Job 1:1-22
1 Ompa Uz okatka se tlakatl tlen omotokayotiaya Job.* Ye okipiaya iyolo ajsitok, okatka yolkuali, sapanoua okitlakaitaya* toTajtsin Dios uan okixtopeuaya nochi tlen amo kuali.
2 Okinpiaya chikome itelpochuan uan eyi ichpochuan.
3 Okinpiaya miakej iyolkauan: 7,000 ichkamej,* 3,000 camellos, 1,000 vacas* uan 500 burros. Noijki okinpiaya sapanoua miakej itlakeualuan. De nochtin akinmej ochantiayaj ik kanin kisa tonaltsin ye okachi oueyititoka.
4 Itelpochuan oiluichiuayaj inkalijtik, sejse oiluichiuaya tonal tlen yokijtojkaj uan okinyoleuayaj eyi inmikniuan siuamej inuan matlakuakan uan itlaj makonikan.
5 Ijkuak nochtin yoiluichijkaj inkalijtik, Job okinnotsaya ikoneuan para kinchipauas ixpan toTajtsin Dios. Kualkan* omeuaya uan inpatka sejse ikoneuan okintemakaya tetliokolilmej tlen mochichinouaj* porque ye okijtouaya: “Xamo nokoneuan otlajtlakolchijkej uan inyolipan* okiuijuikaltijkej* toTajtsin Dios”. Job nochipa ijkon okichiuaya.
6 Oajsik tonal ijkuak ángeles* okalakej para motekpanaskej* ixpan Jehová, uan Satanás noijki ompa oajsito.
7 Ijkuakon Jehová okitlajtlani Satanás: “¿Kanin otiuia?”. Satanás okinankili Jehová: “Oniuia tlaltikpak uan ompa oninentinemiaya”.
8 Jehová okilui Satanás: “¿Yotikitak notekipanojka Job? Ompa tlaltikpak amikaj ken Job. Ye kipia iyolo ajsitok, yolkuali, sapanoua kitlakaita* Dios uan kixtopeua nochi tlen amo kuali”.
9 Satanás okinankili Jehová: “Tla Job amitlaj kiseliskia, ¿kox sapanoua kitlakaitaskia Dios?
10 ¿Amo otiktlatsajtsakui ye, ikalijtik uan nochi tlen kipia para amitlaj makipano? Yotikteochi tekitl tlen kichiua ika imauan uan iyolkauan yomomiakilijkej ipan tlali.
11 Pero axkan xikmelaua moma uan xikkixtili nochi tlen kipia uan tikitas moixpan mitsuijuikaltis”.
12 Jehová okilui Satanás: “Xikita, momak kajki* nochi tlen kipia. ¡Pero ye amitlaj xiktokti!”.* Ijkuakon Satanás okiski ixpan Jehová.
13 Satepan, itech tonal ijkuak itelpochuan uan ichpochuan Job otlakuajtokaj uan okonitokaj vino ikalijtik inmikni tlen achto oneski,*
14 ikaj okiluito Job: “Toros otlaxouatokaj uan burros innakastlan oxijkuajtokaj
15 ijkuak sabeos inpan oyajkej, okinuikakej uan okinmiktijkej tlakeualmej ika espada. San ne onicholo uan onimitsiluiko”.
16 Ijkuak ye ok otlajtojtoka, oajsito okse tlakatl uan okijto: “¡Tlitl tlen iaxka toTajtsin Dios* ouetski desde iluikak uan non tlitl okinchichino* ichkamej uan tlakeualmej! San ne onicholo uan onimitsiluiko”.
17 Ye ok otlajtojtoka ijkuak oajsito okse tlakatl uan okijto: “Caldeos okinchijkej eyi grupos, okinkitskijkej camellos uan okinuikakej. Noijki okinmiktijkej tlakeualmej ika espada. San ne onicholo uan onimitsiluiko”.
18 Ye ok otlajtojtoka ijkuak oajsito okse tlakatl uan okijto: “Motelpochuan uan mochpochuan otlakuajtokaj uan okonitokaj vino ikalijtik inmikni tlen achto oneski.
19 San niman omajkokuik se chikauak ejekatl kanin tlauaki, non ejekatl okiuitek naui iesquinas kali uan kali ouetski inpan mokoneuan uan okinmikti. San ne onicholo uan onimitsiluiko”.
20 Ijkuakon Job omoketski, okitsayanki itlaken uan nochi omokuaxinki. Satepan ouetski tlalpan, omotolo*
21 uan okijto:
“Nixipetstik onikiski ijtik nomamauan nixipetstik nimokopas.
Jehová kitemaka uan Jehová kitekixtilia.
Ok makiueyichiuakan itoka Jehová”.
22 Maski ijkon opanok, Job amo otlajtlakolchi nion amo okijto toTajtsin Dios okichi tlen amo kuali.
Notas
^ Xamo kijtosneki “akin kixnamikij”.
^ Noso “okimauiliaya”.
^ Noso “borregos”.
^ Ika hebreo “500 yuntas”.
^ Noso “sankuel”.
^ Noso “motlatiaj”.
^ Noso “inyolijtik”.
^ Xikita diccionario kanin kijtoua tlauijuikaltia.
^ Ika hebreo “ikoneuan akin melauak toTajtsin Dios”.
^ Noso “moyekmanaskej”, “motlatlaliskej”.
^ Noso “kimauilia”.
^ Noso “te tiknauatia”.
^ Noso “xikchiuili”.
^ Noso “otlakatki”.
^ Xamo “otlapetlanki”.
^ Noso “okintlati”.
^ Noso “omopacho”.
