Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok  |  número 1 de 2016

 BIBLIA OKINPATILI INNEMILIS

“San se xiuitl ma niyolpaki uan kuali ma nimomachili”

“San se xiuitl ma niyolpaki uan kuali ma nimomachili”
  • ONESKI ITECH XIUITL: 1971

  • UEYI ALTEPETL: FRANCIA

  • OKSEKI TLAMANTLI: ONIAUILNEMIAYA, ONITLACHTEKIAYA, ONIMOTEUIAYA UAN ONIKINTEKITILTIAYA DROGAS

TLEN ONIKCHIUAYA.

Otichantiayaj itech altepetl Tellancourt, tlen omokauaya ik noroeste itech ueyi altepetl Francia. Notajtsin oneski itech ueyi altepetl Francia, uan nonantsin itech ueyi altepetl Italia. Ijkuak onikpiaya chikueyi xiuitl, otichantitoj itech ueyi altepetl Italia, otimokajkej ik Roma, kanin nochtin chikauak tekitij. Nokalchanejkauan amo oyolpakiayaj, pampa notatajuan nochipa omokualaniayaj pampa amo okipiayaj tomin.

Ijkuak onikpiaya 15 xiuitl, nonantsin onechilui okachi ma nikisa pampa uelis nimouikaskia iuan oksekimej. Satepan ayakmo okachi onikatka nokalijtik uan opejki nimouika iuan akinmej okichiuayaj tlen amo kuali. Se tonal notech omotoki se tlakatl tlen omotaya yolkuali. Onikinseli drogas tlen onechmakak, pampa oniknekiaya ma mota yonimoskalti. San niman opejki niktekitiltia drogas uan opejki niauilnemi. Miak uelta onechchiualtijkej ma niauilnemi. Ayakmo onikpatioitaya noyolilis. Onikmachiliaya noselti onikatka. Ijkuak onikpiaya 16 xiuitl, oniknekiaya nimomiktis, onikonik miak whisky uan oniktlami se botella satepan onimokajka ijtik atl. Eyi tonal onikatka hospital uan amo itlaj onikmatiaya.

Opejki nikpatioita noyolilis, pero san iuan akin onimoteuiaya. Onikinmiluiaya kox okinekiayaj ma tiauilnemikan, pero ijkuak oniajsiaya inkalijtik onikinmakaya drogas uan onikinmichtekiliaya nochi tlen okipiayaj. Akinmej okinemakayaj drogas onechtlakejkej ma nikxexelo drogas itech nochi ueyi altepetl Italia. Policías nochipa onechkitskiayaj. Maski onikchiuaya miak tlamantli amo kuali, onikmatiaya itlaj omonekiaya nikchiuas. Ik non, oniktlatlaujti toTajtsin Dios: “San se xiuitl ma niyolpaki uan kuali ma nimomachili”.

BIBLIA OKIPATLAK NONEMILIS.

Ijkuak onikpiaya 24 xiuitl onichantito itech ueyi altepetl Inglaterra. Uelis nimikiskia pampa akinmej okinemakayaj drogas okinekiayaj nechmiktiskej. Achto niaskia Inglaterra oniktlajpaloto nonantsin uan onechtlajtlachialti nikitas se tlakatl tlen itoka Annunziato Lugarà  okitlapouijtoka nonantsin itech Biblia. * Onikmatiaya ye otlachtekiaya, onimomojti uan onikilui tleka ompa okatka. Onechilui nochi tlen okipatlak pampa uelis mochiuaskia iTlaixpantijka Jehová, iuan onimoka ijkuak niajsiskia Inglaterra, nikintemoskia iTlaixpantijkauan Jehová. Maski otimokajkej, ijkuak oniajsito inglaterra ok onikchiuaya tlen amo kuali.

Se tonal itech se ueyi ojtli itech ueyi altepetl Londres onikitak se iTlaixpantijka Jehová okintemakatoka revistas Akin Tetlapouijtok uan ¡Despertad! Ijkuakon onikilnamik tlen onimoka nikchiuas, uan onikilui kox uelis nimomachtis Biblia.

Tlen onechmachtijkej sapanoa onechtlajtlachialti. Se neskayotl, onechtlajtlachialti tlen toTajtsin Dios kijtoa itech 1 Juan 1:9, ompa kijtoa: “Pero tla tikinmokuitiah totlajtlakolwah, inawak Totajtsi Dios, Ye ke n yekmilajka, techtlapojpolwis iwa techchipawas de nochi totlajtlakolwah”. Ninmej tlajtolmej okipatlakej nonemilis, pampa onikmachiliaya sapanoa amo kuali nochi tlen onikchi. San niman opejki nimonechikoa iuan iTlaixpantijkauan Jehová, yejuan kuali onechselijkej. Ijkuak onikitak kuali mouikaj uan sapanoa motlasojtlaj, itlaj tlen oniknekiaya, oniknek noijki nipouis itech non nechikol, itech non kalchanejke.

Amo oui nikkauas drogas iuan ayakmo niauilnemis, pero oui nikpatlas nonemilis. Onikitak omonekiaya nitetlakaitas uan nitetlasojtlas. Uan axkan ok nimochijchikaua pampa nikpatlas seki tlamantli itech nonemilis. Pero niktlasojkamatilia Jehová pampa yonikpatlak miak tlamantli. Itech xiuitl 1997, chikuase metstli satepan ijkuak opejki nimomachtia Biblia, onimoapolakti uan onimochi iTlaixpantijka Jehová.

TLATEOCHIUALISTLI TLEN YONIKSELI.

Seki kauitl satepan onimonamikti iuan se ichpochtli tlen itoka Barbara, ye noijki yikin omochi iTlaixpantijka Jehová. Se noyolikni noijki opejki momachtia Biblia ijkuak okitak ken onikpatlak nonemilis. Axkan ye uan iuelti noijki tokniuan. Uan noijki ijkon okichi iikni nositsin; yokipiaya kanaj 80 xiuitl ijkuak opejki momachtia Biblia uan satepan omoapolakti.

Axkan nitlayekana itech tlanechikol, iuan nosiua sejse metstli titetlapouiaj 70 horas itech ueyi altepetl Londres, tikintlapouiaj akinmej tlajtoaj italiano. Ualeua nimoyolkokoa ijkuak nikilnamiki nochi tlen achto onikchiuaya, pero nosiua nochipa nechyolchikaua. Axkan nikpia tlen oniknekiaya: se kuali kalchanejke uan noTajtsin akin sapanoa nechtlasojtla. Oniktlatlaujti toTajtsin Dios san se xiuitl ma niyolpaki uan kuali ma nimomachili, pero yonechmakak miak xiuitl.

Axkan nikpia tlen oniknekiaya: se kuali kalchanejke uan noTajtsin akin sapanoa nechtlasojtla.

^ párr. 10 Itech revista La Atalaya (ika náhuatl del centro Akin Tetlapouijtok) 1 de julio 2014, páginas 8, 9 xiktlajtolti ineskayo Annunziato Lugarà, non tlamachtil itoka “La Biblia les cambió la vida: No iba a ningún lado sin mi arma”.