Hechos de apóstoles 14:1-28
-
Ompa Iconio okintlauelitakej tokniuan pero miakej otlaneltokakej (1-7)
-
Ompa Listra okijtojkej apóstoles okatkaj dioses (8-18)
-
Pablo okimojmotlakej ika tetl pero amo oixpoliuik (19, 20)
-
Pablo uan Bernabé okinyolchikajkej discípulos (21-23)
-
Pablo uan Bernabé omokopkej Antioquía tlen kajki Siria (24-28)
14 Itech altepetl Iconio, Pablo uan Bernabé san sekan okalakej itech insinagoga* judíos. Miakej judíos uan griegos otlaneltokakej porque kuali okintlapouijkej.
2 Judíos tlen amo otlaneltokakej okinkuejsojkej akinmej amo judíos. Noijki okichijkej makintlauelitakan tokniuan.
3 Pablo uan Bernabé omoyolchikajkej uan miak tonal ompa omokajkej. Jehová okinmakak chikaualistli ikinon yejuan okitematiltijkej ye kitetliokolia tlen kuali. Noijki okinkauili makinchiuakan milagros tetlajtlachialtijkej uan ijkon okiteititi melauak tlen otetlapouiayaj.
4 Akinmej ochantiayaj itech non altepetl omoxexelojkej. Sekimej okinpaleuiayaj judíos uan oksekimej okinpaleuiayaj apóstoles.
5 Akinmej amo judíos omotlapouijkej inuan judíos uan intekiuajkej. Omotlapouijkej kintlajyouiltiskej Pablo uan Bernabé uan kinmojmotlaskej ika tetl.
6 Ijkuak yejuan okimatkej tlen kintoktiskiaj, ocholojkej uan oyajkej altepetl Listra, Derbe uan itech okseki altepemej tlen ik ompa okatkaj. Nonmej altepemej katej Licaonia.
7 Ompa otetlapouiayaj kuali tlajtoli.
8 Ompa Listra okatka* se tlakatl tlen amo ueli onejnemiaya. Ye ijkon oneski* ikinon amo keman onejnemiaya.
9 Non tlakatl okikaktoka tlen okijtouaya Pablo. Pablo okiyekitak uan okitak okineltokaya uelis pajtis,
10 ikinon chikauak okilui: “¡Ximoketsa!”. Ijkuakon tlakatl omoketeuak uan opejki nejnemi.
11 Ijkuak oksekimej okitakej tlen okichi Pablo, chikauak okijtojkej ika tlajtoli licaónica: “¡Dioses omokopkej tlakamej uan tonauak oualtemokej!”.
12 Ijkuakon Bernabé opejki kitokayotiaj Zeus. Pablo opejki kitokayotiaj Hermes porque ye okachi otlajtouaya.
13 Itemplo Zeus okatka itempa altepetl. Teopixki tlen ompa okatka okinualikak toros kanin okatkaj puertas uan coronas tlen okinchijkej ika xochitl. Teopixki uan oksekimej okinekiayaj kinueyichiuaskej Pablo uan Bernabé ikinon okinekiayaj kinmiktiliskej toros.
14 Apóstoles Bernabé uan Pablo okimatkej tlen okinekiayaj kichiuaskej ikinon okitlajkotsayankej intlaken, okalaktiajkej intlajko akinmej ompa okatkaj uan chikauak okijtojkej:
15 “Tlakamej, ¿tleka ijkon nankichiuaj? Tejuan noijki titlakamej ken namejuan uan noijki titlajyouiaj. Tejuan otimechtlapouikoj kuali tlajtoli para ayakmo xikchiuakan nin tlamantli tlen amitlaj ipati. Noijki xikueyichiuakan toTajtsin Dios tlen yoltok uan okichijchi iluikak, tlaltikpak, mar uan nochi tlen intech onka.
16 Yiuejkika ye okinkauili akinmej ochantiayaj itech altepemej makichiuakan tlen okinekiayaj.
17 Ye okitematilti akin ye ijkuak okinchiuili tlen kuali. Okichi makiaui uan kuali matlamochiua. Noijki okinmakak miak tlakuali uan okichi mayolpakikan”.
18 Maski Pablo uan Bernabé ijkon okinmiluijkej, oui okintlakaualtijkej amo makinueyichiuakan.
19 Satepan oajsitoj sekimej judíos tlen oualayaj Antioquía uan tlen oualayaj Iconio. Yejuan okichijkej oksekimej makitlauelitakan Pablo uan okimojmotlakej ika tetl. Ijkuak okitakej yokimiktijkej, okitilantiajkej uan okikixtijkej itech altepetl.
20 Ijkuak discípulos okajsitoj uan okiyaualojkej, ye omoketski uan oksepa okalak itech altepetl. Mostlatika, Pablo oyajki iuan Bernabé itech altepetl Derbe.
21 Ompa otetlapouijkej kuali tlajtoli uan okinpaleuijkej miakej mamochiuakan discípulos. Satepan omokopkej altepetl Listra, Iconio uan Antioquía.
22 Ompa okinyolchikajkej discípulos uan okinmiluijkej nochipa matlaneltokakan. Okinmiluijkej: “Moneki titlajyouiskej para tikalakiskej itech iTekiuajkayo toTajtsin Dios”.
23 Noijki okintlalijkej tlayekankej itech sejse tlanechikol, omotlatlaujtijkej, amo otlakuajkej* uan okinkajkej imak Jehová makinmalui porque okineltokayaj.
24 Satepan opanokej ik altepetl Pisidia uan oajsitoj Panfilia.
25 Ijkuak otlanki otetlapouijkej iTlajtol toTajtsin Dios itech altepetl Perga, oyajkej* altepetl Atalia.
26 Satepan otlejkokej itech se barco uan oyajkej Antioquía. Itech non altepetl tokniuan achto yokitlatlaujtijkaj toTajtsin Dios makinmalui para kintliokolis tlen kuali. Ijkon kichiuaskiaj tekitl tlen axkan yokitlamijkej.
27 Ijkuak oajsitoj, okinnechikojkej akinmej opouiayaj itech tlanechikol uan okintlapouijkej ken toTajtsin Dios okinpaleui makichiuakan nochi tlen okichijkej. Noijki okinmiluijkej toTajtsin Dios okintlapoli puerta akinmej amo judíos para matlaneltokakan.
28 Pablo uan Bernabé omokajkej miak tonal inuan discípulos.
Notas
^ Xikita diccionario.
^ Noso “oeuatoka”, “oyetoka”.
^ Noso “otlakatki”.
^ Noso “omosaujkej”.
^ Noso “otemokej”.
