Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Abril de 2016

Jehová kinteochiua akinmej itech tlaneltokaj

Jehová kinteochiua akinmej itech tlaneltokaj

“Xikchiwakah kemi kichiwah akimeh kineltokah Dios, porke ijkó nomejwah nonkiseliskeh tlan Dios yonomechsentlalili” (HEBREOS 6:12).

TLAKUIKALMEJ: 11 UAN 54

1, 2. ¿Tlen okinpanok Jefté uan iichpoch?

ICHPOCHTLI kichixtok itajtsin ma ajsiki. Yolpaki miak pampa itajtsin kuali omokuepato kanin omoteuito uan totoka kisa kiseliti. Noijki yolpaki pampa itajtsin otlatlanki, ik non, tlakuika uan mijtotia. Pero itajtsin amo paki, ye sapanoa moyolkokoa uan kitsayana itlaken uan kiluia iichpoch: “¡Ay, nochpoch!”. Satepan kiluia itlaj tlen kipatlas inemilis uan ayakmo yetos ken oksekimej ichpokamej. ¿Ken tlanankilia ichpochtli? San niman kiluia itajtsin ma kichiua tlen okilui Jehová. ¡Mota ichpochtli kipia chikauak itlaneltokilis! Ye okachi kipatioita kitlakamatis Jehová maski san tlen moneki kichiuas (Jueces 11:34-37). Itajtsin sapanoa yolpaki. Kimati Jehová yolpaki pampa ichpochtli kichiuas tlen yokijto itajtsin.

2 Jefté uan iichpoch tlaneltokaj itech Jehová uan kitlakaitaj nochi tlen Jehová kichiua, maski ualeua oui kichiuaskej tlen kinnauatia. Yejuan kimatij okachi kuali kiyolpaktiskej Jehová maski kipoloskej miak tlamantli.

3. ¿Tlen techmachtiaj Jefté uan iichpoch?

 3 Tejuan kuali tikmatij ualeua oui titlaneltokaskej itech Jehová. Ik non, mojmostla timochijchikauaj miak tikpiaskej chikauak totlaneltokilis (Judas 3). Techpaleuis miak tla timomachtiskej itech tlen okinpanok Jefté uan iichpoch uan tlen okichijkej. ¿Tlen okichijkej pampa nochipa tlaneltokaskej itech Jehová?

MA TIKPIAKAN CHIKAUAK TOTLANELTOKILIS MASKI ONKA TLEN AMO KUALI

4, 5. (1) ¿Tlen okinnauati Jehová ma kichiuakan israelitas ijkuak kalakiskiaj itech Tlali tlen okijto kinmakaskia? (2) Ijkon ken kijtoa Salmo 106, ¿tlen okinpanok israelitas pampa amo otetlakamatkej?

4 Mojmostla Jefté uan iichpoch okitayaj tlen okinpanoayaj akinmej ayakmo okitlakamatiayaj Jehová. Kanaj 300 xiuitl achto, toTajtsin Dios okinnauati israelitas ma kinmixpolokan nochtin akinmej okinueyichiuayaj teotsitsintin itech Tlali tlen okijto kinmakaskia (Deuteronomio 7:1-4). Pero israelitas amo okitlakamatkej, ik non, opejkej kichiuaj ken cananeos: okinueyichiuayaj teotsitsintin, oauilnemiayaj uan okichiuayaj nochi tlen pitsotik (xiktlajtolti Salmo 106:35, 36, 39 *).

5 Pampa israelitas amo otetlakamatkej, toTajtsin Dios ayakmo okinpaleuiaya ijkuak okseki altepemej okinekiayaj kinmixpoloskej (Jueces 2:1-3, 11-15; Salmo 106:40-43). Melauak oui okatka pampa akinmej okitlasojtlayaj toTajtsin Dios uan okinekiayaj yetoskej yolmelajkej. Maski ijkon opanok, miakej kema okatkaj yolmelajkej. Jefté uan iichpoch, Elqaná, Ana uan Samuel, nochipa omochijchikajkej kiyolpaktiskej toTajtsin Dios (1 Samuel 1:20-28; 2:26).

6. (1) ¿Tlen kichiuaj miakej tlaltikpaktlakamej itech ninmej tonalmej? (2) ¿Tlen moneki tikchiuaskej?

6 Axkan miakej tlaltikpaktlakamej kichiuaj ken cananeos: auilnemij, moteuiaj, uan kinekij kipiaskej miak tomin. Jehová techmaluia, ik non, technejmachtia ijkon ken okinnejmachti israelitas. ¿Timomaluiskej pampa amo techpanos ken israelitas? (1 Corintios 10:6-11). Moneki timochijchikauaskej pampa amo keman timokuayejyekoskej ken cananeos (Romanos 12:2). ¿Timochijchikajtokej amo ijkon tikchiuaskej?

MA TIKPIAKAN CHIKAUAK TOTLANELTOKILIS MASKI OKSEKIMEJ ITLAJ TECHCHIUILISKEJ

7. (1) ¿Tlen okichiuilijkej iikniuan Jefté uan tlayekankej itech Israel? (2) ¿Tlen okichi Jefté?

7 Ijkuak okatka Jefté, israelitas amo otetlakamatkej. Ik non, ammonitas uan filisteos okintlajyouiltijkej (Jueces 10:7, 8). Amo san akinmej okikokoliayaj altepetl Israel okitlajyouiltijkej Jefté. Iikniuan uan tlayekankej itech Israel noijki okitlajyouiltijkej. Iikniuan okikokoliayaj, ik non, okikixtijkej itech tlali tlen okatka iaxka pampa ye okatka tlayekankonetl (Jueces 11:1-3). Pero Jefté  amo okika ma kitekipacho non; ye okipiaya chikauak itlaneltokilis. Ijkuak tlayekankej itech Israel okiluijkej ma kinpaleui, ye san niman okinpaleui (Jueces 11:4-11). ¿Tleka ijkon okichi?

8, 9. (1) ¿Tlen principios tlen kipia Tlanauatil tlen okijkuilo Moisés okipaleuijkej Jefté? (2) ¿Tlen okachi okipatioitaya Jefté?

8 Maski Jefté kuali omoteuiaya, noijki kuali okixmatiaya Tlanauatil tlen okijkuilo Moisés uan kuali okimatiaya nochi tlen okipanok altepetl Israel. Ik non, kuali okimatiaya tlen kuali uan tlen amo kuali iixpan Jehová (Jueces 11:12-27). Jefté omoyekanaya ika principios tlen kipia Tlanauatil. Ye okimatiaya Jehová amo kineki ma tikinkokolikan oksekimej, pampa ye kineki nochtin itekipanojkauan ma motlasojtlakan. Noijki, Tlanauatil okimachti ma kinpaleui oksekimej, maski okikokoliayaj (Éxodo 23:5; xiktlajtolti Levítico 19:17, 18 *).

9 Uelis ineskayo José okipaleui Jefté. Ye okitak ken José okinmiknomatki iikniuan maski okikokoliayaj (Génesis 37:4; 45:4, 5). Ijkuak Jefté omokuayejyeko itech ineskayo José uan itech okseki kuali neskayomej, nin okipaleui ma kichiua tlen kipaktia Jehová. Maski Jefté omoyolkoko miak ijkuak iikniuan okitlajyouiltijkej, nochipa okipaleuiaya Jehová uan ialtepe (Jueces 11:9). Jefté okachi okipatioitaya kipaleuis itoka Jehová. Pampa nochipa okatka yolmelajki iixpan Jehová, ye okiteochi uan noijki okinteochi israelitas (Hebreos 11:32, 33).

Amo ma tikkauakan tiktekichiuiliskej toTajtsin Dios san pampa oksekimej itlaj otechchiuilijkej.

10. ¿Ken techpaleuia itlanauatiluan Jehová ma tikchiuakan ken Cristo?

10 Uelis sekimej tokniuan itlaj techchiuiliskej uan techyolkokoskej. Tla ijkon panos, ¿tlen tikchiuaskej? Ineskayo Jefté techmachtia amo ma tikkauakan tiktekichiuiliskej toTajtsin Dios san pampa oksekimej itlaj otechchiuilijkej. Noijki non techpaleuis amo tikkauaskej timonechikoskej uan tiyetoskej iuan tokniuan. Ijkon ken Jefté, itlanauatiluan Jehová uelis techpaleuiskej ma tikxikokan ouijkayotl (Romanos 12:20, 21; Colosenses 3:13).

NOCHI TLEN TIKCHIUAJ KITEITITIA TLA MELAUAK TITLANELTOKAJ

11, 12. (1) ¿Tlen okijto Jefté kichiuaskia? (2) ¿Tlen kijtosneki tlen okijto kichiuaskia?

11 Jefté kuali okimatiaya san Jehová uelis kipaleuiskia pampa kinmakixtiskia israelitas inmak ammonitas. Okilui tla kipaleuiskia, kimakaskia ken “se tlamanali tlen kitlatiaj” akin achto kinamikiti ijkuak mokuepaskia (Jueces 11:30, 31). ¿Tlen kijtosnekij ninmej tlajtolmej?

12 Jehová kikokolia ijkuak kimiktiaj  se tlaltikpaktlakatl pampa kitemakaskej ken se tlamanali, ik non, Jefté amo ikaj kimiktiskia pampa kitemakaskia ken se tlamanali (Deuteronomio 18:9, 10). Ijkon ken okijtoaya Tlanauatil tlen okijkuilo Moisés, “se tlamanali tlen kitlatiaj” yetoskia nochi iaxka Jehová. Ik non, tlen Jefté okijto, kijtosneki kitemakaskia ikaj pampa itech nochi iyolilis kitekichiuiliskia Jehová itech tabernáculo. ToTajtsin Dios okipakti tlen okijto Jefté uan okiteochi pampa okintlanili akinmej iuan omoteuiayaj (Jueces 11:32, 33). ¿Akin kitemakaskia Jefté ken “se tlamanali tlen kitlatiaj”?

13, 14. ¿Tlen techmachtia Jueces 11:35 itech itlaneltokilis Jefté?

13 Axkan ximokuayejyeko itech tlen otikijtojkej ijkuak opejki nin tlamachtil. Ijkuak Jefté omokuepki ijkuak otlatlanki, akin achto okinamikito okatka san se iichpoch tlen okipiaya uan akin sapanoa okitlasojtlaya. ¿Kichiuaskia Jefté tlen yokijto kichiuas? ¿Kitemakaskia iichpoch pampa nochipa kitekichiuilis Jehová itech tabernáculo?

14 Principios tlen kipia iTlanauatil toTajtsin Dios oksepa okipaleuijkej Jefté ma kichiua tlen kuali. Uelis ye okilnamik tlen ijkuilitok itech Éxodo 23:19, kanin kijtoa moneki tikmakaskej Jehová tlen okachi kuali tikpiaj. Tlanauatil noijki kijtoa moneki tikchiuaskej nochi tlen yotikijtojkej. Itech Números 30:2 kijtoa, tla se tlakatl kitemaka itlajtol iixpan Jehová, omonekiaya kichiuas nochi tlen okijto. Jefté omonekiaya kichiuas tlen okijto ijkon ken okichi Ana, akin uelis noijki oyoltoka ijkuak okatka Jefté, maski okimatiaya tlen panoskia. Jefté amo okinpiaya oksekimej ikoneuan, san okipiaya se iichpoch tlen uelis kimokauiskia nochi tlen ye okipiaya uan kiuikaskia itoka (Jueces 11:34). Maski ijkon panoskia, Jefté okijto: “Ne yonikilui Jehová uan axkan moneki nikchiuas  uan amo uelis nimokuepas” (Jueces 11:35). Ijkon okiteititi okipiaya chikauak itlaneltokilis maski okichi itlaj tlen okiyolkoko uan Jehová okiteochi. ¿Tikchiuaskia tlen okichi Jefté?

15. (1) ¿Tlen otikiluijkej Jehová tikchiuaskej ijkuak otimotemakakej iixpan? (2) ¿Ken uelis tikteititiskej tikpiaj chikauak totlaneltokilis?

15 Ijkuak otimotemakakej iixpan Jehová, otiktemakakej totlajtol. Otikiluijkej nochipa tikchiuaskej itlanekilis, maski san tlen panos. Uan kuali otikmatiayaj ijkuak ijkon tikchiuaskiaj, tikpoloskiaj miak tlamantli. Axkan, motas tla melauak tiknekij tiktekichiuiliskej Jehová, ijkuak techtlajtlaniliskej ma tikchiuakan itlaj tlen amo okachi techpaktis. Tikteititiskej chikauak totlaneltokilis tla tiktekichiuiliaj toTajtsin Dios maski ualeua oui yetos. Okachi miak ipati tlateochiualismej tlen techmaka Jehová uan amo nochi tlen tikpoloskej pampa tiktekichiuiliaj (Malaquías 3:10). Axkan oksepa ma timotlapouikan itech Jefté, ¿tlen okipanok iichpoch?

¿Ken tikteititiaj tikpiaj chikauak totlaneltokilis ken Jefté uan iichpoch? (Xikinmita párrafos 16, 17).

16. ¿Tlen okichi iichpoch Jefté ijkuak okimatki kichiuaskia tlen itajtsin okilui Jehová? (Xikita tlaixkopinal tlen ika peua tlamachtil).

16 Uelis iichpoch Jefté oui okitak kichiuaskia tlen itajtsin okilui Jehová. Ijkuak Jefté okijto kitemakas iichpoch amo okatka ken ijkuak Ana okijto kitemakas ikone pampa yetoskia nazareo uan tekitiskia itech tabernáculo (1 Samuel 1:11). Nazareos uelis monamiktiskiaj uan kinpiaskiaj inkoneuan, pero iichpoch Jefté yetoskia “se tlamanali tlen kitlatiaj”, nin kijtosneki nochipa kitekichiuiliskia Jehová uan amo uelis monamiktiskia nion kinpiaskia ikoneuan (Jueces 11:37-40). Ken itajtsin nin ichpochtli okatka se tlayekanki itech Israel, uelis monamiktiskia iuan akin okachi kuali telpochtli. Pero axkan yetoskia san se tlakeuali itech tabernáculo. ¿Tlen okichi nin ichpochtli? Okiteititi okachi okipatioitaya kitekichiuilis Jehová, ik non, okijto: “Notajtsin, tla yotikilui Jehová, xikchiua ijkon ken yotikilui” (Jueces 11:36). Ye amo omonamikti nion okinpixki ikoneuan pampa ijkon uelis kitekichiuilis Jehová. ¿Ken uelis tikchiuaskej ken nin ichpochtli?

Iichpoch Jefté amo omonamikti nion okinpixki ikoneuan pampa ijkon uelis kitekichiuilis Jehová.

17. (1) ¿Tlen uelis tikchiuaskej pampa tikpiaskej totlaneltokilis ken Jefté uan iichpoch? (2) ¿Tleka mitsyolchikaua tlen kijtoa Hebreos 6:10-12?

 17 Miakej telpokamej uan ichpokamej tlen kichiuaj ken Cristo, amo monamiktiaj axkan noso amo kinpiaj inkoneuan, pampa ijkon okachi kitekichiuiliskej Jehová. Noijki miakej tokniuan tlen yikipiaj xiuitl amo okachi katej iuan inkoneuan noso inmixuiuan pampa tlapaleuiaj ijkuak mochijchiua kalmej kanin tikueyichiuaj uan tiktekichiuiliaj Jehová. Noso uelis ijkon kichiuaj pampa yaskej itech Tlamachtil pampa ma tetlapouikan Tekiuajkayotl uan tetlapouiskej kanin okachi moneki. Uan oksekimej okachi tetlapouiaj ijkuak tikilnamikij iCena toTeko. ToTajtsin Dios kipaktia ijkuak tiktekichiuiliaj ika nochi toyolo. Ye amo keman kilkauas tlen kichiuaj akinmej kitlasojtlaj (xiktlajtolti Hebreos 6:10-12). Uan tejuatsin, ¿yotimokuayejyeko tlen uelis tikchiuas pampa okachi tiktekichiuilis Jehová?

¿TLEN OTIMOMACHTIJKEJ?

18, 19. (1) ¿Tlen otimomachtijkej itech Jefté uan iichpoch? (2) ¿Ken uelis tikchiuaskej ken yejuan?

18 Jefté okipixki miak ouijkayotl itech inemilis, pero nochipa okitak tlen mokuayejyekoa Jehová, achto itlaj kichiuaskia. Amo okijtlako nochi tlen amo kuali uan nochipa okatka yolmelajki maski okiyolkoko tlen oksekimej okichiuilijkej. Tlen okichijkej Jefté uan iichpoch amo san nenka, pampa Jehová okinteochi uan okintekitilti pampa kipaleuiskej tlaneltokalistli tlen melauak. Itech nonmej tonalmej miakej amo okintlakamatkej itlanauatiluan toTajtsin Dios, pero Jefté uan iichpoch kema okintlakamatkej.

19 Biblia kijtoa: “Xikchiwakah kemi kichiwah akimeh kineltokah Dios, porke ijkó nomejwah nonkiseliskeh tlan Dios yonomechsentlalili” (Hebreos 6:12). Ma tikchiuakan ken Jefté uan iichpoch, pampa tikmatij Jehová kinteochiua akinmej itech tlaneltokaj.

^ párr. 4 Salmo 106:35, 36 kijtoa: “Pero omonelojkej iuan uejueyij altepemej, uan okichijkej ken yejuan. Uan yejuan ok okintekichiuiliayaj inteotsitsiuan uan ninmej omochijkej pampa yejuan ken se mekatl tlen ika kinkitskiaj yolkamej”. Uan 106:39 kijtoa: “Uan omosokiotijkej ika tlen okichijkej, amo okatkaj yolmelajkej iixpan toTajtsin Dios ika tlen okichijkej”.

^ párr. 8 Levítico 19:17, 18 kijtoa: “Amo xikkokoli mokni itech moyolo. Moneki tikyektlalis akin iuan tika, pampa amo tikuikas itlajtlakol ken ye kiuika. Amo moneki timomakuepas nion amo xikilnamikto tlen omitschiuilijkej ikoneuan moaltepe; uan moneki titetlasojtlas ken timotlasojtla. Ne niJehová”.