Tlen okijkuilo Lucas 11:1-54
-
¿Ken moneki timotlatlaujtiskej? (1-13)
-
Jesús otechmachti ken timotlatlaujtiskej (2-4)
-
-
Jesús okinkixti ejekamej ika ichikaualis toTajtsin Dios (14-23)
-
Se ejekatl omokopki ijtik se tlakatl (24-26)
-
¿Tlen techpaleuis matipakikan? (27, 28)
-
Tlen okipanok Jonás (29-32)
-
“Moixtololouan kitlauiliaj mocuerpo” (33-36)
-
Jesús okijto tlen kinpanoskia akinmej otlayekanayaj tlen okipiayaj ome inmixko (37-54)
11 Se tonal, Jesús omotlatlaujtijtoka uan ijkuak otlanki omotlatlaujti, se idiscípulo okilui: “NoTeko, techmachti matimotlatlaujtikan ijkon ken Juan okinmachti idiscípulos”.
2 Ye okinmilui: “Ijkin xikijtokan ijkuak nanmotlatlaujtiskej: ‘ToTajtsin Dios, nochtin makitlakaitakan* motoka. Mauiki moTekiuajkayo.
3 Mojmostla techmaka tlen moneki tikkuaskej.*
4 Techtlapojpoluili totlajtlakol porque tejuan noijki tikintlapojpoluiaj akinmej itlaj techtoktiaj. Amo xiktekauili matechyoltilana tlen amo kuali’”.
5 Noijki okinmilui: “Matikijtokan se tlen nikan kajki kipia se iyolikni uan yaui kitati tlajkoyouak uan kiluia: ‘Noyolikni, techtlaneti eyi pan.
6 Oajsiko se noyolikni tlen uejka uits uan amo nikpia tlen nikmakas’.
7 Iyolikni kiualnankilis: ‘Amo techkuejsojto. Yoniktsak puerta ika llave, ne uan nokoneuan yitikochiskej. Amitlaj uelis nimitsmakati’.
8 Ne namechiluia, xamo amo kipaleuis maski iyolikni, pero tla ye amo pinaua uan okachi kitlajtlanilis, satepan meuas kimakati nochi tlen ye kineki.
9 Ikinon ne namechiluia, xiktlajtlantokan uan namechmakaskej, xiktemojtokan uan nankajsiskej, xikuiuitekikan* puerta uan namechtlatlapoliskej.
10 Porque akin itlaj kitlajtlani kiselia, akin itlaj kitemoua kajsi uan akin kiuiuiteki* puerta kitlatlapoliaj.
11 ¿Kox ikaj kimakas ikone se kouatl tla kitlajtlanilia se michin?
12 Noso ¿kimakas se kolotl* tla kitlajtlanilis se totoltetl?*
13 Namejuan nankinmakaj tlen kuali namokoneuan maski nantlajtlakolejkej. ToTajtsin Dios tlen kajki iluikak okachi kinmakas espíritu santo akinmej kitlajtlaniliaj”.
14 Satepan, Jesús okikixti se ejekatl* tlen okatka ijtik se tlakatl. Non ejekatl amo okikauiliaya matlajto tlakatl. Tlakatl opejki tlajtoua ijkuak ejekatl* okiski uan omotlajtlachialtijkej akinmej ompa okatkaj.
15 Pero sekimej okijtojkej: “Ye kinkixtia ejekamej* porque kimaka chikaualistli Belcebú* tlen kinyekana ejekamej”.*
16 Oksekimej okinekiayaj kiyejyekoskej, ikinon okiluijkej makichiua se milagro ika itoka toTajtsin Dios.
17 Jesús okimatiaya tlen omokuayejyekouayaj* uan okinmilui: “Se altepetl pojpoliuis tla akinmej ompa chantij mokualaniaj. Noijki se familia pojpoliuis tla moxexelouaj.
18 Noijki ijkon, tla Satanás ineuian moixnamiki, pojpoliuis nochi tlen kiyekantok. Namejuan nankijtouaj ne nikinkixtia ejekamej* porque Belcebú nechmaka chikaualistli.
19 Tla ne nikinkixtia ejekamej* porque Belcebú nechmaka chikaualistli, ¿akin kinpaleuia namodiscípulos makinkixtikan ejekamej?* Ikinon yejuan namechiluiskej kox kuali tlen nankichiuaj.
20 Pero tla ne nikinkixtia ejekamej* ika ichikaualis* toTajtsin Dios, kijtosneki yonamechajsiko iTekiuajkayo toTajtsin Dios.
21 Amikaj uelis kitlachtekis se tlakatl tla chikauak uan kinpia teposmej tlen ika kimaluis ichan.
22 Pero tla ikaj okachi chikauak kiteuis uan kitlanilis, kinkixtilis nochi teposmej tlen ika otlamaluiaya uan kixejxelos tlen kichtekilis.
23 Nechixnamiki akin amo nechpaleuia. Noijki san tlaxitinia akin amo nouan tlaololoua”.
24 “Ijkuak se ejekatl* kisa ijtik se tlakatl, nentinemi kanin tlauaki uan kitemojtinemi kanin moseuis pero amo kanaj kajsi ikinon kijtoua: ‘Oksepa nimokopas ijtik tlakatl kanin onikatka’.
25 Ijkuak ajsiti ijtik tlakatl yetoskia ken kuali otlachpankej uan kualtsin otlayektlalijkej.
26 Satepan yaui kinnotsati ok chikome ejekamej* tlen okachi kichiuaj tlen amo kuali. Yejuan kalakij ijtik tlakatl uan ompa mokauaj ikinon tlakatl okachi tlajyouia uan amo ken achto”.
27 Ijkuak Jesús otlajtojtoka, se siuatl tlen okatka inuan oksekimej, chikauak okilui: “¡Mapaki momama porque omitspixki uan omitschichiti!”.
28 Pero Jesús okinankili: “Amo. ¡Pakij akinmej kikakij iTlajtol toTajtsin Dios uan kichiuaj!”.
29 Miakej opejki monechikouaj inauak Jesús uan ye okinmilui: “Akinmej axkan yoltokej amo yolkualmej. Kinekij kitaskej se milagro pero amo kitaskej okse milagro, san kitaskej tlen okipanok Jonás.
30 Ijkon ken Jonás omoteititi ken se neskayotl ompa Nínive, iKone Tlakatl noijki moteititis ken se neskayotl inmixpan akinmej axkan yoltokej.
31 Ijkuak tlaixkomakaskej, siuatl tlen otlanauatiaya sur kiyolitiskej inuan akinmej axkan yoltokej uan ye kintlajtlakoltis. Porque ye uejka ouala okikakiko Salomón kox okatka ixtlamatki. Pero nikan nankipiaj ikaj okachi ueyititok uan amo ijkon ken Salomón.
32 Ijkuak tlaixkomakaskej, kinyolitiskej akinmej ochantiayaj Nínive inuan akinmej axkan yoltokej uan yejuan kintlajtlakoltiskej. Porque yejuan omoyolkopkej ijkuak Jonás okintlapoui. Pero nikan nankipiaj ikaj okachi ueyititok uan amo ijkon ken Jonás.
33 Amikaj kixotlaltia se tlauili uan satepan kitlatia noso kitsakua ika se chikiuitl.* Kitlalia kanin kintlauilis akinmej kalakiskej.
34 Moixtololouan kitlauiliaj mocuerpo. Tla tiyektlachixtos, nochi mocuerpo petlantos. Pero tla titlaixneki, mocuerpo yetos kanin tlayoua.
35 Ikinon tlauili tlen tikpia xikmalui amo mamokopa tlayoualotl.
36 Nochi mocuerpo petlanis tla amo tikpia nion tepitsin tlayoualotl. Ijkon ken se tlauili nochi mitstlauilia”.
37 Ijkuak Jesús otlanki okintlapoui, se fariseo okilui matlakuati ichan. Ye oyajki uan omotlali inakastlan mesa.
38 Pero fariseo omotlajtlachialti porque okitak ye amo omomajtekiaya ijkuak otlakuaya.
39 Jesús okilui: “Namejuan fariseos san panixko nankichipauaj namocopa uan namoplato, pero namoyolipan nantlaixnekij uan nankichiuaj tlen amo kuali.
40 ¡Nanxoxojtin! ¿Amo nankimatij akin okichijchi tocuerpo noijki okichijchi toyolo?
41 Ikinon ika nochi namoyolo xikinpaleuikan akinmej amitlaj kipiaj. Tla ijkon nankichiuaskej, nanyetoskej nanchipauakej.
42 Mialmastin namejuan fariseos porque nankitemakaj* menta, ruda uan okseki xiuitl, pero amo nankichiuaj tlen kuali uan amo nankitlasojtlaj toTajtsin Dios. Omonekiaya nankitemakaskej non tlamantli, pero amo omonekiaya nankilkauaskej nankichiuaskej tlen okachi ipati.
43 Mialmastin namejuan fariseos porque namechpaktia nanmotlaliskej tlayekapan itech sinagogas.* Noijki namechpaktia manamechtlajpalokan tiankisko.
44 Mialmastin namejuan porque nankatej ken kanin toktokej akinmej yoixpolikej uan amo motaj. Miakej inpan nejnemij uan amo kimatij”.
45 Se tlakatl tlen kuali okixmatiaya iTlanauatil Moisés, okilui Jesús: “Tlamachti, noijki tejuan otechixnamik ijkuak ijkon otikijto”.
46 Jesús okijto: “Mialmastin namejuan tlen kuali nankixmatij iTlanauatil Moisés. Namotlanauatiluan yetoskiaj ken itlaj etik tlen nankinmamaltiaj oksekimej, pero namejuan amo nankoliniaj nion ika se namomajpil”.
47 “Mialmastin namejuan porque nantlayektlaliaj kanin toktokej profetas, pero namouejkatatajuan okinmiktijkej nonmej profetas.
48 Namejuan nankitaj kuali tlen okichijkej namouejkatatajuan. Yejuan okinmiktijkej profetas uan namejuan nantlayektlaliaj kanin okintokakej.
49 ToTajtsin Dios ixtlamatki ikinon okijto: ‘Ne nikintitlanilis profetas uan apóstoles, pero sekimej kinmiktiskej uan oksekimej kintemojtinemiskej para kintlajyouiltiskej.
50 Akinmej axkan yoltokej kintlajtlakoltiskej porque okinokijkej* inmieso profetas desde ijkuak opejki tlaltikpak.*
51 Opejki ijkuak okimiktijkej Abel hasta ijkuak okimiktijkej Zacarías ixpan templo inakastlan altar’. Ne namechiluia, akinmej axkan yoltokej kitlaxtlauaskej tlen opanok”.
52 “Mialmastin namejuan tlen kuali nankixmatij iTlanauatil Moisés, porque oksekimej onankinkixtilijkej llave tlen kitlapoua puerta para makixmatikan toTajtsin Dios. Namejuan amo onankalakej uan nankintsakuiliaj akinmej kinekij kalakiskej”.
53 Ijkuak Jesús okiski, fariseos uan akinmej otlamachtiayaj tlanauatil okikuejsojkej uan okitlajtlanijkej miak tlamantli.
54 Yejuan okinekiayaj makijto itlaj tlen ika kiteluiskej.
Notas
^ Noso “makiyekteneuakan”.
^ Ika griego moijtoua “pan”.
^ Noso “xikkajkalanikan”.
^ Noso “kikajkalania”.
^ Noso “escorpión”.
^ Noso “teksistli”.
^ Noso “demonio”.
^ Noso “demonio”.
^ Noso “demonios”.
^ Ijkon kitokayotiaj Satanás.
^ Noso “demonios”.
^ Noso “omonejneuiliayaj”.
^ Noso “demonios”.
^ Noso “demonios”.
^ Noso “demonios”.
^ Noso “demonios”.
^ Ika griego moijtoua “imajpil”.
^ Noso “demonio”.
^ Noso “demonios”.
^ Nin chikiuitl ika otlatamachiuayaj.
^ ITlanauatil Moisés okijtouaya tla ikaj okololouaya majtlaktli chikiuitl tlen otlakiaya, se chikiuitl omonekiaya kimakas toTajtsin Dios.
^ Xikita diccionario.
^ Noso “okimimilojkej”, “okixauanijkej”, “okitoyajkej”.
^ Kijtosneki ijkuak Eva opejki kinpia ikoneuan.
