Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Abril de 2016

¿Tleka moneki timonechikoskej pampa tikueyichiuaskej toTajtsin Dios?

¿Tleka moneki timonechikoskej pampa tikueyichiuaskej toTajtsin Dios?

“Nochteh omochijchikawayah [...] omoololoayah” (HECHOS 2:42).

TLAKUIKALMEJ: 20 UAN 53

1-3. (1) ¿Ken tikmatij itekipanojkauan Jehová nochipa kipatioitaj monechikoskej? (Xikita tlaixkopinal tlen ika peua tlamachtil). (2) ¿Tlen timomachtiskej itech nin tlamachtil?

IJKUAK Corinna okipiaya 17 xiuitl, okikitskijkej inantsin uan okititlankej itech se campo soviético kanin chikauak otekitiayaj. Satepan, Corinna noijki okititlankej itech altepetl Siberia, tlen sapanoa uejka omokauaya. Ompa okichiualtijkej sapanoa ma tekiti. Omonekiaya tekitis kiauak maski sapanoa oseuaya uan amo kuali otlakentitoka. Maski otlajyouijtoka, Corinna uan okse tokni siuatl okinekiayaj yaskej se nechikol.

2 Corinna okijto: “Tiotlak otiajkej uan otinejnenkej ik kanin okisaya tren, tlen omokauaya kanaj 25 kilómetros. Tren okiski yoak, kanaj las 2:00 uan otiuejkajkej chikuase horas. Ijkuak otitemokej itech tren, otinejnenkej majtlaktli kilómetros pampa tiajsiskej nechikol”. Corinna sapanoa oyolpaktoka maski uejka oyajkej. Ye kijtoa: “Itech nechikol otimomachtijkej revista Akin Tetlapouijtok uan otitlakuikakej. Non sapanoa otechpaleui  ma mochikaua totlaneltokilis”. Eyi tonal satepan, omokuepkej kanin otekipanoayaj pero inteko amo okimatki tla kanaj oyajkej.

3 Itekipanojkauan Jehová nochipa kipatioitaj monechikoskej. Se neskayotl, ijkuak omochi tlanechikol itech akinmej kichiuaj ken Cristo, imachtijkauan Jesús opejkej monechikoaj nochipa (Hechos 2:42). Axkan tejuan noijki tiknekij nochipa timonechikoskej, maski ualeua oui techchiuilia noso tisotlauaj miak. Uelis ijkon techpanoa pampa moneki titekitiskej noso moneki tikchiuaskej miak tlamantli. Pero ¿tlen techpaleuis noso techyolchikauas pampa nochipa timonechikoskej? [1] (Xikita nota kanin tlami tlamachtil). ¿Ken uelis tikinpaleuiskej akinmej tikinmachtiaj itech Biblia uan oksekimej ma kajsikamatikan moneki monechikoskej? Nin tlamachtil techyekiluis tla timonechikoaj, techpaleuis, kinpaleuis oksekimej uan kiyolpaktis Jehová. [2] (Xikita nota kanin tlami tlamachtil).

KEN TECHPALEUIAJ NECHIKOLMEJ

4. ¿Ken techpaleuia nechikolmej pampa okachi kuali ma tikixmatikan Jehová?

4 Nechikolmej techmachtiaj. Sejse nechikol techmachtia itech Jehová. Se neskayotl, kanaj itech ome xiuitl miakej nechikolmej omomachtijkej amochtli Acerquémonos a Jehová itech Tlamachtil ika Biblia itech Tlanechikol. Ken otimomachtijkej itech iyelis toTajtsin Dios uan otikinkakej oksekimej ijkuak ika nochi inyolo otlanankilijkej, non okichi okachi ma tiktlasojtlakan Jehová. Noijki timomachtiaj miak tlamantli itech iTlajtol toTajtsin Dios ijkuak kuali tikinkakij tlapoualismej, neskayomej uan ijkuak kitlajtoltiaj Biblia (Nehemías 8:8). Uan ma timokuayejyekokan ken techyolchikauaj ijkuak timomachtiaj ken techpaleuia Biblia uan ijkuak tikkakij tlen oksekimej omomachtijkej.

5. ¿Ken yomitspaleuijkej nechikolmej itech monemilis uan itech tetlapouilistli?

5 Nechikolmej noijki techmachtiaj ken uelis tiktlakamatiskej tlen kijtoa Biblia itech nochi tonemilis (1 Tesalonicenses 4:9, 10). Se neskayotl, tlamachtil ika revista Akin Tetlapouijtok techiluia tlen moneki ma kichiua ialtepe toTajtsin Dios. ¿Tikilnamiki se tonal ijkuak nin nechikol omitspaleui ximokuayejyeko tlen moneki tikchiuas, xiktlapojpolui se tokni noso okachi kuali ximotlatlaujti? Uan noijki okse nechikol tlen tikpiaj itech semana techpaleuia kuali ma titetlapouikan uan ma titlamachtikan ika Biblia (Mateo 28:19, 20).

6. ¿Ken techyolchikauaj uan techpaleuiaj nechikolmej?

6 Nechikolmej techyolchikauaj. Tlamantli tlen onka itech Tlaltikpak uelis kichiuas amo ma tiyolchikajtokan uan ma tisotlauakan noso ualeua amo chikauak  ma tikpiakan totlaneltokilis. Pero nechikolmej sapanoa techyolchikauaj ma tiktekichiuilikan Jehová (xiktlajtolti Hechos 15:30-32). Itech miakej nechikolmej timomachtiaj ken mochijtok miak tlamantli tlen ijkuilitok itech Biblia. Non techyolchikauaj pampa tikmatij noijki mochiuas tlen Jehová yokijto kichiuas satepan. Pero amo san techyolchikauaj tokniuan tlen kitemakaj se tlapoualistli, noijki akinmej tlanankiliaj uan kitlakuikiliaj Jehová ika nochi inyolo (1 Corintios 14:26). Uan noijki ijkuak peua uan tlami nechikol, timotlapouiaj iuan tokniuan uan non techyolchikauaj uan techilnamiktiaj tikatej itech se ueyi kalchanejke (1 Corintios 16:17, 18).

Nechikolmej sapanoa techyolchikauaj pampa ma tiktekichiuilikan Jehová.

7. ¿Tleka moneki nochipa ma timonechikokan?

7 Itech nechikolmej espíritu santo techpaleuia. Ijkuak Jesús yokatka iluikak okijto: “Akin kineki kajsikamatis makikaki tlan n Espíritu kinmilia n tokniwah” noso tlanechikolmej (Apocalipsis 2:7). Kema, Jesús kitekitiltia espíritu santo pampa kinyekanas tlanechikolmej. Ik non, moneki ma tikpiakan non espíritu pampa amo ma tikchiuakan tlen amo kuali, noijki pampa kuali ma tikpejpenakan tlen tikchiuaskej, ma tiyolchikajtokan uan kuali ma titetlapouikan. Ik non, moneki nochipa ma timonechikokan uan ijkon uelis tikseliskej iespíritu santo toTajtsin Dios.

KEN KINPALEUIAJ OKSEKIMEJ

8. ¿Ken kinpaleuiaj oksekimej ijkuak techitaj itech nechikolmej, ijkuak techkakij titlanankiliaj itech nechikolmej uan inmiuan titlakuikaj? (Noijki xikita recuadro “ Nochipa kuali momachilia ijkuak mokuepa ikalijtik”).

8 Itech nechikolmej uelis tikteititiskej tikintlasojtlaj tokniuan. Ma timokuayejyekokan itech ouijkayotl tlen moneki kixikoskej tokniuan. Uelis ik non, tlatitlanil Pablo okijto: “Matiktemolikah kenijki timosepampapalewiskeh”, nin kijtosneki ma tikinpaleuikan oksekimej. Noijki okijto non uelis tikchiuaskej tla ‘nochipa timololoah iwan oksikimeh tokniwah’ (Hebreos 10:24,  25). Ijkuak timonechikoaj, tikteititiaj tiknekij tikinpaleuiskej tokniuan uan tiknekij kuali ma yetokan. Uan noijki ijkuak techkakij titlanankiliaj uan titlakuikaj ika nochi toyolo, moyolchikauaj miak (Colosenses 3:16).

9, 10. (1) Xikyekijto tleka tlen okijto Jesús itech Juan 10:16 techpaleuia ma tikajsikamatikan miak ipati ma timonechikokan. (2) Tla nochipa timonechikoaj, ¿ken uelis tikinpaleuiskej tokniuan akinmej inkalchanejkauan amo momachtiaj Biblia?

9 Nechikolmej kichiua san sekan ma yeto tlanechikol (xiktlajtolti Juan 10:16). Jesús okijto ye okatka ken se tlajpixki uan okijto imachtijkauan okatkaj ken ichkatsitsiuan. Ik non, ximokuayejyeko itech nin neskayotl: ma tikijtokan ome ichkamej katej ipan se tepetsintli, ome katej ixtlauak uan okse oksekan kajki. ¿Uelis tikijtoskej nonmej makuili ichkamej san sekan katej? Nochipa tikinmitaj ichkamej san sekan katej iuan intlajpixki akin kinmaluia. Noijki ijkon, amo uelis tiktokaskej toTlajpixki tla timoxeloaj. Moneki timonechikoskej iuan tokniuan pampa ‘tiyetoskeh sansikah’ ika ‘san se tlájpixki’.

10 Ijkuak tiauij nechikolmej titlapaleuiaj san sekan ma yeto tlanechikol (Salmo 133:1). Sekimej itekipanojkauan Jehová intatajuan noso inmikniuan okinkajkej. Pero Jesús okijto kinmakaskia inkalchanejke tlen kintlasojtlas uan kinmaluis (Marcos 10:29, 30). Tla nochipa timonechikoaj, uelis timochiuaskej ken innantsin, intajtsin noso inmikni. Ik non, moneki ma timochijchikauakan nochipa ma timonechikokan.

 TIKYOLPAKTISKEJ JEHOVÁ

11. ¿Ken tikueyichiuaj Jehová itech nechikolmej?

11 Ijkuak timonechikoaj, tikueyichiuaj Jehová. Ken ye otechchijchi, moneki ma tikueyichiuakan, ma tiktlasojkamatilikan uan ma tiktlakaitakan (xiktlajtolti Apocalipsis 7:12). Tikueyichiuaj Jehová itech nechikolmej ijkuak timotlatlaujtiaj, titlakuikaj uan itech titlajtoaj. Se ueyi tlateochiualistli ma tikueyichiuakan Jehová sejse semana.

Jehová kita ken timochijchikauaj tiaskej nechikolmej uan kipatioita.

12. Pampa Jehová technauatia ma timonechikokan, ¿ken momachilia ijkuak tiktlakamatij?

12 Noijki moneki ma tiktlakamatikan Jehová. Techiluia axkan okachi moneki ma timonechikokan pampa yitlamis nochi tlen amo kuali. Ijkuak tiktlakamatij ika pakilistli non tlanauatil, Jehová yolpaki (1 Juan 3:22). Ye kita ken timochijchikauaj nochipa tiaskej nechikolmej uan kipatioita (Hebreos 6:10).

13, 14. ¿Ken techpaleuiaj nechikolmej okachi ma timotokikan itech Jehová uan Jesús?

13 Ijkuak timonechikoaj tikteititiaj tiknekij timotokiskej itech Jehová uan iKone. Itech nechikolmej, Jehová “akin Kuali Tlamachtia”, ika Biblia techiluia tlen moneki tikchiuaskej uan ken moneki tikpiaskej tonemilis (Isaías 30:20, 21). Uan sekimej tlen amo iTlaixpantijkauan Jehová uan yoyajkej tonechikoluan kijtoaj: “Dios milák kajki nomowah” (1 Corintios 14:23-25). Jehová kiteochiua nechikolmej ika iespíritu uan kiyekana tlamachtil tlen motemaka ika Biblia. Ijkuak timonechikoaj, tikkakij ken techtlapouia uan tikmachiliaj ken techmaluia ika tlasojtlalistli, ik non, tiknekij itech timotokiskej.

14 Jesús akin kiyekana tlanechikol okijto: “Porke kan ome noso eyi moololoah ika Notoka, ompa nika inwah” (Mateo 18:20). Biblia noijki kijtoa Jesús “nemi intlajkotiah” tlanechikolmej (Apocalipsis 1:20-2:1). Jehová uan Jesús techyolchikauaj itech nechikolmej. Ik non, ¿ken timokuayejyekoa momachilia Jehová ijkuak kita timochijchikauaj itech timotokiskej uan noijki itech iKone?

15. ¿Tleka ijkuak tiauij nechikolmej tikteititiaj tiknekij tiktlakamatiskej Jehová?

15 Ijkuak tiauij nechikolmej, tikteititiaj san Jehová kinamiki tlanauatis. Maski Jehová technauatia ma timonechikokan, amo techchiualtia ijkon ma tikchiuakan (Isaías 43:23). Ik non, totech poui ma tikteititikan tla melauak tiktlasojtlaj Jehová uan tla tikteititiaj san ye kinamiki ma technauati (Romanos 6:17). Se neskayotl, uelis itech toteki okachi techmaka tekitl uan ik non, amo tiauij nechikolmej. Noso uelis tekiuajkej amo techkauiliaj ma timonechikokan uan kijtoaj moneki tiktlaxtlauaskej se multa noso  techtsakuaskej tla timonechikoaj. Noijki uelis okachi tiknekij timoyolpaktiskej maski amo tiaskej nechikol. ¿Tlen uelis tikchiuaskej tla ijkon techpanoa? ¿Tiktlakamatiskej Jehová? (Hechos 5:29). Ye yolpaki miak ijkuak tiktlakamatij (Proverbios 27:11).

NOCHIPA MA TIMONECHIKOKAN

16, 17. (1) ¿Ken tikmatij akinmej achto opejkej kichiuaj ken Cristo okipatioitayaj monechikoskej? (2) ¿Ken okinmitaya nechikolmej tokni George Gangas?

16 Akinmej achto opejkej kichiuaj ken Cristo amo san omonechikojkej satepan ijkuak opanok se ueyi milagro itech Pentecostés itech xiuitl 33. Biblia kijtoa “nochteh omochijchikawayah iwa okichiwayah tlan n tlatematiltijkeh okinmachtiayah, omoyekwikayah [noso omonechikoayaj]” (Hechos 2:42). Uan nochipa omonechikojkej maski tekiuajkej romanos okintojtokakej uan noijki tlayekankej judíos. Maski sapanoa oui okinchiuili, nochipa omonechikoayaj.

17 Itech ninmej tonalmej itekipanojkauan Jehová noijki kiteititiaj sapanoa kinpatioitaj nechikolmej. Tokni George Gangas, akin opouiaya kanaj 22 xiuitl itech Cuerpo Gobernante okijto: “Nimonechikos iuan tokniuan se tlamantli tlen okachi nechyolpaktia uan nechyolchikaua. Sapanoa nechpaktia kualkan niajsiti itech Kali kanin timonechikoaj uan nias ijkuak nochtin yoyajkej ijkuak niueli. Niyolpaki miak ijkuak nimotlapouia iuan itekipanojkauan toTajtsin Dios. Ijkuak inmiuan nika, nikmachilia nika iuan nokalchanejkauan, kanin tinochtin kuali timouikaj”. Uan noijki okijto: “Ijkon ken se brújula nochipa techititia kanin mokaua norte, ijkon nokuayejyekol nochipa nechiluia moneki nias nechikolmej”.

18. ¿Ken tikinmita tejuatsin nechikolmej uan tlen tikneki tikchiuas?

18 ¿Noijki ijkon timomachilia tejuatsin? Tla ijkon, ximochijchikaua nochipa tias nechikolmej maski ualeua oui mitschiuilis. Ijkon tikteititia tlen okijto ueyi tekiua David: “Jehová, niktlasojtla kali kanin tichanti” (Salmo 26:8).

^ [1] (Párrafo 3). Sekimej iTlaixpantijkauan Jehová amo uelij yauij nechikolmej pampa sapanoa mokokoaj noso okseki tlamantli kinpanoa. Pero kuali ma kimatikan Jehová kinmajsikamati uan kipatioita tlen kichiuaj pampa uelis kiueyichiuaskej. Tlayekankej uelis kinpaleuiskej ma kikakikan nechikolmej. Uelis kinkakiltiskej ika teléfono noso se grabación.

^ [2] (Párrafo 3). Xikita recuadro “ Tleka moneki timonechikoskej”.