Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok  |  número 1 de 2016

 TLAMACHTIL TLEN IKA PEUA | ¿AYAKMO IKAJ KICHIUA TLEN KUALI?

Miak ipati ma tikchiuakan tlen kuali

Miak ipati ma tikchiuakan tlen kuali

“Tejwah kuali tikmatokeh amitla tlajtlákoli tikpiah, porke tiknekih tikchiwaskeh nochi tlan kuali” (Hebreos 13:18).

Itech Biblia tlajtoli tlen motlajtolkuepa “tikchiwaskeh nochi tlan kuali” kijtosneki ijkuak tikchiuaj tlen kuali ika nochi toyolo. Noijki kijtosneki itlaj tlen sapanoa kuali uan kualtsin.

Akinmej kichiuaj ken Cristo melauak kinekij kichiuaskej tlen tlatitlanil Pablo okijto: “Tiknekih tikchiwaskeh nochi tlan kuali”. ¿Tlen kijtosneki tlen okijto?

TLEN NOCHIPA TIKNEKIJ TIKCHIUASKEJ

Achto tikisaskej tinochtin timotaj itech teskatl. ¿Tleka? Pampa tiknekij kuali ma techitakan. Pero onka okseki tlamantli tlen okachi ipati. Tonemilis uelis kichiuas kuali noso amo kuali ma techitakan.

Biblia kijtoa tinochtin tiknekij tikchiuaskej tlen amo kuali. Itech Génesis 8:21 Jehová kijtoa: “Tlen mokuayejyekoa uan kineki iyolo tlakatl nochipa amo kuali”. Tla tiknekij tikchiuaskej tlen kuali, moneki timochijchikauaskej pampa toyolo okse tlamantli kineki kichiuas. Tlatitlanil Pablo kuali okiyekijto ken omochijchikauaya pampa kichiuas tlen kuali: “Ijtik noyolo nechpaktia itlanawatil Dios, pero noiwa nikita noijtik onka ok se tlanawatílistli, ye tlan nechyoltilana manitlatlajkolchiwa, non kixnamiki notlalnamikilis, ye ichikawalis n tlajtlákoli non kajki noijtik iwa nechilpijtok” (Romanos 7:22, 23).

Se neskayotl, tla techpanoa itlaj kanin tiknekiskej titlakajkayauaskej, amo ijkon ma tikchiuakan, pampa tejuan tikpejpenaj tlen tikchiuaj. Amo technauatia tlajtlakoli, tejuan uelis tikijtoskej kox tikchiuaskej tlen kuali noso amo. Ijkuak tikixtopeuaj tlen amo kuali timokuayejyekoaj, tikpejpenaj tikchiuaskej tlen kuali maski amo nochtin kichiuaj.

UELIS TIKCHIUASKEJ TLEN KUALI

Uelis tikchiuaskej tlen kuali tla tejuan ijkon tiknekij. Miakej tlaltikpaktlakamej okachi kipatioitaj kuali ma kinmitakan maski amo kichiuaskej tlen kuali. Uan kijtoaj kuali tlen kichiuaj maski tlakajkayauaj, pampa non kinpaleuia. Amochtli The (Honest) Truth About Dishonesty kijtoa: “Uelis tikijtoskej titlakajkayauaj kech uelis pampa ok tikneltokaskej tikchijtokej tlen kuali”. Pero ¿tlen techpaleuis ma tikajsikamatikan amo kuali ma titlakajkayauakan?

Sapanoa miakej tlaltikpaktlakamej yokajsikamatkej Biblia kuali kinyekana. Biblia kipia seki tlanauatilmej tlen melauak miak inpati (Salmo 19:7). Kuali tlapaleuia itech nochi tlamantli ken itech tokalchanejkauan, toteki, tonemilis uan ken timouikaj iuan toTajtsin Dios. Uan tlen kijtoa ok techpaleuia. Itlanauatiluan kinpaleuia nochtin tlaltikpaktlakamej, maski san kanin chantij uan san tlen kineltokaj. Tla tiktlajtoltiaj Biblia, itech timokuayejyekoaj  uan tikchiuaj, ika nochi toyolo tiknekiskej tikchiuaskej tlen kuali.

Pero ken axkan nochtin kichiuaj tlen amo kuali uan noijki kinekij ijkon ma tikchiuakan, amo san moneki tikixmatiskej Biblia pampa tikchiuaskej tlen kuali. Pampa uelis tikchiuaskej tlen kuali moneki ma tiktlatlaujtikan Jehová ma techpaleui uan ijkon tikchiuaskej tlen kuali (Filipenses 4:6, 7, 13). Ijkuakon nochipa tiknekiskej tikchiuaskej tlen kuali.

TLATEOCHIUALISMEJ

Hitoshi tlen itech otimotlapouijkej kijtoa, pampa okixmatkej ye okinekiaya nochipa kichiuas tlen kuali, satepan se tlakatl akin kinpatioita akinmej kichiuaj tlen kuali, okitlake iuan ma tekiti. Hitoshi kijtoa: “Sapanoa niyolpaki. Pampa axkan nikpia se tekitl kanin nikchiua tlen kuali uan amo itlaj nechtekipachoa”.

Oksekimej noijki ijkon kinpanoa. Ximokuayejyeko tlen okinpanok sekimej tlaltikpaktlakamej akinmej nochipa okinekiayaj kichiuaskej tlen kuali.

  • Amo itlaj techtekipachoa

    “Ijkuak onikpiaya 13 xiuitl ayakmo onia escuela pampa opejki nitekiti iuan akinmej otlachtekiayaj. Nochi tomin tlen onikpiaya oniktlanki pampa onitlachtekiaya. Satepan onimonamikti, nonamik iuan ne otipejkej timomachtiaj iuan iTlaixpantijkauan Jehová. Otikmatkej Jehová * amo kipaktia ma titlachtekikan, uan non okipatlak nochi tonemilis (Proverbios 6:16-19). Itech xiuitl 1990 otimoapolaktijkej uan otimochijkej iTlaixpantijkauan Jehová.

    “Achto itech nokalijtik onikinpiaya miak tlamantli tlen onikinmichtek, pero axkan ayakmo. Axkan nikchiua tlen kuali, uan ayakmo itlaj nechtekipachoa. Ijkuak nimokuayejyekoa itech nochi xiuitl ijkuak onitlachtekiaya, niktlasojkamatilia Jehová pampa onechiknoma. Sapanoa niyolpaki ijkuak nikochi pampa nikmati nikyolpaktia Jehová” (Cheryl, Irlanda).

    “Ijkuak akin niktekichiuilia okimatki amo onikseli seki tomin tlen onechmakayaj pampa ma nitlakajkayaua, ye okijto: ‘MoTajtsin Dios okichi motech ma titlaneltokakan. Sapanoa tiyolpakij pampa nikan titekiti’. Nikchiuas tlen kuali nechpaleuia amo itlaj ma nechtekipacho iixpan Jehová. Uan noijki ueli nikinpaleuia nokalchanejkauan uan oksekimej ma kichiuakan tlen kuali” (Sonny, Hong Kong).

  • Yolseuilistli

    “Nitlapaleuia itech se banco tlen kajki itech nochi Tlaltikpak. Itech nin tekitl miakej tlakajkayauaj pampa uelis kitlaniskej okachi tomin. Miakej kijtoaj: ‘¿Tleka amo uelis titlakajkayauaskej pampa tikpiaskej okachi tomin?’. Pero nikpia yolseuilistli pampa nikchiua tlen kuali. Uan nikneki nochipa ijkon nikchiuas maski san tlen tlamantli panos. Akinmej nikintekichiuilia kimatij amo keman nitlakajkayauas, nion yejuan amo keman nikinkajkayauas” (Tom, Estados Unidos).

  • Tlakaitalistli

    “Akin otlayekanaya kanin nitekiti onechilui ma nitlakajkayaua itech seki tlamantli tlen okichtekej, pero amo onikchi. Ijkuak okimatkej akinmej otlachtekej, akin oniktekichiuiliaya onechtlasojkamatili pampa amo onitlakajkaya. Moneki yolchikaualistli pampa tikchiuaskej tlen kuali. Pero satepan, nochtin totech tlaneltokaj uan techtlakaitaj” (Kaori, Japón).

Pampa tikchiuaj tlen kuali amo itlaj techtekipachoa, tikpiaj yolseuilistli uan techtlakaitaj. Melauak miak ipati ma tikchiuakan tlen kuali.

^ párr. 18 Biblia kijtoa toTajtsin Dios itoka Jehová.