Carta para Filipenses 4:1-23
4 Nokniuan, ne namechtlasojtla uan nikneki namechitas. Namejuan nankichiuaj manipaki uan nanyetoskiaj ken nocorona. Ne namechtlasojtla uan oksepa namechiluia amo xikkauakan toTeko.
2 Nikintlatlaujtia Evodia uan Síntique makiyektlalikan ouijkayotl tlen kipiaj porque yejuan kitekichiuiliaj toTeko.
3 Tejuatsin nokni tlen melauak techpaleuijtinemi, nimitstlatlaujtia xikinpaleuijto nonmej siuamej. Yejuan mochijchikauaj nouan kitematiltiaj kuali tlajtoli noijki iuan Clemente uan oksekimej tlen nechpaleuiaj. Yejuan intoka ijkuilitok itech libro tlen kijtoua akinmej yoltoskej.
4 Nochipa xipakikan porque nankitekichiuiliaj toTeko. Oksepa namechiluia: ¡xipakikan!
5 Nochtin makimatikan namejuan nanteajsikamatij. ToTeko amo uejka kajki.
6 Amitlaj manamechtekipacho. Nochipa xiktlatlaujtikan toTajtsin Dios, xikiluikan manamechyekana uan nochipa xiktlasojkamatilikan.
7 Tla ijkon nankichiuaskej, iyolseuilis toTajtsin Dios tlen amikaj kajsikamati kimaluis namoyolo uan namotlayejyekol* por Cristo Jesús.
8 Nokniuan, saiktlami namechiluia nochipa ximokuayejyekokan* nochi tlamantli tlen melauak, nochi tlen ipati, nochi tlen kipaktia toTajtsin Dios, nochi tlen chipauak, nochi tlen kichiua matitetlasojtlakan, nochi tlen kitlakaitaj, nochi tlen kuali uan nochi tlen oksekimej kitaj kuali.
9 Xikchiuakan tlen onamechmachti uan onamechmatilti. Noijki xikchiuakan tlen onankikakej onikijto uan onankitakej onikchi, uan toTajtsin Dios tlen teyolseuia namouan yetos.
10 Sapanoua nipaki uan niktlasojkamatilia toTeko porque oksepa nankiteititiaj namechtekipachoua tlen nechpanoua. Maski onamechtekipachouaya tlen onechpanouaya, amo ueli onankiteititiayaj.
11 Amo ijkon nikijtoua porque amo nikpia tlen ika nimopanoltis. Ne yinikmati nipakis maski san ken niyetos.
12 Nikmati ken nimopanoltis ijkuak nikpia miak tlamantli uan ijkuak amo nikpia miak tlamantli. Ne nikmati tlen miakej amo kimatij: nipaki ijkuak nikpia tlen nikkuas uan ijkuak niapismiki. Noijki nipaki ijkuak nikpia miak tlamantli uan ijkuak amitlaj nikpia.
13 Nochi ueli nikchiua porque toTajtsin Dios nechmaka chikaualistli.
14 Pero namejuan kuali onankichijkej porque onantechpaleuijkej ijkuak onitlajyouijtoka.
15 Namejuan tlen nanmonechikouaj* Filipos, nankimatij ijkuak achto onankikakej kuali tlajtoli uan ne onikiski Macedonia, san namejuan onantechpaleuijkej uan onankiselijkej manamechpaleui.
16 Porque ijkuak onikatka Tesalónica, ome uelta onantechtitlanilijkej tlen onechpolouaya.
17 Ne amo nikneki manechtlatliokolikan. Ne san nikneki manamechteochiuakan porque nankichiuaj tlen kuali.
18 Ne nikpia okachi miak tlamantli uan amo san tlen nechpoloua. Nikpia nochi tlen nechpoloua porque Epafrodito onechmakak tlen onantechtitlanilijkej: se tetliokolil ajuiak tlen toTajtsin Dios kiselia uan kipaktia.
19 NoDios iaxka nochi tlen onka. Ye kiluis Cristo Jesús manamechmaka nochi tlen namechpoloua.
20 Nochipa makiueyichiuakan toTajtsin Dios. Amén.
21 Techintlajpalilikan nochtin tokniuan yolchipauakej tlen katej iuan Cristo Jesús. Namechontlajpalouaj tokniuan tlen nouan katej.
22 Namechontlajpalouaj nochtin tokniuan yolchipauakej, pero okachi namechontlajpalouaj akinmej chantij ichan César.
23 ToTeko Jesucristo manamechtliokoli tlen kuali porque nankipiaj kuali namoyolo.
