Tlen okijkuilo Lucas 4:1-44
4 Jesús okatka itech aueyatl Jordán, uan toTajtsin Dios okimakak espíritu santo. Satepan espíritu santo okiyekanki kanin tlauaki.
2 Ompa omoka 40 tonal uan Diablo okiyejyeko. Jesús oapismikiaya porque amitlaj okikua nonmej tonalmej.
3 Ijkuakon Diablo okilui: “Tla tiikone Dios, xikilui nin tetl mamokopa pan”.
4 Pero Jesús okinankili: “ITlajtol Dios kijtoua: ‘Amo san moneki titlakuaskej para tiyoltoskej’”.
5 Satepan Diablo okiuikak kanin okachi tlauejkapan uan san niman okinmititi nochi altepemej.
6 Diablo okilui: “Nimitsmakas nochi tlen kipiaj ninmej altepemej uan te xikinnauati, porque nochi onechmakakej uan uelis nikmakas san akin ne niknekis.
7 Ikinon nochi yetos moaxka tla san se uelta techueyichiuas”.
8 Jesús okinankili: “ITlajtol Dios kijtoua: ‘Xikueyichiua Jehová moDios uan san ye xiktekichiuili’”.
9 Satepan Diablo okiuikak Jesús ikpak* templo ompa Jerusalén uan okilui: “Tla tiikone Dios, nikan ximotlamotla
10 porque iTlajtol Dios kijtoua: ‘Ye kinnauatis iángeles mamitspaleuikij’
11 uan ‘mitskitskiskej para amo timokxiuitekis ika se tetl’”.
12 Jesús okinankili: “ITlajtol Dios noijki kijtoua: ‘Amo xikyejyeko Jehová moDios’”.
13 Diablo oyajki ijkuak otlanki okiyejyeko Jesús uan omochixki kiyejyekos okse tonal.
14 Jesús omokopki Galilea uan okipiaya iespíritu toTajtsin Dios. Nochi tlen okichiuaya omomatki itech nochi non altepetl.
15 Noijki opejki tlamachtia itech insinagogas* uan nochtin okitlakaitayaj.
16 Satepan Jesús oyajki altepetl Nazaret kanin omoskalti. Se sábado okalak itech sinagoga* ijkon ken nochipa okichiuaya. Satepan omoketski uan okitlajtolti iTlajtol toTajtsin Dios.
17 Okimakakej rollo tlen okijkuilo profeta Isaías. Ijkuak okitlapo, okajsik kanin oijkuilitoka:
18 “Jehová onechmakak iespíritu, porque ye onechpejpenki manikinmatilti kuali tlajtoli akinmej amitlaj kipiaj. Onechualtitlanki manikinmiluiki kisaskej akinmej tsaktokej uan tlachiaskej akinmej amo tlachiaj. Nikinmakixtis akinmej tlajyouiaj
19 uan nitetlapouis keman kinteochiuas Jehová”.
20 Satepan okitetsilo* rollo, okimakak akin otlapaleuiaya itech sinagoga* uan omotlali. Nochtin tlen ompa okatkaj san okitayaj.
21 Jesús okinmilui: “Axkan mochiua iTlajtol toTajtsin Dios tlen oniktlajtolti”.
22 Nochtin okitayaj kuali tlen okijtouaya uan omotlajtlachialtiayaj. Okijtouayaj: “¿Amo ye nin itelpoch José?”.
23 Jesús okinmilui: “Namejuan nantechiluiskej nin tlajtoli: ‘Tepajti, moselti ximopajti’. Noijki nankijtoskej: ‘Tlen otikmatkej otikchi Capernaúm noijki xikchiua kanin otimoskalti’”.
24 Noijki okijto: “Ne namechiluia, nion se profeta kitlakaitaj itech ialtepe.
25 Ijkuak okatka Elías, ompa Israel okatkaj miakej siuamej tlen oixpoliuik innamik. Ijkuakon amo okiauik eyi xiuitl uan tlajko uan otlaapistik itech nochi altepetl.
26 Pero Elías amo okititlankej makinmitati nonmej siuamej. Okititlankej makitati se siuatl tlen ochantiaya Sarepta ompa Sidón.
27 Noijki ijkuak okatka Eliseo, ompa Israel okatkaj miakej tlen opalaniaya innakayo,* pero ye san okipajti Naamán tlen ochantiaya Siria”.
28 Ijkuakon okualankej nochtin tlen okikakej itech sinagoga.*
29 Yejuan omoketskej uan san niman okikixtijkej itech altepetl. Satepan okiuikakej ipan tepetl kanin okatka non altepetl para kitlamotlaskiaj.
30 Pero ye intlajko opanok uan oyajki.
31 Satepan Jesús otemok Capernaúm tlen kajki Galilea. Nochi sábados ompa otlamachtiaya.
32 Nochtin okintlajtlachialti ken otlamachtiaya porque otlamachtiaya tlen kijtoua toTajtsin Dios.
33 Itech sinagoga* okatka se tlakatl tlen okipiaya se ejekatl.* Ye chikauak okijto:
34 “¿Tlen otikchiuako nikan Jesús Nazareno? ¿Otechpojpoloko? Ne kuali nikmati te tiSanto uan omitsualtitlanki Dios”.
35 Jesús okajuak ejekatl* uan okilui: “¡Xiktsakua mokamak uan xikisa ijtik tlakatl!”. Ejekatl* okitlamotlak tlakatl intlajko akinmej ompa okatkaj uan okiski pero amo okikojko.
36 Nochtin omotlajtlachialtijkej ijkuak okitakej uan okimoluijkej: “¿Ken ueli ijkon tlajtoua? Ika chikaualistli ye kinnauatia ejekamej* uan yejuan kisaj”.
37 Itech nochi altepemej okimatkej tlen okichiuaya Jesús.
38 Jesús oyajki ichan Simón ijkuak okiski itech sinagoga.* Ijkuakon imonna Simón sapanoua okipiaya totonik uan okiluijkej Jesús makipaleui.
39 Jesús omotoki inauak imonna Simón uan okipajti. Siuatl san niman omejki uan opejki kintlakualchiuilia.
40 Ijkuak omotlati tonaltsin, okinuikilijkej Jesús nochtin tlen okipiayaj tlatlamantli kokolistli. Ye inpan okintlaliaya imauan uan ijkon okinpajtiaya.
41 Noijki miakej okinpiayaj ejekamej* uan chikauak okijtouayaj ijkuak okisayaj: “¡Te tiiKone Dios!”. Pero ye okinmajuaya uan amo okinkauiliaya matlajtokan, porque yejuan okimatiayaj ye okatka Cristo.
42 Ijkuak otlaneski, Jesús oyajki kanin amikaj okatka. Pero miakej okitemotoj uan okajsitoj. Yejuan okinekiayaj kitsakuiliskej para amo makinkajteua.
43 Pero ye okinmilui: “Noijki itech okseki altepemej moneki niktematiltis kuali tlajtoli tlen kijtoua toTajtsin Dios ualtlanauatis ipan tlaltikpak, ikinon onechualtitlankej”.
44 Jesús otetlapouijtinemiaya itech sinagogas* ompa Judea.
Notas
^ Noso “ikuapak”.
^ Xikita diccionario.
^ Xikita diccionario.
^ Noso “okilakatso”.
^ Xikita diccionario.
^ Noso “okipiayaj lepra”.
^ Xikita diccionario.
^ Xikita diccionario.
^ Noso “demonio”.
^ Noso “demonio”.
^ Noso “demonio”.
^ Noso “demonios”.
^ Xikita diccionario.
^ Noso “demonios”.
^ Xikita diccionario.
