliskej ouijkayotl tla tikijtojtinemiskej tlen amo kuali itech se tokni. Tla tiyetoskej tiyolmelajkej ixpan Jehová uan tokniuan, techpaleuis amo ma tikijtokan itlaj tlen amo kuali. Akin okijkuilo se salmo okijto “akin amo tlajtlakolchijtinemi” amo kijtojtinemis tlen amo melauak itech oksekimej nion kitechiuilis tlen amo kuali (Salmo 15:2, 3; Santiago 3:5).

OKACHI MIAK IPATI TIMOUIKASKEJ IUAN JEHOVÁ

15. ¿Ken okipaleui José kuali omouikaya iuan Jehová?

15 Ineskayo José techmachtia okse tlamantli. Itech 13 xiuitl okichiuilijkej tlen amo kuali, nochi okitaya ken Jehová kita (Génesis 45:5-8). Amo keman okitlajtlakolti Jehová tlen okipanotoka. Maski José amo okilka tlen amo kuali okichiuilijkej, amo okichi nochipa ma kualanto. Uan okachi miak ipati amo okika tlen amo kuali okichiuilijkej ma moxelo itech Jehová. Ken ye okatka yolmelajki, ye uan ikalchanejkauan okitakej ijkuak Jehová okiyektlali tlen amo kuali okichiuilijkej uan noijki okinteochi.

José amo okika tlen amo kuali okichiuilijkej ma moxelo itech Jehová

16. ¿Tleka moneki okachi ma timouikakan iuan Jehová ijkuak ikaj techchiuilia tlen amo kuali?

 16 Ijkon ken José, tejuan noijki ma tikpatioitakan timouikaskej iuan Jehová. Amo ma tikkauilikan tlen amo kuali kichiuaj tokniuan ma techxelo itech Jehová akin sapanoa tiktlasojtlaj uan tikueyichiuaj (Romanos 8:38, 39). Uan tla techchiuiliaj itlaj tlen amo kuali itech tlanechikol, ma tikchiuakan ken José uan okachi ma timouikakan iuan Jehová. Ma tikitakan tlamantli ken Jehová kita. Ma timochijchikauakan ma tikyektlalikan ouijkayotl uan ma timoyekanakan ika principios bíblicos. Satepan ma tikkauakan imak Jehová. Ma tikneltokakan Jehová kiyektlalis ijkuak monekis uan ken ye kinekis.

MA TITLANELTOKAKAN ITECH “AKIN JUEZ ITECH NOCHI TLALTIKPAK”

17. ¿Ken uelis tikteititiskej titlaneltokaj itech “akin Juez itech nochi Tlaltikpak”?

17 Ken onka miak tlajyouilistli, uelis techchiuiliskej tlen amo kuali. Ualeua uelis timokuayejyekoskej tejuan noso oksekimej okinchiuilijkej tlen amo kuali itech tlanechikol. Amo ma tikkauakan nin ma techtsakuili (Salmo 119:165). Okachi kuali, ma tiyetokan tiyolmelajkej ixpan Jehová, ma tikiluikan ma techpaleui uan itech ma titlaneltokakan. Uan ma tikilnamiktokan titlajtlakolejkej uan uelis amo nochi kuali tikajsikamatij noso amo tikmatij tlen melauak opanok. Ma tikchiuakan ken José uan amo ma tikijtojtinemikan tlen otechchiuilijkej porque san okachi tikueyitiliskej ouijkayotl. Uan amo san totech ma titlaneltokakan, okachi kuali, ma tiyetokan tiyolmelajkej uan ma tikchiakan Jehová ma kiyektlali ouijkayotl. Tla ijkon tikchiuaskej, Jehová techselis uan techteochiuas ken okiteochi José. Uelis tikneltokaskej itech “akin Juez itech nochi Tlaltikpak” nochipa kichiuas tlen melauak “porque nochi iojuiuan kipiaj melajkayotl” (Génesis 18:25; Deuteronomio 32:4).

18. ¿Tlen timomachtiskej chikome?

18 Chikome tikitaskej ok ome neskayomej tlen yiuejkika opanokej itech ialtepe Jehová. Ika ninmej neskayomej tikitaskej tla tikatej tiyolyamankej uan titetlapojpoluiaj, techpaleuiskej ma tikitakan melajkayotl ken Jehová kita.

^ párr. 7 Xikita inemilis tokni tlen itoka “Jehová es mi Dios, en quien de veras confiaré” itech revista La Atalaya (ika náhuatl del centro Akin Tetlapouijtok) 1 de noviembre 1991.

^ párr. 7 Miqueas 7:7 kijtoa: “Pero ne nitlachixtos itech Jehová. Ne nimochixtos itech noTajtsin Dios akin nechmakixtis. NoTajtsin Dios nechkakis”.

^ párr. 8 Proverbios 19:3: kijtoa: “Tlakatl tlen xoxo kichijkoloa iojui uan iyolo sapanoa kualani iuan Jehová”.

^ párr. 12 Génesis 40:14, 15 kijtoa: “Pero moneki tinechilnamikis ijkuak kuali tiyetos. Nimitstlatlaujtia xinechititi tlasojtlalistli yolmelajki uan notech xiktlapoui Faraón para ma nechkixti. Porque onechichtekej itech inmialtepe hebreos uan nikan amo itlaj onikchi para ma nechtsakuakan”.

^ párr. 14 Mateo 18:15, Traducción del Nuevo Mundo kijtoa: “Noijki tla mokni kichiua se tlajtlakoli iuan ximotlapouiti uan xikilui tlen amo kuali okichi. Tla mitskakis, yotikmotlanili mokni”.