Tlen okijkuilo Marcos 4:1-41
-
NESKAYOMEJ TLEN TLAJTOUAJ ITECH TEKIUAJKAYOTL (1-34)
-
Se tlakatl otokato (1-9)
-
¿Tleka Jesús otlamachtiaya ika neskayomej? (10-12)
-
Jesús okijto tlen kijtosneki ineskayo tlakatl tlen otokato (13-20)
-
“Amikaj kikixtia se tlauili uan satepan kitsakua ika se chikiuitl” (21-23)
-
“Tla miak nankitemakaskej, noijki miak nankiseliskej” (24, 25)
-
Tlakatl tlen otokato okochki (26-29)
-
Iyolo mostaza (30-32)
-
Jesús otlamachti ika neskayomej (33, 34)
-
-
Jesús okitlakaualti ejekakiauitl (35-41)
4 Jesús oksepa opejki tlamachtia itempa mar. Miakej ompa oajsitoj ikinon ye otlejkok itech se barco, ompa omotlali uan tepitsin uejka oyajki. Pero akinmej oajsitoj omokajkej itempa mar.
2 Ye opejki kinmachtia miak tlamantli ika neskayomej.* Ijkuak okinmachtiaya okinmiluiaya:
3 “Se tlakatl otokato.*
4 Ijkuak otokaya,* seki semilla ouetski itempa ojtli uan totomej okikuajkej.
5 Okseki semilla ouetski kanin teyo* uan ompa amo okatka miak tlali. San niman oixuak porque amo uejkatlan otoktoka.
6 Pero ouaki porque otonaltlatlak uan amo uejkatlan omoneluayoti.
7 Okseki semilla ouetski ijtik uitsyo, pero omoskalti uitsyo uan okipacho ikinon amo otlaki.*
8 Okseki semilla ouetski ipan kuali tlali. Oixuak, omoskalti uan opejki tlaki.* Seki semilla okitemakak 30, okseki okitemakak 60 uan okseki okitemakak 100”.
9 Noijki okinmilui: “Mayektlakaki akin kineki tlakakis”.
10 Ijkuak Jesús okatka iselti, 12 ápostoles uan oksekimej discípulos okitlajtlanijkej tlen kijtosnekij neskayomej* tlen okinmilui.
11 Ye okinnankili: “Namejuan namechkauiliaj xikajsikamatikan itlaj santo tlen amo omomatiaya itech iTekiuajkayo toTajtsin Dios. Pero oksekimej nikinmachtia ika neskayomej.*
12 Porque maski tlachiaj amitlaj kitaskej uan maski tlakakij amitlaj kajsikamatiskej. Ikinon amo keman moyolkopaskej uan amo kintlapojpoluis toTajtsin Dios”.
13 Noijki okinmilui: “¿Ken nankinmajsikamatiskej okseki neskayomej* tla nin amo nankajsikamatij?”.
14 “Tlakatl tlen toka ye akin tetlapouia iTlajtol toTajtsin Dios.
15 Semilla tlen ouetski itempa ojtli kijtosneki akinmej kikakij iTlajtol toTajtsin Dios. Pero san niman uits Satanás uan kiuiuitla non tlajtoli tlen omotokak inyolipan.
16 Semilla tlen ouetski kanin teyo,* kijtosneki akinmej kikakij iTlajtol toTajtsin Dios uan san niman kineltokaj ika pakilistli.
17 Pero amo uejkika tlaneltokaj porque amo uejkatlan omoneluayoti tlajtoli. Ayakmo tlaneltokaj ijkuak kixnamikij ouijkayotl nion ijkuak kintlajyouiltiaj por iTlajtol toTajtsin Dios.
18 Okseki semilla tlen ouetski ijtik uitsyo kijtosneki akinmej kikakij iTlajtol toTajtsin Dios.
19 Pero okachi kintekipachoua tlen axkan onka. Noijki moixkajkayauaj ika ichikaualis tomin uan kixnekij okseki tlamantli, ikinon non tlamantli kipachoua iTlajtol toTajtsin Dios uan amo kitemaka tlakilotl.
20 Saiktlami, semilla tlen ouetski ipan kuali tlali kijtosneki akinmej kikakij iTlajtol toTajtsin Dios uan kiseliaj ika pakilistli. Seki semilla okitemakak 30, okseki okitemakak 60 uan okseki okitemakak 100”.
21 Noijki okinmilui: “Amikaj kikixtia se tlauili uan satepan kitsakua ika se chikiuitl* noso kitlalia tlatlampa kanin kochi. ¿Amo kitlalia kanin uelis tlauis?
22 Porque monextis nochi tlen tlatitok uan momatis nochi tlen kuali tlatitok.
23 Mayektlakaki akin kineki tlakakis”.
24 Satepan Jesús okinmilui: “Kuali xikkakikan tlen namechiluia. Tla miak nankitemakaskej, noijki miak nankiseliskej noso okachi nankiseliskej.
25 Porque akin itlaj kipia okachi kimakaskej. Pero akin amitlaj kipia kikixtiliskej nochi tlen kipia”.
26 Noijki okinmilui: “ITekiuajkayo toTajtsin Dios yetoskia ken se tlakatl tlen kitoka* semilla.
27 Tlakatl kochi youak uan meua ijkuak tlanesi. Ijkuak kochi, semilla ixua uan moskaltia maski ye amo kimati ken panoua.
28 Tlali kipaleuia tlatoktli mamoskalti. Achto moxijyotia, satepan miauati uan saiktlami chikaua.
29 Ijkuak tlatoktli yochikauak, tlakatl kiteki porque yoajsik tonal kololos”.
30 Noijki okijto: “¿Ken uelis tikneskayotiskej iTekiuajkayo toTajtsin Dios? Noso ¿ika tlen neskayotl* uelis tikyekijtoskej?
31 Yetoskia ken iyolo mostaza. Ijkuak kitokaj* nin semilla, okachi tsikitsin amo ken okseki semilla tlen onka itech tlaltikpak.
32 Pero ijkuak yokitokakej,* moskaltia uan mochiua ueyi kouitl. Imamayo uejueyij moskaltia uan totomej ompa mochantiaj porque kimekauilia”.
33 Jesús okijtouaya miakej neskayomej* ken ninmej ijkuak otetlapouiaya. Okijtouaya tlen oksekimej kajsikamatiskiaj.
34 Ye nochipa otetlapouiaya ika neskayomej.* Pero idiscípulos amo okintlapouiaya ika neskayomej.*
35 Non tonal ijkuak yotlayouaskia, Jesús okinmilui idiscípulos: “Matiakan okse lado itempa mar”.
36 Idiscípulos okinmiluijkej mayakan akinmej ompa okatkaj uan yejuan san niman okiuikakej itech barco. Noijki inuan oyajkej okseki barcos.
37 San niman opejki chikauak ejekakiaui uan atl okitlauitekiaya barco uan yoatemiskia.
38 Pero Jesús okochtoka tlakuitlapan uan omotsompalti.* Discípulos okijxititoj uan okiluijkej: “Tlamachti, techpaleui tlamo timikiskej”.
39 Jesús omejki, okitlakaualti ejekatl uan okilui mar: “¡Ximoketsa uan san xieto!”. Ijkuakon ayakmo oejekak uan nochi san otlamoka.
40 Jesús okinmilui: “¿Tleka nanmomojtiaj? ¿Ayamo nantlaneltokaj?”.
41 Discípulos omomojtijkej uan okimoluiayaj: “¿Akin nin tlakatl? Hasta ejekatl uan mar kichiuaj tlen ye kijtoua”.
Notas
^ Noso “ejemplos”.
^ Noso “otlaxinito”.
^ Noso “otlaxiniaya”.
^ Noso “tepejxio”.
^ Noso “otlamochi”, “otlapankis”.
^ Noso “tlamochiua”, “tlapankisa”.
^ Noso “ejemplos”.
^ Noso “ejemplos”.
^ Noso “ejemplos”.
^ Noso “tepejxio”.
^ Nin chikiuitl ika otlatamachiuayaj.
^ Noso “kixinia”.
^ Noso “ejemplo”.
^ Noso “kixiniaj”.
^ Noso “yokixinijkej”.
^ Noso “ejemplos”.
^ Noso “ejemplos”.
^ Noso “ejemplos”.
^ Noso “omokpalti”, “omotlapechti”.
