Deuteronomio 32:1-52
32 “Iluikak techkaki uan ne nitlajtosuan tlaltikpak makinkaki tlajtolmej tlen kinmijtos nokamak.
2 Tlen nitlamachtia uetsis ken kiauitl,notlajtoluan chipiniskej ken ajuachtli,ken ijkuak san tepitsin kiaui kanin tlaxijyouan ken ijkuak chikauak kiaui kanin kojyo.
3 Porque niktematiltis itoka Jehová.
¡Xiktematiltikan iueyitilis toTajtsin Dios!
4 Ye se Ueyi Tetl* uan nochi tlen kichiua ajsitok,porque nochi iojuiuan melauakej.
ToTajtsin Dios amo tekaua uan amo keman kichiua tlen amo kuali.Ye yolkuali uan kichiua tlen kuali.
5 Namejuan onanmoijtlakojkej.
Amo nanikoneuan toTajtsin Dios uan non namejuan namotlajtlakol.
Namejuan amo nanyolkualmej uan nankichiuaj tlen amo kuali.
6 Namejuan se altepetl tlen xoxo* uan amo ixtlamatki,¿moneki ijkon nankitoktiskej* Jehová?
¿Amo ye namoTajtsin akin okichi xiyoltokan,akin onamechchi uan okichi kuali xiyetokan?
7 Xikilnamikikan tlen yopanok,ximokuayejyekokan* tlen opanok yiuejkika.
Xikintlajtlanikan namopapanuan uan yejuan namechtlapouiskej,xikintlajtlanikan akinmej yokokoxkatikej* uan yejuan namechiluiskej.
8 Ijkuak akin Ueyititok okimakak itlal sejse altepetl,ijkuak okinxexelo ikoneuan Adán,ye okitlali hasta kanin tlantoskia sejse intlalporque okimatiaya keski okatkaj ikoneuan Israel.
9 Ijkon ken non altepetl iaxka Jehová,Jacob noijki iaxka.
10 Ye okajsik kanin tlauaki,ompa kanin tlauaki uan amitlaj onka kanin mokakij tsajtsij yolkamej.
Okiyaualo para kimaluis, okipaleuiuan okimalui ken ixtololo.
11 Ken se águila tlen mopapatlatsa itech itepajsol,ken ijkuak kinmititia ikoneuan mapatlanikan,kinpatlaua iajasuan,* kinkitskiauan kinuika ipan ijuio,
12 san Jehová okiyekanaya Jacob,nion se dios tlen oksekan kiueyichiuaj iuan okatka.
13 Ye okichi manemi kanin tlauejkapanuan okikua tlen tlaki* ipan tlali.
Okitlamakak ika neujtli* tlen okatka itech ueyi tepexitluan aceite tlen okatka itech tetl tlakuauak,*
14 okimakak mantequilla tlen okichiuayaj ika inleche vacas, noijki okimakak inleche ichkalamamej* uan tentsolamamej,okimakak inchiauak ichkamej,ichkamej* tlen okatkaj Basán uan tentsomej okichtin,noijki ika kuajkuali trigo.Ye okonik vino tlen kisa itech iayo uvas.
15 Ijkuak Jesurún* omotoma, oteixnamik uan opejki tlatejteliksa.
Te otimotoma, otietiak uan otixuik.*
Ijkuakon ye okika toTajtsin Dios akin okimakak iyolilisuan okitlauelitak Ueyi Tetl tlen okimakixti.
16 Yejuan okikualanijkej ika dioses tlen oksekan kinueyichiuaj,okikualanijkej ijkuak okichijkej tlen tetlajyalti.
17 Yejuan amo okimakakej toTajtsin Dios tetliokolilmej, okintlatliokolijkej ejekamej,*dioses tlen amo okinmixmatiayaj,dioses tlen yikin okinmixmatkejuan dioses tlen inuejkatatajuan amo okinmixmatiayaj.
18 Te altepetl Israel otikilka Ueyi Tetl, ye moTajtsinuan amo otikilnamik toTajtsin Dios akin omitsmakak moyolilis.
19 Ijkuak Jehová ijkon okitak ayakmo okinseliporque itelpochuan uan ichpochuan okikualanijkej.
20 Ikinon okijto: ‘Nikinkauas*uan nikitas tlen kinpanos.
Porque yejuan amo yolkualmejuan ayakmo nikinneltokilia.
21 Yejuan onechkualanijkej ijkuak okiueyichijkej se dios tlen amo melauak dios,onechkualanijkej ijkuak omotlankuaketskej inmixpan imágenes tlen amitlaj inpati.
Ikinon nikinnejnekis* akinmej amo pouij itech se altepetl para mamoxikokan,niknejnekis* se altepetl tlen amo ixtlamatki para nikinkualanis.
22 Sapanoua onikualanki hasta otlaxotlakuan non tlitl tlachichinos* hasta tlaijtik Mikatekochtli,*kichichinos tlali uan tlen kitemaka,noijki kichichinos kanin motlakxilijtokej tepemej.
23 Nikchiuas okachi matlajyouikan,yetoskia ken nikinmojmotlas ika nochi noflechas.
24 Sotlauaskej porque amo kipiaskej tlen kikuaskej,sapanoua kipiaskej totonik uan mikiskej.
Nikintitlanilis tekuanimej tlanueueyakejuan inveneno yolkamej tlen motilanaj ipan tlali.
25 Kiauak inkoneuan kinmiktiskej ika espadauan inkalijtik fiero momojtiskejtelpochmej, ichpochmej tlen ayamo motekaj iuan se tlakatl,konemej uan tlakamej tlen yokuaistayakej.
26 Ne nikinmiluiskia: “Nikinxitinis uan nikchiuas,intlajkotia tlakamej ayakmo makinmilnamikikan”.
27 Pero onechtekipacho tlen kichiuaskiaj akinmej kinkokoliaj,porque akinmej kinkokoliaj amo ijkon kajsikamatiskej.*
Yejuan xamo kijtoskej: “Ika tochikaualis otikintlanilijkej,amo ye Jehová akin ijkon okichi”.
28 Porque yejuan amo kuali mokuayejyekouaj*uan amitlaj kajsikamatij.*
29 ¡Tla yejuan yetoskia ixtlamatkej, itech nochi non mokuayejyekoskiaj!*
Mokuayejyekoskiaj tlen panoskia tla ijkon kichiuaskiaj.
30 ¿Kox uelis san se tlakatl kinkuitlapantokas mil tlakamejnoso uelis ome tlakamej kichiuaskej macholokan diez mil tlakamej?
Uelis ijkon kichiuaskej, tla Dios akin se Ueyi Tetl kinnemakaskiauan tla Jehová kintemaktiliskia inmak akinmej kinkokoliaj.
31 Dios akin se Ueyi Tetl amo ijkon ken tetl tlen yejuan kipiaj,hasta akinmej kinkokoliaj noijki kimatij.
32 Porque uvajkouitl tlen inmiaxka kisa itech uvajkouitl tlen kajki Sodomauan itech itlala Gomorra.
Inuvas kipiaj venenouan sejse inmanojo chichik.
33 Invino ken inveneno kouamej,ken inveneno cobras.
34 Nochi tlen kichiuaj niktsakua ika se sellouan kuali niktlatia.
35 Ne nimomakopas uan ne nikintlajyouiltis,ijkuak yomoijto uetsiskej.Yiajsis tonal ijkuak tlajyouiskejuan san niman kinpanos tlen yomoijto’.
36 Jehová kixkomakas ialtepeuan kinmiknomatis itekipanojkauanijkuak kinmitas ayakmo chikauakej,ijkuak kitas san omokajkej akinmej amikaj kinpaleuia uan akinmej amo chikauakej.
37 Ijkuakon kijtos: ‘¿Kanin katej indiosesuan tetl kanin omopaleuiayaj,
38 akinmej okikuayaj inchiauak yolkamejuan akinmej okoniayaj vino tlen okitetliokoliayaj?
Yejuan mameuakan uan manamechpaleuikan
uan intech ximopaleuikan.
39 Kuali xikitakan san ne niDiosuan amo katej oksekimej dioses.
Ne nitemiktia uan niteyolitia.
Ne nitekojkoua uan nitepajtiauan nomak amikaj uelis kimakixtiskej.
40 Nikajkoui noma ik iluikakuan nikijtoua:* “Ijkon ken ne melauak nochipa niyoltok”,
41 ijkuak niktentis noespada tlen petlaniuan nikyektlalis noma para nikchiuas tlen kuali,nimomakopas de akinmej nechtlauelitajuan nikintlajyouiltis akinmej nechkokoliaj.
42 Nikinuintis noflechas ika estli,ika inmieso akinmej yomikej uan akinmej tsaktokej.Noespada kikuas nakatluan intsonteko akinmej kinyekanaj akinmej nechkokoliaj’.
43 Namejuan akinmej nanchantij itech okseki altepemej xipakikan iuan ialtepe toTajtsin Dios,ye momakopas inpatka itekipanojkauan,momakopas de akinmej kitlauelitaj,kichipauas intlajtlakol tlen okichijkej itech intlal akinmej pouij itech altepetl”.
44 Moisés okinmijtoto nonmej tlajtolmej tlen kipia non tlakuikali inmixpan akinmej pouij itech altepetl. Ye oyajki iuan Hosea* ikone Nun.
45 Ijkuak Moisés otlanki ijkon okinmilui nochtin israelitas,
46 okijto: “Xikneltokakan tlen axkan namechnejmachtijtok uan xikinnauatikan namokoneuan makichiuakan nochi tlen ijkuilitok itech Tlanauatil.
47 Porque miak ipati tlen namechiluijtok uan non uelis kichiuas xiyoltokan. Ika tlen namechiluijtok, uelis nanyoltoskej miak xiuitl itech tlali tlen nankimoaxkatiskej ijkuak nankipanouiskej aueyatl* Jordán”.
48 Non tonal Jehová omotlapoui iuan Moisés uan okilui:
49 “Xitlejko itech tepetl Nebo tlen kajki Abarim, tlen kajki itech itlal Moab kanin mota Jericó, para tikitas tlali tlen kajki Canaán tlen nikinmaxkatilis israelitas.
50 Itech tepetl kanin titlejkos ompa timikis uan mitstokaskej inuan mouejkatatajuan,* ijkon ken mokni Aarón omiki itech tepetl Hor uan okitokakej inuan iuejkatatajuan.
51 Porque nanmomej onankatkaj intlajkotia israelitas kanin okiski atl, ompa Meribá tlen kajki Cadés ompa Zin kanin tlauaki, ompa namejuan amo onantechtlakamatkej* uan amo onankiteititijkej nisanto inmixpan nochtin israelitas.
52 San uejka tikitas non tlali pero amo tikalakis itech tlali tlen ne nikinmakas israelitas”.
Notas
^ Noso “tepexitl”.
^ Noso “kuatlapoloua”, “mijmiki”, “leyo”.
^ Noso “nankichiuiliskej”.
^ Noso “ximonejneuilikan”.
^ Noso “youeuejtikej”, “yochikauakej”, “yitetajtsitsin”.
^ Noso “imajtlapaluan”, “imastikapaluan”.
^ Noso “mochiua”, “pankisa”.
^ Noso “miel”.
^ Ika hebreo “tepexitl de pedernal”.
^ Noso “borregas”.
^ Noso “carneros”, “borregos”.
^ Kijtosneki “akin yolkuali”. Ijkon oteueyitlaliayaj uan ijkon okitlalilijkej altepetl Israel.
^ Noso “otipachi”.
^ Noso “demonios”.
^ Ika hebreo “niktlatis noixko”.
^ Noso “nikintekitiltis”, “nikinkuis”.
^ Noso “niktekitiltis”, “nikuis”.
^ Noso “kitlatis”.
^ Ika hebreo Seol. Xikita diccionario.
^ Noso “kinejneuiliskej”.
^ Noso “monejneuiliaj”.
^ Noso “kinejneuiliaj”.
^ Noso “monejneuiliskiaj”.
^ Noso “niksentlalia”, “niktemaka notlajtol”.
^ Ijkon omotokayotiaya Josué. Ijkon moijkuiloua ijkuak san tlajko moijtoua Hosaya, non tokayotl kijtosneki “okimakixti Jah” noso “Jah temakixtia”.
^ Noso “atenko”, “atitla”, “apan”.
^ Ika hebreo “timonechikoti iuan moaltepe”. Ijkon okijtouayaj ika kualtsin tlajtoli ijkuak ikaj omikiaya.
^ Noso “onantechuelkakej”.
