Carta para Romanos 10:1-21
10 Nokniuan, niktlatlaujtia toTajtsin Dios uan ika nochi noyolo nikneki yejuan mamomakixtikan.
2 Porque yejuan mochijchikauaj kitekichiuiliskej toTajtsin Dios pero amo kuali kixmatij.
3 Yejuan amo kimatij tlen toTajtsin Dios kita kuali. Kichiuaj tlen yejuan kitaj kuali ikinon amo kichiuaj tlen toTajtsin Dios kita kuali.
4 Cristo okipojpoloko iTlanauatil Moisés. Ijkon toTajtsin Dios kinmitas yolkualmej akinmej tlaneltokaskej.
5 Moisés okijto yoltos akin kichiuas tlen kuali ijkon ken kijtoua Tlanauatil.
6 Pero iTlajtol toTajtsin Dios noijki kijtoua kitaskej yolkuali akin tlaneltoka. Kijtoua: “Amo xikmolui: ‘¿Akin tlejkos iluikak?’. Nin kijtosneki kitemouiti Cristo.
7 Noijki amo xikijto: ‘¿Akin temos kanin tlauejkatlan?’. Nin kijtosneki kinotsati Cristo kanin toktokej akinmej yoixpolikej”.
8 Pero ¿tlen kijtoua iTlajtol toTajtsin Dios? “ITlajtol toTajtsin Dios kajki monauak, kajki mokamak uan moyolipan”. Nin tlajtoli tiktematiltiaj para oksekimej matlaneltokakan.
9 Timomakixtis tla ika mokamak tiktematiltis Jesús ye toTeko uan tla ika nochi moyolo tikteititis tikneltoka toTajtsin Dios okiyoliti.
10 Para tiyetos tiyolkuali moneki titlaneltokas ika nochi moyolo. Noijki para timomakixtis moneki tiktematiltis ika mokamak nin tlajtoli.
11 ITlajtol toTajtsin Dios kijtoua: “Amo mopinatis akin kineltokas”.
12 Nochtin kipiaj san se inTeko maski judíos noso griegos. Ye kinteochiua nochtin akinmej kinotsaj.
13 Porque “momakixtis akin kinotsa Jehová ika itoka”.
14 Pero ¿ken kinotsaskej tla amo kineltokaj? ¿Ken kineltokaskej tla amikaj kinmiluia akin ye? ¿Ken kimatiskej tla amikaj tetlapouia?
15 ¿Ken tetlapouiskej tla amikaj kintitlani? Ijkon ken kijtoua iTlajtol toTajtsin Dios: “¡Kuajkualtsitsintin inmikxiuan akinmej tetlapouiaj kuali tlajtoli!”.
16 Pero amo nochtin okinekej kikakiskej kuali tlajtoli ikinon Isaías okijto: “Jehová, ¿akin kineltoka tlen tikijtouaj?”.
17 Se tlakatl tlaneltoka ijkuak kikaki tlen kiluiaj uan kikaki tlen kiluiaj ijkuak kimatiltiaj akin Cristo.
18 Pero ne namechtlajtlania: ¿amo okikakej? Kema, porque “omokak ipan nochi tlaltikpak uan uejka omotematilti itlajtol”.
19 Noijki namechtlajtlania: ¿amo okimatkej akinmej ochantiayaj Israel? Moisés okijto: “Nikchiuas mamoxikokan porque itech noaltepe yetoskej akinmej amo israelitas. Nikchiuas makualanikan porque itech noaltepe pouiskej akinmej amo ixtlamatkej”.
20 Isaías okatka yolchikauak uan okijto: “Onechajsikej akinmej amo onechtemouayaj. Onechixmatkej akinmej amo otlajtlaniayaj akin ne”.
21 Pero ye okijto itech Israel: “Nochipa onikinnotski akinmej pouij itech se altepetl tlen amo otetlakamatkej* uan oyoltlakuauakej”.
Notas
^ Noso “otlauelkakej”.
