Carta para Efesios 6:1-24
6 Konemej, xikintlakamatikan* namopapanuan ken kineki toTeko porque ijkon moneki nankichiuaskej.
2 “Xiktlakaita mopapa uan momama”. Non achto tlanauatil kitemaka nin tlateochiuali:
3 “Ijkon kuali tiyetos uan tiyoltos miak xiuitl nikan tlaltikpak”.
4 Tetajmej, amo xikinkualanijtokan namokoneuan. Xikinmiskaltikan, xikinyektlapouikan uan xikinmachtikan ken Jehová kineki.
5 Tlakeualmej, ika nochi namoyolo xiktlakamatikan* uan xiktlakaitakan namoteko ken yetoskia nankitlakamatij* Cristo.
6 Amo ijkon xikchiuakan san ijkuak namechitaskej para nankinyolpaktiskej oksekimej. Xikchiuakan ken itlakeualuan Cristo porque yejuan ika nochi inyolo kichiuaj tlen kineki toTajtsin Dios.
7 Xipakikan ijkuak nankitekichiuiliaj namoteko ken yetoskia nankitekichiuiliaj Jehová uan amo tlakamej.
8 Porque namejuan nankimatij Jehová kinteochiuas akinmej kichiuaj tlen kuali. Ye kinteochiuas maski tlakeualmej noso amo tlakeualmej.
9 Namejuan tlen nankinpiaj namotlakeualuan, xikinmitakan ken moneki uan amo xikinmomojtikan. Porque nankimatij namejuan uan yejuan nankipiaj san se namoTeko ompa iluikak uan ye amo techikoita.
10 Saiktlami nikneki namechiluis, nochipa xikselikan ichikaualis toTeko porque ye kipia miak chikaualistli.
11 Xikmotlalilikan nochi tlen toTajtsin Dios namechmaka para nankimomakaskej uan ijkon uelis nanmoyekketoskej ijkuak Diablo namechtlalilis trampas.
12 Porque tejuan amo tikmomakaj inuan tlakamej. Tejuan tikmomakaj inuan tekiuajkej, akinmej tlayekanaj uan akinmej tlanauatiaj ipan nin tlaltikpak kanin tlayoua, nin kijtosneki ejekamej* tlen katej iluikak.
13 Ikinon xikmotlalilikan nochi tlen namechmaka toTajtsin Dios para nankimomakaskej. Ijkon uelis nantlaxikoskej ijkuak ajsis tonal tlen amo kuali. Noijki ijkon nanmoyekketoskej porque onanmochijchikajkej onankichijkej tlen moneki.
14 Ximoyekketokan uan ximotlajkoilpikan ika tlen melauak. Xikchiuakan tlen kuali ken yetoskia nankipixtokej tepostli tlen kimaluia namoelpan.
15 Noijki ximokaktikan* uan xiktematiltikan kuali tlajtoli tlen kitemaka yolseuilistli.
16 Noijki xitlaneltokakan ken yetoskia nankikitskijtokej se ueyi escudo. Ijkon uelis nankinseuiskej iflechas Satanás tlen xotlatokej.
17 Noijki xikmokuatlalilikan tepostli tlen temakixtia. Uan xikpiakan iTlajtol toTajtsin Dios ken se espada tlen kitemaka espíritu santo.
18 Nochipa manamechyekana espíritu santo ijkuak nanmotlatlaujtiskej. Nochi xikiluikan toTajtsin Dios uan xiktlatlaujtikan. Ikinon moneki xiijsatokan uan nochipa ximotlatlaujtikan inpatka nochtin tokniuan yolchipauakej.
19 Noijki nopatka ximotlatlaujtikan uan ijkon niyetos niyolchikauak uan kuali nitlajtos ijkuak niktematiltis kuali tlajtoli santo tlen amo omomatiaya.
20 ToTajtsin Dios onechtitlanki manitetlapoui kuali tlajtoli ikinon nilpitok ika cadenas. Nopatka ximotlatlaujtikan para amo manimomojti ijkuak niktematiltis kuali tlajtoli ijkon ken moneki.
21 Tíquico namechtlapouis nochi tlen nikchiua uan ken nika. Ye tiktlasojtlaj uan nochipa kitekichiuilia toTeko.
22 Niktitlani manamechiluiti ken tikatej uan noijki manamechyolchikauati.
23 ToTajtsin Dios uan toTeko Jesucristo makinpaleuikan tokniuan makipiakan yolseuilistli, makinpaleuikan mamotlasojtlakan uan matlaneltokakan.
24 ToTajtsin Dios makintliokoli tlen kuali akinmej nochipa kitlasojtlaj toTeko Jesucristo.
Notas
^ Noso “xikinuelkakikan”.
^ Noso “xikuelkakikan”.
^ Noso “nankiuelkakij”.
^ Noso “demonios”.
^ Noso “ximohuarachtikan”.
