Job 2:1-13
2 Satepan oajsik tonal ijkuak ángeles* okalakej para motekpanaskej* ixpan Jehová, uan Satanás noijki ompa oajsito para motekpanas* ixpan Jehová.
2 Ijkuakon Jehová okitlajtlani Satanás: “¿Kanin otiuia?”. Satanás okinankili Jehová: “Oniuia tlaltikpak uan ompa oninentinemiaya”.
3 Jehová okilui Satanás: “¿Yotikitak notekipanojka Job? Ompa tlaltikpak amikaj ken Job. Ye kipia iyolo ajsitok, yolkuali, sapanoua kitlakaita* Dios uan kixtopeua nochi tlen amo kuali. Te tikneki techyolinis maniktlajtlami maski amitlaj okichi, pero ye ok kipia iyolo ajsitok”.
4 Satanás okinankili Jehová: “Ijkuak ikaj yimikis* kitemakas nochi tlen kipia para kimakixtis iyolilis.*
5 Ikinon tla axkan tikmelaua moma uan tikkojkoua inakayo uan iomiouan, tikitas moixpan mitsuijuikaltis”.*
6 Jehová okilui Satanás: “Xikita, ye momak kajki.* ¡Pero amo xikmikti!”.
7 Ijkuakon Satanás okiski ixpan Jehová uan okikojko Job ika sauamej tlen otemalkisayaj desde ikxitlampa hasta ipan itsonteko.
8 Uan Job okikitski se pedazo komitl de sokitl* tlen yotlapanki para motatakas, omotlali ipan tlikonextli uan ompa omoka.
9 Satepan isiua okilui: “¿Ok tikneki tikpias moyolo ajsitok? ¡Xikuijuikalti Dios uan ximiki!”.
10 Pero ye okinankili: “Titlajtojtok ken se siuatl tlen amo kuali mokuayejyekoua.* Tla tikseliaj tlen kuali techmaka akin melauak toTajtsin Dios, ¿amo noijki tikseliskej tlen amo kuali?”. Maski ijkon opanok, Job amo otlajtlakolchi ika ikamak.
11 Ijkuak Elifaz akin temanita, Bildad akin suhita uan Zofar akin naamatita, eyi iyolikniuan Job okimatkej tlen amo kuali okipanok, sejse okiski itech ialtepe. Yejuan okijtojkej san sekan yaskiaj kanin okatka Job para iuan moyolkokoskiaj uan kiyolseuiskiaj.
12 Amo okixmatkej ijkuak san uejka okitakej. Ijkuakon chikauak ochokakej uan okitsayankej intlaken, okajkotlamotlakej tlalpinoli* uan okimokuatlalilijkej.
13 Yejuan omotlalijkej iuan Job ipan tlali uan ompa omokajkej chikome tonal uan chikome youak. Amikaj itlaj okiluiaya porque okitayaj fiero otlajyouijtoka.
Notas
^ Ika hebreo “ikoneuan akin melauak toTajtsin Dios”.
^ Noso “moyekmanaskej”, “motlatlaliskej”.
^ Noso “momajmanas”, “motlalis”.
^ Noso “kimauilia”.
^ Ika hebreo “inakayo ipatka inakayo”.
^ Noso “ialma”.
^ Xikita diccionario kanin kijtoua tlauijuikaltia.
^ Noso “te tiknauatia”.
^ Noso “akuitlatl”.
^ Noso “monejneuilia”.
^ Noso “teutli”, “tlalnixtli”.
