Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok  |  número 1 de 2016

 TLAMACHTIL TLEN IKA PEUA

¿Ayakmo ikaj kichiua tlen kuali?

¿Ayakmo ikaj kichiua tlen kuali?

Hitoshi tekiti kanin kipoaj tomin itech se ueyi kali itech ueyi altepetl Japón. Se tonal ijkuak okipojtoka tomin, akin okiyekanaya okilui amo kuali ma kitlali seki tlamantli. Pero Hitoshi okilui amo uelis kichiuas pampa tlen okineltokaya. Ijkuakon okiluijkej kikixtiskiaj itech iteki, uan ijkon okipanok.

Seki metstli satepan, Hitoshi sapanoa omoyolkoko pampa amo okajsiaya tekitl kanin kikauiliskiaj ma kichiua tlen kuali. Se neskayotl, ijkuak okitemoto tekitl okijto ye amo keman tlakajkayauaskia itech iteki. Akin iuan omotlapouijtoka okilui: “¡Amo kuali tlen timokuayejyekoa!”. Ikalchanejkauan uan iyolikniuan okiluiayaj amo ma sotlaua, pero ye omokuayejyekoaya kox kuali okatka nochipa ma kijto tlen kuali. Uan ye kijtoa: “Onimokuayejyekoaya kox kuali okatka ma nikijto tlen nikneltoka”.

Tlen okipanok Hitoshi techmachtia axkan miakej amo kitlakaitaj ma tikchiuakan tlen kuali. Uan oksekimej kitaj ken itlaj amo kuali, uan okachi ijkuak tlanemakaj. Itech ueyi altepetl Sudáfrica, se siuatl okijto: “Kanin nitekiti miakej tlakajkayauaj. Uan miakej kinekij noijki ijkon ma nikchiua”.

Axkan sapanoa miakej tlakajkayauaj. Se doctor tlen itoka Robert Feldman, se psicólogo tlen tekiti itech Universidad de Massachusetts, omomachti uan okitak kanaj 60 tlaltikpaktlakamej itech 100, kanaj 10 uelta tlakajkayauaj ijkuak motlapouijtokej kanaj 10 minutos. Nin tlakatl kijtoa: “Sapanoa otechtlajtlachialti tlen otikitakej. Pampa amo otimokuayejyekoayaj tlaltikpaktlakamej sapanoa tlakajkayauaj”. ¿Tleka miakej tlakajkayauaj maski amo kinpaktia ma kinkajkayauakan?

¿Tleka axkan miakej tlakajkayauaj, tlachtekij uan kichiuaj tlen amo kuali? ¿Ken teijtlakoa ijkuak kichiuaj tlen amo kuali? Uan, ¿tlen uelis techpaleuis pampa nochipa tikchiuaskej tlen kuali?