Deuteronomio 28:1-68
28 “Tla melauak nankikakij itlajtol Jehová namoDios uan nankitlakamatij* nochi tlen ye namechiluia tlen axkan namechnauatijtok, Jehová namoDios namechueyitlalis amo ken okseki altepemej tlen katej tlaltikpak.
2 Tla nochipa nankikakij itlajtol Jehová namoDios, ye namopan kinokis* nochi nin itlateochiualis:
3 Namechteochiuaskej itech altepetl uan itech tlala”.
4 “Kinteochiuaskej namokoneuan, tlen tlakis* namotlal uan inkoneuan namovacas uan namochkauan”.*
5 “Kiteochiuaskej namochiki uan kanin nankineloskej tixtli”.
6 “Kiteochiuaskej nochi tlen nankichiuaskej”.
7 “Jehová kichiuas namoixpan makintlanilikan akinmej namechkokoliaj tlen namechixnamikiskej. San sekan namechixnamikiskej pero moxixiniskej ijkuak namechcholiliskej.
8 Jehová tlanauatis manamechteochiuakan kanin nankinechikouaj namotlakual uan noijki makiteochiuakan tlen nankichiuaj uan namechteochiuas itech tlali tlen Jehová namoDios namechmakas.
9 Jehová kichiuas xiyetokan ialtepe santo ijkon ken onamechilui,* tla nankitlakamatij itlanauatiluan Jehová namoDios uan nannemij itech iojuiuan.
10 Nochtin oksekimej altepemej kitaskej namejuan nankipiaj itoka Jehová uan namechimakasiskej”.*
11 “Jehová kichiuas xikinpiakan miakej namokoneuan, namoyolkauan uan tlamochiuas ipan tlali tlen Jehová okinmilui namouejkatatajuan namechmakaskia.
12 Jehová namechtlatlapolis ompa iluikak kanin kipixtok miak tlamantli, para kichiuas makiaui ipan tlali ijkuak moneki uan para kiteochiuas nochi tlen nankichiuaskej. Namejuan nankintlanetiskej miakej altepemej pero namejuan amitlaj nankintlaneuiliskej.
13 Tla nankitlakamatij uan nankichiuaj tlen kijtouaj itlanauatiluan Jehová namoDios tlen axkan namechnauatijtok, Jehová namechueyitlalis uan amo kitekauilis manamechnauatikan. Namejuan nanyetoskej tlakpak uan amo tlakxitlan.
14 Amo xiuiaj itech se ojtli tlen amo kuali, nion ik namoyekma nion ik namoopochma para nankintokaskej uan nankintekichiuiliskej oksekimej dioses”.
15 “Pero tla amo nankikakij itlajtol Jehová namoDios uan amo nankintlakamatij* itlanauatiluan uan tlen ye namechiluia xikchiuakan, tlen axkan ne namechiluijtok, namechuijuikaltiskej* uan namechpanos nin tlamantli amo kuali:
16 Namechuijuikaltiskej itech altepetl uan noijki itech tlala”.
17 “Namochiki uan kanin nankinelouaj namotix amitlaj kipias porque namechuijuikaltiskej”.
18 “Ye amo namechteochiuas ika miakej namokoneuan, namotlala amo miak tlamochiuas uan noijki amo nankinpiaskej miakej torojkonemej nion ichkakonemej”.*
19 “Namechuijuikaltiskej ijkuak nankalakiskej uan ijkuak nankisaskej”.
20 “Jehová kichiuas amo kuali makisa nochi tlen nankichiuaskej porque onankichijkej tlen amo kuali uan onankikajkej. Noijki kichiuas ximomojtikan uan namechtlajyouiltis hasta nanpojpoliuiskej uan san niman nanmikiskej.
21 Jehová kichiuas kokolistli namotech mamopepecho hasta ijkuak namechpojpolos itech tlali tlen nankimoaxkatiskej.
22 Jehová namechtlajyouiltis ika tuberculosis, sapanoua nankipiaskej totonik, nanposauiskej, nantotonkamikiskej, nantlajyouiskej ika espada, chikauak totonkaejekas uan namoplantas uakiskej. Nochi non namechpanos hasta nanmikiskej.
23 Iluikak tlen kajki ikpak* namotsonteko yetos de cobre uan tlali tlen kajki itlampa namokxiuan yetos de tepostli.
24 Jehová kichiuas kiauitl tlen uetsis namotlal, mamokopa tlalpinoli* uan xali, desde iluikak namopan uetsis hasta namechpojpolos.
25 Jehová kichiuas manamechtlanilikan inmixpan akinmej namechkokoliaj. San sekan nankinmixnamikiskej pero nanmoxixiniskej ijkuak nankincholiliskej. Uan nochtin tekiuajkayomej tlen katej tlaltikpak momojtiskej miak ijkuak namechitaskej.
26 Ijkuak nanmikiskej, namechkuaskej nochtin totomej* tlen katej iluikak uan nochtin yolkamej tlen katej ipan tlali uan amikaj kinmomojtis”.
27 “Jehová namechtlajyouiltis uan nantemalkisaskej ijkon ken opanok Egipto, nantsinsauayokisaskej, nansauatiskej uan namechajsis okseki kokolistli ipan namonakayo. Ijkuak namechajsis non kokolistli amo uelis nanpajtiskej.
28 Ijkuak Jehová namechtlajyouiltis kichiuas xikuatlapolokan, amo xitlachiakan uan amo nankimatiskej tlen nankichiuaskej.
29 Tlajkotonal amo nankimatiskej kanin nanyaskej ijkon ken kipanoua akin amo tlachia porque ipan tlayouatok, nochi tlen nankichiuaskej amo kuali kisas, namechkajkayauaskej uan san namechtlachtekilijtoskej pero amikaj namechpaleuis.
30 Nankijtlaniskej se siuatl pero okse tlakatl kichiualtis iuan mamoteka. Nankichiuaskej se kali pero amo ompa nanchantiskej. Nankitokaskej uvas pero amo nankikuaskej ijkuak tlakis.
31 Namoixpan kimiktiskej namotoro pero amo nankikuaskej inakayo, namoixpan kichtekiskej namoburro pero amo oksepa nankajsiskej. Kinmakaskej namochkauan akinmej namechkokoliaj uan namejuan amikaj namechpaleuis.
32 Nankitaskej ijkuak kintemaktiskej namokoneuan okse altepetl, namejuan nochipa nankinmilnamikiskej pero amitlaj uelis nankichiuaskej.
33 Se altepetl tlen ayamo nankixmatij kikuas tlen tlakis namotlala uan nochi tlen ompa motemakas. Nochipa namechkajkayauaskej uan namechpatlachoskej.
34 Tlen nankitaskej kichiuas xikuatlapolokan”.
35 “Jehová namechtlajyouiltis ijkuak kichiuas xitemalkisakan itech namotlankuauan uan namometsuan,* desde namokxitlampa hasta ipan namotsonteko, fiero namechkokos uan amo nanpajtiskej.
36 Jehová namechuikas uan noijki kiuikas tekiua tlen nankitlaliskej manamechnauati, itech okse altepetl tlen amo nankixmatij nion namouejkatatajuan okixmatkej. Ompa nankintekichiuiliskej oksekimej dioses de kouitl uan de tetl.*
37 Itech nochi altepemej kanin Jehová namechuikas momojtiskej porque kimatiskej tlen onamechpanok, namechuetskiliskej uan namechpinauiskej”.
38 “Nankiuikaskej namotlala miak semilla pero amo miak nantlaololoskej porque chapulimej kikuaskej.
39 Nankitokaskej uvas uan nankimaluiskej, pero amo nankoniskej vino nion itlaj nankololoskej porque okuili nochi kikuas.
40 Itech nochi namotlal nankipiaskej olivos pero amo nankimotlaliliskej aceite porque namoaceitunas uetsiskej.
41 Nankinpiaskej namokoneuan pero ayakmo yetoskej namoaxkauan porque kinuikaskej.
42 Miakej okuilimej kintlamiskej nochi namokojuan uan tlen motemakas itech namotlal.
43 Akinmej uitsej itech okseki altepemej tlen namouan chantij okachi mochikajtiaskej uan namejuan nankipolojtiaskej namochikaualis.
44 Yejuan namechtlanetiskej pero namejuan amo nankintlanetiskej. Yejuan ueyititoskej uan namechnauatiskej”.
45 “Namechuijuikaltiskej uan namechpanos nin tlamantli amo kuali hasta nanpojpoliuiskej, porque amo onankikakej itlajtol Jehová namoDios, amo onankintlakamatkej* itlanauatiluan uan tlen ye onamechilui xikchiuakan.
46 Namejuan uan namoxuiuan nochipa ijkon namechpanos, non itlaj kinextis uan tlanejmachtis.
47 Porque ijkuak amitlaj onamechpolo uan miak onankipixkej, amo onankitekichiuilijkej Jehová namoDios ika pakilis uan amo onanyolpakej.
48 Jehová kintitlanis akinmej namechkokoliaj manamechixnamikikan, ijkuak nankintekichiuiliskej nanapismikiskej, nanamikiskej, amo nankipiaskej miak namotlaken uan nochi namechpolos. Ye namechkechtlalilis se tepostli hasta namechpojpolos”.
49 “Jehová kititlanis se altepetl tlen uejka yetos manamechixnamiki, non altepetl kajki hasta okse ilado tlaltikpak. Itlajtol amo nankajsikamatiskej* uan namopan yas ken se águila.
50 Non altepetl kualankamiktos uan amo kintlakaitas akinmej yokokoxkatikej* nion kinmiknomatis telpochmej.
51 Yejuan kinkuaskej inkoneuan namoyolkauan uan tlen mochiuas ipan namotlal hasta namechpojpoloskej. Amo namechkauiliskej semillas, nion vino yankuik, nion aceite, nion torojkonemej, nion ichkakonemej hasta namechpojpoloskej.
52 Tlatsakuaskej itech nochi namoaltepeuan tlen yetoskej itech namotlal uan amo uelis nankisaskej, ijkon panos hasta mauetsi tepamitl uejkapantik uan chikauak tlen ika nanmopaleuiaj. Namechtsajtsakuaskej itech nochi altepemej tlen katej itech tlali tlen Jehová namoDios onamechmakak.
53 Ijkuakon monekis nankinkuaskej namokoneuan, nankikuaskej innakayo namokoneuan tlen Jehová namoDios okichi xikinpiakan. Ijkon panos porque namechtsajtsakuaskej uan akinmej namechkokoliaj kichiuaskej san ximotekipachojtokan”.
54 “Tlakatl tlen namouan kajki, akin okachi yolyamanki uan amitlaj kipoloua noijki amo kiknomatis ikni, nion isiua tlen kitlasojtla, nion ikoneuan tlen ok iuan yetoskej
55 uan amitlaj kinyekoltis ijkuak kinkuas ikoneuan. Ye ayakmo itlaj kipias porque akinmej namechkokoliaj kintsajtsakuaskej namoaltepeuan uan kichiuaskej san ximotekipachojtokan.
56 Uan siuatl tlen namouan kajki, tlen yolkuali uan amitlaj kipoloua, tlen amo keman okijto moketsas ipan tlali porque amo keman itlaj okipolo, amo kiknomatis inamik tlen kitlasojtla nion ikoneuan.
57 Noijki amo kiknomatis placenta tlen kisas itsala imetsuan* nion ikoneuan tlen kinpias. Ye ichtaka kinkuas porque akinmej namechkokoliaj kintsajtsakuaskej namoaltepeuan uan kichiuaskej ximotekipachokan miak”.
58 “Tla amo nankitlakamatij nochi tlen kijtoua nin Tlanauatil, tlen ijkuilitok itech nin libro uan amo sapanoua nankitlakaitaj* nin tokayotl ueyititok uan tetlajtlachialti, kijtosneki itoka Jehová namoDios,
59 Jehová kichiuas namejuan uan namoxuiuan xikpiakan chauistli temomojti, ueyi chauistli tlen uejkauas uan kokolistli tekoko tlen uejkauas.
60 Ye kichiuas oksepa xitlajyouikan ika kokolistli tlen opanok Egipto, tlen namejuan onankimakasiayaj* uan amo nanpajtiskej.
61 Jehová noijki kichiuas xitlajyouikan ika kokolistli noso chauistli tlen amo kajki itech libro kanin ijkuilitok Tlanauatil, ijkon namechpanos hasta ijkuak nanpojpoliuiskej.
62 Maski onankatkaj sapanoua nanmiakej ijkon ken sitlalimej tlen katej iluikak, amo miakej nanmokauaskej porque amo onankikakej itlajtol Jehová namoDios”.
63 “Ijkon ken Jehová kuali okitak namechteochiuas uan namechmiakilis, Jehová noijki kuali kitas namechpojpolos uan namechtlajtlamis. Namechkixtiskej itech tlali tlen yinamechmakaskej para mayeto namoaxka”.
64 “Jehová namechxexelos itech nochi altepemej, desde kanin peua tlali hasta kanin tlami, ompa monekis nankintekichiuiliskej dioses de kouitl uan de tetl, tlen nion namejuan nion namouejkatatajuan okinmixmatkej.
65 Ijkuak nanyetoskej itech nonmej altepemej amo nankipiaskej yolseuilis nion nankipiaskej kanin nankiseuiskej namokxi. Jehová kichiuas namoyolo mamotekipacho, namoixtololouan masotlauakan uan amo nankimatiskej tlen nankichiuaskej.
66 Nankixnamikiskej mikilis, tlajka uan youak nanmomojtiskej uan amo nankimatiskej kox ok nanyoltoskej.
67 Namoyolo fiero momojtis uan tlen nankitaskej kichiuas kualkan* xikijtokan: ‘¡Niknekiskia yimatiotlaki!’ uan tiotlak nankijtoskej: ‘¡Niknekiskia yimatlanesi!’.
68 Jehová kichiuas ximokopakan Egipto itech barco, nanyaskej ik ojtli tlen onamechilui ayakmo keman nankitaskiaj. Ompa monekis nanmonemakaskej innauak akinmej namechkokoliaj para nanyetoskej intlakeualuan pero amikaj namechkouas”.
Notas
^ Noso “nankiuelkakij”.
^ Noso “kimimilos”, “kixauanis”, “kitoyauas”.
^ Noso “tlamochiuas”, “tlapankisas”.
^ Noso “namoborregos”.
^ Noso “okisentlali”, “okitemakak itlajtol”.
^ Noso “namechmauiliskej”.
^ Noso “nankinuelkakij”.
^ Xikita diccionario kanin kijtoua tlauijuikaltia.
^ Noso “koneborregos”.
^ Noso “ikuapak”.
^ Noso “teutli”, “tlalnixtli”.
^ Noso “pilinchimej”, “pájaros”.
^ Noso “namokesuan”.
^ Noso “tepexitl”.
^ Noso “onankinuelkakej”.
^ Noso “nankinejneuiliskej”.
^ Noso “youeuejtikej”, “yochikauakej”, “yitetajtsitsin”.
^ Noso “ikesuan”.
^ Noso “nankimauiliaj”.
^ Noso “onankimauiliayaj”.
^ Noso “sankuel”.
