Xikita nochi

Tlen kiualika

Biblia kijtoa uelis tikchiaskej tlen kuali

Biblia kijtoa uelis tikchiaskej tlen kuali

XIMOKUAYEJYEKO tonaltsin yokalak, yotlayoak uan tinejnenti itech se ojtli kanin sapanoa tlayoa. Pero amo timomojtia porque tikuika se lámpara tlen kuali tlauia. Ijkuak titlauia ipan tlali kuali tikita tlen ompa kajki uan ijkuak titlauia ik tlayekapan tikita nochi tlen onka.

Biblia ijkon ken se lámpara. Ken yotimomachtijkej, iTlajtol toTajtsin Dios techpaleuia ma tikixnamikikan ouijkayotl tlen mojmostla tikixnamikij. Pero Biblia techiluia tlen tikpiaskej satepan uan techpaleuia ma tiakan itech ojtli tlen kichiuas nochipa ma tiyolpakikan (Salmo 119:105). ¿Ken kichiua?

Ma tikitakan ome tlamantli ken techpaleuia Biblia ma tikchiakan tlen kuali: 1 techpaleuis ma tiyolpakikan uan 2 techpaleuis nochipa ma timouikakan iuan akin otechchijchi.

1. TECHPALEUIS MA TIYOLPAKIKAN

Biblia techiluia ken tikixnamikiskej ouijkayotl pero amo san itech non tlamantli techpaleuia. Techmachtia amo san totech ma timotekipachokan, okachi kuali, noijki ma timotekipachokan intech oksekimej. Tiyolpakiskej tla ijkon tikchiuaskej.

Ximokuayejyeko itech nin tlaxelol: “Okachi yolpaki akin itlaj kitemaka uan amo akin kiselia” (Hechos 20:35TNM). ¿Tikilnamiki ijkuak ikaj otikpaleui tlen amo okipiaya tomin? ¿Se tonal otikkak se moyolikni tlen okinekiaya mitstlapouis tlen okitekipachoaya? Melauak otiyolpakik porque ikaj otikpaleui.

Okachi tiyolpakij ijkuak tiktemakaj tlen tikpiaj uan amo tikchiaj ma techkuepilikan. Se tlakatl  okijto: “Ijkuak tiktemakaj tlen tikpiaj, okachi miak tikseliaj tla tiktemakaj ika nochi toyolo uan amo tikchiaj ma techkuepilikan”. Pero tikseliaj tlaxtlauili ijkuak tikinpaleuiaj oksekimej tlen amo kipiaj ken techkuepiliskej. Se tlateochiualistli tikpaleuiaj toTajtsin Dios porque ye kita ken itlaj tiktlanetiaj ijkuak tikinpaleuiaj oksekimej (Proverbios 19:17). ToTajtsin Dios kipatioita ijkuak tikinpaleuiaj oksekimej uan kijtoa techtlaxtlauis ika yolilistli tlen amo keman tlamis itech xochitlali tlen yetos nikan tlaltikpak. ¡Sapanoa kualtsin non! (Salmo 37:29; Lucas 14:12-14). *

Biblia techiluia tla tiknekij melauak tiyolpakiskej, moneki tikueyichiuaskej san Jehová akin melauak toTajtsin Dios. ITlajtol techiluia ma tikueyichiuakan, ma tiktlakaitakan uan ma tiktlakamatikan porque san ye kinamiki (Eclesiastés 12:13; Apocalipsis 4:11). Tla ijkon tikchiuaskej, tikyolpaktiskej toTajtsin Dios akin otechchijchi. Uan ye techiluia: “Nokone xiyeto ixtlamatki uan techyolpakti” (Proverbios 27:11). Tikyolpaktiaj toTajtsin Dios ijkuak itlaj tikpejpenaj timoyekanaj ika tlen kijtoa Biblia. ¿Tleka? Porque ye kineki techpaleuis ma tiktlakamatikan uan kuali ma tiyetokan (Isaías 48:17, 18). Okachi kuali tikpiaskej tonemilis tla tikueyichiuaskej uan tikyolpaktiskej akin Ueyi Tekiua itech nochi semanauak.

2. TECHPALEUIS MA TIMOUIKAKAN IUAN AKIN OTECHCHIJCHI

Biblia noijki techiluia ken timouikaskej iuan akin otechchijchi. Kijtoa: “Xiwalmijkuanikah inawak Dios, iwa Ye mijkuanis [noso motokis] nomonawak” (Santiago 4:8). Xamo oui tikneltokaskej uelis timouikaskej iuan akin okichijchi nochi tlen onka uan kipia sapanoa miak chikaualistli. Pero Biblia techiluia tla tiktemoskej toTajtsin Dios, itech timotokiskej porque ye “amo wejka kajki de tejwah tinochteh” (Hechos 17:27). Tla tikchiuaskej ken kijtoa Biblia uan timouikaskej iuan toTajtsin Dios, yetoskia ken timoyektlalijtokej para satepan tikseliskej miak tlamantli. ¿Tleka?

Ximokuayejyeko itech nin tlamantli: maski sapanoa timochijchikauaskej amo ikaj uelis kichiuas amo ma timikikan (1 Corintios 15:26). Pero toTajtsin Dios nochipa yolitok. Amo keman mikis uan kineki nochipa ma yoltokan iyolikniuan. Ika ninmej kuajkualtsitsintin tlajtolmej toTajtsin Dios kijtoa tlen kineki para akinmej itech motokiaj: “Nochipa xiyolpakikan” (Salmo 22:26).

¿Ken timouikas iuan toTajtsin Dios? Ximomachti Biblia (Juan 17:3; 2 Timoteo 3:16). Xiktlatlaujti ma mitspaleui xikajsikamati iTlajtol. Biblia kijtoa ye techmakas ixtlamatilistli tla tiktlajtlaniliaj ika nochi toyolo * (Santiago 1:5). Uan noijki ximochijchikaua xikchiua tlen timomachtia, ijkon Biblia yetos ken se “lámpara” tlen mitstlauilis kanin tinejnemis uan se “tlauili” para moojui tlen nochipa ijkon mitstlauilijtos (Salmo 119:105).

^ párr. 8 Tla tikneki tikmatis okachi ken okijto toTajtsin Dios tiyoltoskej itech xochitlali, xikita nin amochtli itech tlamachtil 3, ¿Tlen melauak tlamachtia Biblia?, tlen kichijchiuaj iTlaixpantijkauan Jehová.

^ párr. 13 ITlaixpantijkauan Jehová uelis mitsmachtiskej xikajsikamati Biblia uan amo itlaj tiktlaxtlauas. Tla tikneki tikmatis ken tlamachtiaj, xikita video ¿Ken tikchiuaj se tlamachtil ika Biblia? Tikajsis itech www.jw.org/ncx, xikalaki kanin kijtoa AMATLAJKUILOLMEJ > VIDEOS.

ToTajtsin Dios nochipa yoltok uan kineki nochipa ma yoltokan iyolikniuan