Tlen okijkuilo Juan 20:1-31
20 Ijkuak peua semana,* san kualkan ijkuak ayamo otlanesiaya, María Magdalena oyajki kanin otoktoka Jesús, pero okitak yokitokijkej tetl kanin otoktoka.
2 Ye san niman okitato Simón Pedro uan okse discípulo tlen Jesús okitlasojtlaya. Okinmilui: “¡Yokiuikakej toTeko. Ayakmo kajki kanin otoktoka uan amo tikmatij kanin okikauatoj!”.
3 Ijkuakon Pedro uan okse discípulo oyajkej kanin otoktoka Jesús.
4 Yejuan san sekan omotlalojkej, pero okse discípulo okachi omotlalo uan achto oajsito kanin otoktoka Jesús.
5 Non discípulo omotolo uan otlachixki tlaijtik, okitak ompa okatka tsotsoli* de lino pero amo okalak.
6 Satepan oajsito Simón Pedro porque omoka tlakuitlapan. Ye okalak kanin otoktoka Jesús uan okitak ompa okatka tsotsoli* de lino.
7 Tsotsoli* tlen ika okuakimilitoka Jesús sekan otetsilitoka,* uan amo okatka iuan okseki tsotsoli.*
8 Satepan noijki okalak discípulo tlen achto oajsito. Ye otlaneltokak ijkuak okitak tlen opanok.
9 Yejuan ayamo okajsikamatiayaj iTlajtol toTajtsin Dios kijtoua ye kiyolitiskiaj.
10 Satepan nonmej discípulos omokopkej inchan.
11 Pero María omoka kiauak kanin otoktoka Jesús uan ochokatoka. Ijkuak ochokatoka, omotolo uan otlachixki tlaijtik.
12 Ijkuakon okinmitak ome ángeles tlen okipiayaj intlaken istak. Yejuan okatkaj* kanin okitlalijkaj icuerpo Jesús. Se omotlali kanin okatka itsonteko uan okse omotlali kanin okatkaj ikxiuan.
13 Yejuan okitlajtlanijkej: “Siuatsintli, ¿tleka tichoka?”. Ye okinnankili: “Porque okiuikakej noTeko uan amo nikmati kanin okikauatoj”.
14 Ijkuak María ijkon okijto, omokopki uan okitak Jesús ompa omoketoka pero amo okixmatki.
15 Jesús okitlajtlani: “Siuatsintli, ¿tleka tichoka? ¿Akin tiktemoua?”. María omokuayejyeko* non tlakatl okatka jardinero uan okilui: “Tla tejuatsin otikuikak, techilui kanin otiktlali uan ne nikuikas”.
16 Ijkuakon Jesús okilui: “¡María!”. Ye omokopki uan okilui ika hebreo: “¡Rabbóni!” (nin tlajtoli kijtosneki “tlamachti”).
17 Jesús okilui: “Ayakmo techkitski porque ayamo nio inauak noTajtsin. Xikinmitati nokniuan uan xikinmilui: ‘Nias inauak noTajtsin tlen noijki namoTajtsin uan noDios tlen noijki namoDios’”.
18 María Magdalena okinmitato discípulos uan okinmilui: “¡Onikitak toTeko!”. Noijki okinmilui nochi tlen Jesús okijto.
19 Ijkuak otiotlakik non tonal ijkuak peua semana,* discípulos otlatsakej ika llave kanin omonechikojkej porque okinmauiliayaj* judíos. Ijkuakon Jesús oualmonexti tlatlajkotia uan okinmilui: “Xikpiakan yolseuilistli”.
20 Ijkuak ijkon okinmilui, okinmititi imauan uan iomisikuil. Discípulos sapanoua opakej ijkuak okitakej Jesús.
21 Jesús oksepa okinmilui: “Xikpiakan yolseuilistli. Ne namechtitlanis ijkon ken noTajtsin onechualtitlanki”.
22 Satepan okinmijpitski uan okinmilui: “Xikselikan espíritu santo.
23 Tla nankitlapojpoluiskej akin otlajtlakolchi, toTajtsin Dios noijki kitlapojpoluis. Pero tla amo nankitlapojpoluiskej akin otlajtlakolchi, toTajtsin Dios noijki amo kitlapojpoluis”.
24 Pero apóstol Tomás tlen okiluiayaj Gemelo, amo okatka inuan oksekimej discípulos ijkuak okinmonextili Jesús.
25 Oksekimej discípulos okiluijkej: “¡Otikitakej toTeko!”. Pero ye okinmilui: “Amo nikneltokas tla amo nikinmitas imauan kanin okimakoyonijkej ika clavos uan ompa nikkalakis nomajpil. Noijki amo nikneltokas tla amo nikkalakis noma itech iomisikuil”.
26 Chikueyi tonal satepan, discípulos oksepa omonechikojkej itech se kali. Tomás noijki ompa okatka. Otlatsaktoka ika llave pero Jesús oualmonexti tlatlajkotia uan okinmilui: “Xikpiakan yolseuilistli”.
27 Satepan Jesús okilui Tomás: “Nikan xiktlali momajpil uan xikinmita nomauan. Noijki xikkalaki moma itech noomisikuil uan xitlaneltoka ika nochi moyolo”.
28 Tomás okilui: “¡NoTeko uan noDios!”.
29 Jesús okilui: “¿Titlaneltoka porque otechitak? Pakij akinmej tlaneltokaj maski amitlaj kitaj”.
30 Jesús noijki okinchi miakej milagros inmixpan discípulos pero amo ijkuilitokej itech nin rollo.
31 Pero nochi nin tlamantli omoijkuilo para xikneltokakan Jesús ye Cristo uan iKone toTajtsin Dios. Noijki nochipa nanyoltoskej tla nankineltokaskej.
Notas
^ Nin tonal itoka domingo. Insemana judíos opeuaya ika non tonal.
^ Noso “tlakemitl”, “tilmajtli”.
^ Noso “tlakemitl”, “tilmajtli”.
^ Noso “tlakemitl”, “tilmajtli”.
^ Noso “oilakatsitoka”.
^ Noso “tlakemitl”, “tilmajtli”.
^ Noso “oeuatokaj”, “oyetokaj”.
^ Noso “omonejneuili”.
^ Nin tonal itoka domingo. Insemana judíos opeuaya ika non tonal.
^ Noso “okinmimakasiayaj”.
