Xikita nochi

Tlen kiualika

2. Biblia techpaleuia ma tikyektlalikan ouijkayotl

2. Biblia techpaleuia ma tikyektlalikan ouijkayotl

Seki ouijkayotl uejkaua miak xiuitl uan sapanoa teyolkoko maski amo san niman tikitaj techtlajyouiltia. ¿Techpaleuis Biblia ma tikyektlalikan ouijkayotl maski uejkaua uan techyolkokoa? Ma tikitakan seki tlamantli tlen kiteititia Biblia techpaleuis.

IJKUAK IKAJ SAPANOA MOTEKIPACHOA

Se siuatl tlen itoka Rosi, okijto: “Nochipa onechtekipachoaya seki ouijkayotl maski amo melauak ijkon panoskia”. ¿Tlen tlaxelolmej okipaleuijkej? Se tlen kijtoa Mateo 6:34: “Amo ximotekipachokah kenomi nontlanexiliskeh, porke mostla ok se welta nonmotekipachoskeh. Nochi tonati saman yetos itla tlan ika weletis nonmotekipachoskeh”. Ninmej tlajtolmej tlen okijto Jesús okipaleui Rosi ayakmo ma kitekipacho tlen satepan panoskia. Noijki okijto: “Yonikpiaya miak ouijkayotl uan amo itlaj ipati nimokuayejyekoskia itech okseki tlamantli tlen ayamo opanoaya uan xamo amo keman panoskia”.

Se siuatl tlen itoka Yasmín sapanoa omoyolkokoaya. Okijto: “Nochipa san onichokaya uan ualeua amo onikochiaya. Ijkon onechchiuiliaya tlen amo kuali onimokuayejyekoaya”. ¿Tlen tlaxelol okipaleui? Tlen kijtoa 1 Pedro 5:7: “Nochi tlan nomechtekipachoah, xiktlalikah imak Dios, porke Ye nomechmokuitlawia”. Yasmín noijki okijto: “Oniktlatlaujti Jehová uan onechnankili. Onikmachili onechkixtili tlen etik onikmamajtoka. Maski ualeua ok nimokuayejyekoa itech seki ouijkayotl, axkan yinikmati tlen nikchiuas”.

 IJKUAK IKAJ KIJTOA SATEPAN KICHIUAS SEKI TLAMANTLI

Se ichpochtli tlen itoka Isabella, okijto: “Nesi onikmokixti notajtsin porque ye noijki satepan kichiua seki tlamantli. Ijkuak omonekiaya itlaj nikchiuas, onikijtoaya satepan nikchiuaskia uan onikitaya televisión noso onimoseuiaya. Uan amo kuali ijkon onikchiuaya porque amo kuali onitekitiaya uan saiktlami san onikualaniaya”. Pero okipaleui tlen kijtoa 2 Timoteo 2:15: “Ximochijchikawa xikchiwa tlan kuali, ijkó weletis timoyekixpantis inawak Dios kemi se kuali tékitki non amo kipia tlan ika pinawas”. Isabella noijki okijto: “Amo oniknekiaya amo kuali ma momachili Jehová porque nochi onikchiuaya satepan”. Axkan Isabella yokipatlak iyelis.

Se siuatl tlen itoka Kelly, okijto: “Ijkuak onechmakaya se tekitl amo san niman onikchiuaya. Satepan onikchiuaya, ik non, san onikualaniaya, amo onikochiaya uan onichokaya. Non amo onechpaleuiaya”. Okipaleui tlen kijtoa Proverbios 13:16: “Akin ixtlamatki achto mokuayejyekoa tlen kichiuas pero akin xoxo kiteititia amo kuali mokuayejyekoa”. Ye okijto tlen okimachti nin tlaxelol ijkuak itech omokuayejyeko: “Omonekiaya kuali nimokuayejyekos keman uan ken nikchiuaskia seki tlamantli. Axkan nikijkuiloa tlen nikchiuas uan nechpaleuia amo ma nikchiua satepan tlen okachi moneki”.

IJKUAK IKAJ ISELTI MOMACHILIA

Se siuatl tlen itoka Cristina, okijto: “Nonamik onechkajte iuan naui nokoneuan”. ¿Tlen tlaxelol okipaleui? Tlen kijtoa Proverbios 17:17: “Se melauak toyolikni nochipa kiteititia techtlasojtla uan ye se tokni tlen kajki ijkuak timoyolkokoaj”. Cristina okinmilui iTlaixpantijkauan Jehová ma kipaleuikan. ¿Ken okipaleuijkej? Ye okijto: “Noyolikniuan onechpaleuijkej. Sekimej otechkauilitoj tlakuali uan xochitl. Eyi uelta ijkuak oksekan otichantitoj, sapanoa miakej otechpaleuikoj ne uan nokoneuan. Uan se noyolikni onechtemoli noteki. Noyolikniuan amo keman onechkajkej”.

Diana akin noijki itech yotimotlapouijkej okijto iselti omomachiliaya. Ye okilnamikiaya ijkuak sapanoa otlajyoui. Okijto: “Nesi nochtin okatkaj iuan inkalchanejkauan noso inyolikniuan pero ne onikatka noselti uan amo oniyolpakiaya”. Pero okipaleui tlen kijtoa Salmo 68:6: “ToTajtsin Dios kinmaka inkalijtik akinmej katej inselti”. Ye okijto: “Onikmatiaya non tlaxelol amo san kijtosneki Jehová techmaka se kali kanin tichantiskej. Onikajsikamatki Jehová kintekitiltia oksekimej para ma nechyolchikauakan, ma nechtlasojtlakan uan san sekan ma tiyetokan porque tiktlasojtlaj. Pero noijki onikmatiaya omonekiaya achto nimotokis itech toTajtsin Dios uan ijkon nimouikaskia iuan noyolikniuan. Ik non, Salmo 37:4 onechpaleui ma nikajsikamati non. Ompa kijtoa: ‘Xikajsi pakilistli itech Jehová uan ye mitsmakas tlen kineki moyolo’”.

Diana noijki okijto: “Onikajsikamatki omonekiaya okachi nimotokis itech Jehová porque amo onka okse ken ye. Para nimouikas iuan akinmej noijki tlaneltokaj ken ne, onikijkuilo tlen uelis san sekan tikchiuaskiaj. Onimochijchika nikitas tlen kuali kichiuaj oksekimej uan amo san nikilnamiktoskia tlen amo kuali kichiuaj”.

Akinmej kitekichiuiliaj toTajtsin Dios noijki tlajtlakolejkej. ITlaixpantijkauan Jehová noijki kipiaj ouijkayotl ken oksekimej pero tlen kijtoa Biblia kinyolinia ma kinpaleuikan oksekimej. Melauak kuali ijkon tikinpiaskej toyolikniuan. Pero ¿techpaleuis Biblia ma tikixnamikikan ouijkayotl ken kokolistli noso ijkuak ikaj miki?

Tlen kijtoa Biblia techpaleuis ma tikinmajsikan toyolikniuan tlen techajsikamatiskej