Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Abril de 2016

¿Kajki motetlapouilis ken ajuachtli?

¿Kajki motetlapouilis ken ajuachtli?

TETLAPOUILISTLI sapanoa miak ipati, pero amo nochtin tlaltikpaktlakamej kipatioitaj. Uan maski sekimej kinekij kimatiskej tlen kijtoa Biblia, amo kinekij ma tikinmachtikan.

Ijkon okipanok se tlakatl tlen itoka Gavin. Ye oyaya nechikolmej pero amo okinekiaya momachtis. Ye kijtoa: “Amo miak onikmatiaya itech Biblia uan onipinauaya oksekimej ma kimatikan non. Amo oniknekiaya ma nechkajkayauakan nion nipouis itech se tlaneltokalistli”. ¿Tikneltoka Gavin amo keman momachtiskia Biblia? Amo. Okachi kuali, ximokuayejyeko ken Biblia uelis kipaleuis ikaj. Jehová okilui ialtepe itech iTlajtol: “Notlanauatil uetsis ken kiauitl; notlajtol yolik chichipinis ken ajuachtli” (Deuteronomio 31:19, 30; 32:2). Ma timomachtikan seki tlamantli itech ajuachtli tlen techpaleuis ijkuak tikintlapouiskej nochtin tlaltikpaktlakamej (1 Timoteo 2:3, 4).

 ¿KEN UELIS YETOS TOTETLAPOUILIS KEN AJUACHTLI?

Ajuachtli yamanki. Ijkuak tlamixtemi ajuachtli yolik peua chipini. Itlajtol Jehová okatka ken ajuachtli pampa okitlapoui ialtepe ika tlasojtlalistli uan tlakaitalistli. Uelis tikchiuaskej ken Jehová tla tiktlakaitaj tlen kijtoa akin iuan timotlapouiaj, noijki ijkuak tikkauiliaj ma mokuayejyeko uan ma kijto tlen kineki kineltokas. Tla ijkon tikchiuaj, uelis okachi kikakis tlen tikiluiskej uan okachi miakej techkakiskej.

Ajuachtli sesek. Totetlapouilis noijki yetos ken ajuachtli tla timokuayejyekoaj itech tlen kinekij kimatiskej tlaltikpaktlakamej. Se neskayotl, se tokni tlen itoka Chris, akin achto okitlapoui Gavin itech Biblia, amo okikualani ika itlajtol, okachi kuali, omochijchika pampa Gavin kuali ma momachili ijkuak omotlapouiayaj. Chris okilui Gavin, Biblia san se tlamantli techtlapouia uan tla se kimatis tlen kijtoa, okachi uelis se kajsikamatis tlen moijtoa itech nechikolmej. Satepan, Chris okilui ye tlaneltoka itech Biblia pampa omomachti ken melauak yomochi seki tlamantli tlen kijtoa. Non okipaleui Gavin uan opejki momachtia.

Ajuachtli moneki pampa tiyoltoskej. Itech ueyi altepetl Israel itech seki metstli sapanoa tona uan sepa amo kiaui uan tla amo uetsiskia ajuachtli, nochi xiuitl uakiskia. Jehová okijto itech ninmej tonalmej noijki tlauakiskia, nin kijtosneki miakej kinekiskiaj kimatiskej itech iTlajtol (Amós 8:11). Pero noijki okijto tlapejpenalmej yetoskiaj ken iajuachtli Jehová, pampa tetlapouiaj itech tlateochiualismej tlen kitemakas iTekiuajkayo toTajtsin Dios. Uan “oksikimeh ichkameh” kinpaleuiaj (Miqueas 5:7; Juan 10:16). Ken tikitaj, kuali tlajtolmej itech Tekiuajkayotl tlen tikintlapouiaj tlaltikpaktlakamej kichiuaj ma tlaneltokakan itech Jehová. ¿Tikpatioitaj nonmej kuali tlajtolmej?

Ajuachtli itlateochiualis Jehová. (Deuteronomio 33:13). Titetlapouiskej noijki se tlateochiualistli pampa akinmej techkakij. Ijkon okipanok Gavin, pampa ijkuak opejki momachtia Biblia, omonankili nochi tlen omotlajtlaniaya. Amo opanok miak kauitl uan omoapolakti, uan axkan ye uan isiua tlen itoka Joyce nochipa tetlapouiaj itech Tekiuajkayotl.

ITlaixpantijkauan Jehová tetlapouijtokej itech Tekiuajkayotl itech nochi Tlaltikpak.

MA TIKPATIOITAKAN TETLAPOUILISTLI

Tla timokuayejyekoaj itech ajuachtli, techpaleuis ma tikajsikamatikan kipia miak ipati nochi tlen tisejse tikchiuaj ijkuak titetlapouiaj. ¿Tleka? San se tlachipinili amo tlapaleuia miak, pero ijkuak onka miak ajuachtli, tlali siaua. Noijki ijkon uelis tikijtoskej itech tlen tikchiuaj ijkuak titetlapouiaj, uelis tikijtoskej sapanoa tepitsin. Pero ijkuak tiksetiliaj toteki ika inteki oksekimej itekipanojkauan Jehová, tikitaj ken yankuik kuali tlajtolmej motematiltia “itech nochi n tlaltíkpaktli” (Mateo 24:14). Ik non, ijkuak titetlapouitiuij, ¿yetos totlajtol ken se itlateochiualis Jehová pampa akinmej techkakij? Totlajtol yetos ken ajuachtli tla titetlapouiaj ika tlasojtlalistli uan tlakaitalistli.