Carta para Hebreos 1:1-14
1 Yiuejkika toTajtsin Dios miak uelta okintlapoui touejkatatajuan ika profetas uan ika okseki tlamantli.
2 Axkan itlamian ninmej tonalmej techtlapouia ika iKone. IKone okipaleui ijkuak okichijchi nochi tlen onka uan kaxkatilis nochi tlamantli.
3 Ye kiteititia iueyitilis toTajtsin Dios uan nochi okimokixti. Ika ichikaualis iTlajtol toTajtsin Dios kichikajtok nochi tlamantli. Okichipa totlajtlakol uan satepan omotlali iyekma toTajtsin Dios ompa tlakpak.
4 Ye omochi okachi ueyititok uan amo ken ángeles. Okikauilijkej okachi matlanauati uan amo ken ángeles.
5 ¿Kox se tonal toTajtsin Dios okilui se ángel: “Te tinokone uan axkan onimochi nimotajtsin”? ¿Kox se tonal okijto: “Ne niyetos niitajtsin uan ye mochiuas nokone”?
6 Pero ijkuak toTajtsin Dios oksepa kiualtitlanis ipan tlaltikpak iKone tlen achto okichijchi, kijtoua: “Nochtin iángeles toTajtsin Dios ixpan mamotlankuaketsakan”.
7 Ye noijki kijtoua itech ángeles: “Kichiua mayetokan chikauakej iángeles uan kichiua maxotlatokan ken tlitl akinmej kitekichiuiliaj”.
8 Pero itech iKone kijtoua: “ToTajtsin Dios nochipa yetos motrono uan moTekiuajkayo kuali tlanauatis.
9 Otikpatioitak tlen kuali uan otikkokoli tlen amo kuali. Ikinon moDios omitspejpenki ika aceite uan okichi okachi xipaki uan amo ijkon ken oksekimej tekiuajkej”.
10 Noijki kijtoua: “ToTeko, te yiuejkika otikpeualti tlaltikpak uan ika mochikaualis otikchijchi iluikak.
11 Iluikak uan tlaltikpak pojpoliuiskej pero te nochipa tiyetos. Iluikak uan tlaltikpak tlajtlamiskej ijkon ken se tlakemitl tlajtlami.
12 Te tikintetsilos* ijkon ken se tsotsoli uan ijkon ken se tlakemitl uan mopatlaskej. Pero te amo timopatla uan nochipa tiyoltos”.
13 ¿Kox se tonal toTajtsin Dios okilui se ángel: “Ximotlali noyekma hasta manikintlali mokxitlampa akinmej mitskokoliaj”?
14 ¿Amo nochtin ángeles kitekichiuiliaj toTajtsin Dios? ¿Amo toTajtsin Dios kinnauatia makinpaleuikan akinmej momakixtiskej?
Notas
^ Noso “tikinmilakatsos”.
