Tlen okijkuilo Lucas 9:1-62
-
Jesús okinmilui 12 iapóstoles ken tetlapouiskiaj (1-6)
-
Herodes okinekiaya kixmatis Jesús (7-9)
-
Jesús okintlamakak 5,000 tlakamej (10-17)
-
Pedro okijto Jesús ye Cristo (18-20)
-
Jesús okijto ken mikiskia (21, 22)
-
¿Tlen moneki kichiuas se idiscípulo Jesús? (23-27)
-
Jesús okse tlamantli omonexti (28-36)
-
Okipajti se telpochtli tlen okipiaya se ejekatl (37-43a)
-
Jesús oksepa okijto ken mikiskia (43b-45)
-
Discípulos omokualanijkej porque okinekiayaj kimatiskej akin okachi oueyititoka (46-48)
-
“Akin amo namechixnamiki kijtosneki namechpaleuia” (49, 50)
-
Jesús amo okiselijkej ompa Samaria (51-56)
-
¿Ken timochiuaskej idiscípulos Jesús? (57-62)
9 Jesús okinnechiko 12 apóstoles uan okinmakak chikaualistli para makinkixtikan nochtin ejekamej.* Noijki okinmakak chikaualistli para makinpajtikan kokoxkej.
2 Okintitlanki matetlapouitij iTekiuajkayo toTajtsin Dios uan makinpajtitij kokoxkej.
3 Ye okinmilui: “Amo xikuikakan namobastón, namotlakualbolsa, pan, tomin nion okseki tlamantli. Noijki amo xikuikakan ome namotlaken.
4 Ijkuak namajsitiuij tekalijtik, ompa ximokauakan hasta ijkuak nanyaskej.
5 Pero tla itech se altepetl amo namechseliaj, ximokxitsetselokan ijkuak nankisaskej para makimatikan amo kuali tlen okichijkej”.
6 Ijkuakon yejuan okitematiltitoj kuali tlajtoli itech altepetsitsintin uan okinpajtiayaj kokoxkej.
7 Tekiua Herodes* okimatki nochi tlen opanotoka uan amo okimatiaya tlen kichiuas. Porque sekimej okijtouayaj toTajtsin Dios okiyoliti Juan.
8 Oksekimej okijtouayaj omonexti Elías, uan oksekimej okijtouayaj toTajtsin Dios okiyoliti se profeta tlen yiuejkika okatka.
9 Herodes okijtouaya: “Ne onitlanauati makikechtsontekikan Juan, ¿pero akin non tlakatl tlen nikkaki kichiua nochi non tlamantli?”. Ikinon okinekiaya kixmatis.
10 Iapóstoles Jesús omokopatoj uan okiluijkej nochi tlen okichijkej. Satepan san yejuan okinuikak ik kanin okatka altepetl Betsaida.
11 Miakej okimatkej kanin oyajki Jesús uan okitokakej. Ye kuali okinseli uan okintlapoui iTekiuajkayo toTajtsin Dios. Noijki okinpajti kokoxkej.
12 Apóstoles omotokijkej inauak Jesús ijkuak otiotlakik uan okiluijkej: “Xikinmilui makitemotij kanin mokalotiskej uan tlen kikuaskej. Mayakan itech altepetsitsintin tlen ik nikan katej uan kanin tlatokaj porque nikan amikaj chanti”.
13 Pero Jesús okinmilui: “Namejuan xikintlamakakan”. Yejuan okinankilijkej: “Tejuan tikpiaj san makuili pan uan ome michimej. Uelis tikintlamakaskej tla nochtin tikintlakualkouitiuij”.
14 Ompa okatkaj kanaj 5,000 tlakamej. Pero Jesús okinmilui idiscípulos: “Nochtin xikinmiluikan kanaj 50 sesekan mamotlalikan”.
15 Discípulos nochtin okinmiluijkej mamotlalikan ijkon ken okinnauati Jesús.
16 Satepan ye okonanki makuili pan uan noijki ome michimej, oajkotlachixki uan omotlatlaujti. Satepan okipojposteki pan, okinmakak idiscípulos uan yejuan okinmajmakakej akinmej ompa okatkaj.
17 Nochtin otlakuajkej uan oixuikej. Satepan discípulos okololojkej nochi tlen omoka uan okitemitijkej 12 chikiuitl.
18 Satepan ijkuak Jesús omotlatlaujtijtoka, idiscípulos inauak omotokijkej uan ye okintlajtlani: “¿Tlen kijtouaj oksekimej? ¿Akin ne?”.
19 Yejuan okinankilijkej: “Kijtouaj tiJuan Bautista. Oksekimej kijtouaj tiElías uan oksekimej kijtouaj toTajtsin Dios okiyoliti se profeta tlen yiuejkika okatka”.
20 Ye okinmilui: “Namejuan, ¿tlen nankijtouaj? ¿Akin ne?”. Pedro okinankili: “Te omitspejpenki toTajtsin Dios”.
21 Ijkuakon Jesús okinnauati amikaj makiluikan.
22 Noijki okinmilui: “IKone Tlakatl kitlajyouiltiskej uan kixtopeuaskej tlayekankej, teopixkej tlen tlayekanaj uan akinmej tlamachtiaj tlanauatil. Noijki kimiktiskej pero ipan eyi tonal toTajtsin Dios kiyolitis”.
23 Satepan Jesús nochtin okinmilui: “Tla ikaj kineki nouan uits, ayakmo makichiua san tlen ye kineki. Nochipa makiseli makitlajyouiltikan* uan nouan mauiki.
24 Porque ixpoliuis akin kinekis kimakixtis iyolilis, pero akin mochiuas nodiscípulo momakixtis maski ixpoliuis.
25 ¿Tlen ipati tla ikaj kitlanis nochi tlen onka tlaltikpak pero moixpolos noso motlajyouiltis?
26 Tla ikaj pinaua yetos nodiscípulo uan pinaua kineltoka tlen nikijtoua, iKone Tlakatl noijki pinauas kiselis ijkuak uits ika ichikaualis, ika ichikaualis iTajtsin uan ika inchikaualis ángeles yolchipauakej.
27 Ne namechiluia, sekimej tlen nikan katej amo ixpoliuiskej hasta ijkuak kitaskej iTekiuajkayo toTajtsin Dios”.
28 Chikueyi tonal satepan ijkuak Jesús ijkon okijto, otlejkok omotlatlaujtito itech tepetl uan okinuikak Pedro, Juan uan Santiago.
29 Ijkuak Jesús omotlatlaujtijtoka, omoixpatlak, itlaken oistayak uan opetlanki.
30 Noijki oualmonextijkej ome tlakamej tlen omotlapouijtokaj iuan Jesús. Ye Moisés uan Elías.
31 Nonmej tlakamej opetlaniayaj uan opejki motlapouiaj Jesús yaskia, uan non panoskia ompa Jerusalén.
32 Pedro uan oksekimej okochisnekiayaj. Pero ijkuak oyektlachixkej, okitakej Jesús opetlaniaya uan noijki ome tlakamej tlen ompa okatkaj.
33 Ijkuak nonmej tlakamej yoyayaj, Pedro okilui Jesús: “Tlamachti, tipakij nikan tikatej. Matikinchiuakan eyi kaltsitsintin. Se para te, okse para Moisés uan okse para Elías”. Pedro amo okimatiaya tlen okijtouaya.
34 Ijkuak Pedro otlajtojtoka, se mixtli oualmonexti uan okinpacho. Yejuan omomojtijkej ijkuak ijkon opanok.
35 Ijkuakon ikaj oualtlajto ijtik mixtli uan okijto: “Nin noKone tlen onikpejpenki. Xikkakikan”.
36 Jesús iselti omoka ijkuak omokak non tlajtoli. Yejuan amitlaj okijtojkej uan itech nonmej tonalmej amikaj okiluijkej tlen okitakej.
37 Mostlatika miakej okinamikitoj Jesús ijkuak yejuan otemokej itech tepetl.
38 Ijkuakon se tlakatl chikauak otsajtsik intlajko akinmej ompa okatkaj. Okijto: “¡Tlamachti, nimitstlatlaujtia xikpaleui notelpoch! San se nokone nikpia.
39 Ye kipia se ejekatl* uan peua chikauak tsajtsi. Ejekatl* kichiua mamimiki uan makamapoposojkisa. Noijki kitlajyouiltia uan amo kineki kikauas.
40 Onikintlatlaujti modiscípulos makikixtilikan ejekatl* pero amo ouelik okichijkej”.
41 Jesús okijto: “¡Akinmej axkan yoltokej amo yolkualmej uan amo tlaneltokaj! ¿Hasta keman namouan niyetos uan namechxikojtos? Xikualika motelpoch”.
42 Ijkuak telpochtli yomotokijtiualaya, ejekatl* okitlamotlak uan okichi chikauak mamimiki. Pero Jesús okajuak ejekatl,* okipajti telpochtli uan okimaktili ipapa.
43 Nochtin okintlajtlachialti ichikaualis toTajtsin Dios.
Ijkuak okintlajtlachialtiaya tlen Jesús okichiuaya, ye okinmilui idiscípulos:
44 “Xikyekkakikan tlen namechiluis uan xikilnamiktokan, porque iKone Tlakatl kitemaktiskej inmak tlakamej”.
45 Pero yejuan amo okajsikamatkej tlen okijto porque okatka ken itlaj otlatitoka. Noijki omomojtiayaj kitlajtlaniskej tlen kijtosneki tlen okijto.
46 Ijkuakon discípulos opejki mokualaniaj porque okinekiayaj kimatiskej akin okachi oueyititoka.
47 Jesús okimatiaya tlen omokuayejyekouayaj* ikinon okinotski se chokotsin, inakastlan okitlali
48 uan okinmilui: “Akin nechtlakaita kiselis nin chokotsin uan ne noijki nechselis. Akin nechselis noijki kiselis akin onechualtitlanki. Porque tla namouan kajki ikaj yolyamanki, ye okachi ueyititos”.
49 Ijkuakon Juan okilui: “Tlamachti, otikitakej se tlakatl okinkixtiaya ejekamej* ika motoka. Pero otikiluijkej amo ijkon makichiua porque amo touan nemi”.
50 Pero Jesús okilui: “Amitlaj xikiluikan porque akin amo namechixnamiki kijtosneki namechpaleuia”.
51 Jesús omoyolchika yas Jerusalén ijkuak yiajsiskia tonal yas iluikak.
52 Ye okintitlanki sekimej idiscípulos matlayekanakan. Yejuan oyajkej itech se altepetsintli ompa Samaria uan okitemolijkej kanin mokalotis.
53 Pero akinmej ompa ochantiayaj amo okiselijkej porque ye okinekiaya yas Jerusalén.
54 Ijkuak Santiago uan Juan okimatkej, okiluijkej Jesús: “ToTeko, ¿tikneki matitlanauatikan maualtemo tlitl itech iluikak uan makinmixpolo?”.
55 Ye okinmitak uan okinmajuak.
56 Satepan oyajkej itech okse altepetsintli.
57 Ijkuak onejnentiayaj, ikaj okilui Jesús: “Ne mouan nias maski san kanin tias”.
58 Jesús okinankili: “Astomej kipiaj inchan uan totomej kipiaj intepajsol, pero iKone Tlakatl amo kipia kanin kochis”.
59 Satepan Jesús okilui okse tlakatl: “Nouan xiuiki”. Pero tlakatl okilui: “NoTeko, techkauili achto maniktokati nopapa”.
60 Jesús okinankili: “Xikinkaua mikamej makintokakan akinmej yoixpolikej. Pero te xio uan nouian xiktematiltiti iTekiuajkayo toTajtsin Dios”.
61 Okse tlakatl okilui Jesús: “NoTeko, ne mouan nias pero achto techkauili manikinnauatiti akinmej katej nochan”.
62 Jesús okinankili: “Akin kikitskijti arado uan mokopa para kitas tlen okikajte, amo kinamiki kalakis itech iTekiuajkayo toTajtsin Dios”.
