Nin Biblia kinpia tlajtolmej ika náhuatl del centro tlen miakej kajsikamatij. Tla se tlajtoli amo kajsikamatij itech seki altepemej, katej notas ika okseki tlajtolmej para makajsikamatikan.

Mopatlaj seki letras. Itech seki altepemej tlajtouaj ika “b” uan amo ika “u”. Xikita ken moijtoua seki tlajtolmej uan tla titlajtoua ika “b”, uelis tikijtos ika non letra:

moyolkokoua (moyolkokoba)

xikchiua (xikchiba)

xiuia (xibia)

Noijki itech seki altepemej tlajtouaj ika “g” uan amo ika “k”. Xikita ken moijtoua seki tlajtolmej uan tla titlajtoua ika “g”, uelis tikijtos ika non letra:

amikaj (amigaj)

tekoli (tegoli)

tlakamej (tlagamej)

Náhuatl reverencial. Itech seki altepemej kinmijtouaj okseki tlajtolmej para okachi tetlakaitaskej. Sekimej amo kijtouaj “omiki” kijtouaj “omomikili”, “oixpoliuik”, “oixpoliuilok”. Noijki amo kijtouaj “xitlakua” kijtouaj “ximotlakualtijtsino”, “ximotlamajseuilo”, “xontlakua”. Ijkuak tiktlajtoltis moBiblia, xikpatla seki tlajtolmej para kuali mamokaki itech moaltepe.

Tlajtolkotonaj. Itech seki altepemej kinkotonaj tlajtolmej, sekimej amo kijtouaj “kuali kajki” san kijtouaj “kuali ka”. Amo kijtouaj “onamechmakakej” san kijtouaj “omechmakakej”. Amo kijtouaj “namechxexelos” san kijtouaj “mechxelos”. Ijkuak tiktlajtoltis moBiblia, xikinkotona tlajtolmej tla moneki.

Ken tlamij seki tlajtolmej. Itech nin Biblia mopatlaj seki letras kanin tlamij tlajtolmej. Sekimej kijtouaj “sitlaltin”, “sitlalimej”, “sitlaltej”. Noijki kijtouaj “atekochtin”, “atekochmej”, “atekochtej”. Ijkuak tiktlajtoltis moBiblia, xikpejpena ken tlamij seki tlajtolmej para kuali mamokaki kanin tichanti.

Tlajtolmej ika español. Xamo timotlajtlania tleka seki tlajtolmej katej ika español tla itech moaltepe nankijtouaj ika náhuatl. Seki tlajtoli omoka ika español porque itech seki altepemej kijtosneki itlaj amo kuali. Ejemplos: 1) Tlajtoli semilla itech seki altepemej kijtouaj “xinachtli”, pero itech okseki altepemej tlajtoli “xinachtli” kijtosneki semen. 2) Tlajtoli conejo itech seki altepemej kijtouaj “tochi” noso “tochtli” pero itech okseki altepemej ninmej tlajtolmej kijtosneki inmaxak siuamej. Tlajtolmej ken ninmej omokajkej ika español para amo makualanikan akinmej okse tlamantli kajsikamatij.

Noijki seki tlajtoli omoka ika español porque miakej ijkon yikijtouaj. Ejemplos: 1) Tlajtoli libro itech seki altepemej kijtouaj “amochtli” pero omoka ika español porque okachi miakej yikijtouaj libro. 2) Tlajtolmej mi padre uan mi madre itech seki altepemej kijtouaj “notajtsin” uan “nonantsin” pero okachi miakej yikijtouaj nopapa uan nomama. Ijkuak tiktlajtoltis moBiblia, xikijto ika náhuatl tlajtolmej tlen katej ika español tla kanin tichanti kuali moajsikamati.

Ika ninmej ejemplos mota ken mopatla totlajtol itech nochi altepemej kanin tlajtouaj náhuatl del centro. Tejuan tiknekij xitlajto ken tlajtouaj itech moaltepe. Tla moneki, xikpatla seki tlajtolmej para okachi kuali mamoajsikamati kanin tichanti. Ijkon iTlajtol toTajtsin Dios ajsis namoyolipan (1 Tesalonicenses 2:13).