Deuteronomio 14:1-29
14 “Namejuan nanikoneuan Jehová namoDios. Amo ximotejtekikan nion xikximakan namoixkuak por ikaj tlen yomiki.
2 Porque namejuan se altepetl santo para Jehová namoDios uan de nochtin altepemej tlen katej tlaltikpak Jehová onamechpejpenki para xiyetokan ialtepe tlen kipatioita”.
3 “Amo xikkuakan itlaj tetlajyalti.
4 Ninmej yolkamej uelis nankinkuaskej: toro, ichka,* tentso,
5 masatl, gacela, corzo,* tentso tlen kajki tepeyo, antílope, ichka tlen amo mansojtsin uan ichka tlen kajki tepeyo.
6 Uelis nankinkuaskej yolkamej tlen nochi tlajkoxelitok inmiste uan ome uelta kikuechouaj intlakual.
7 Pero amo xikinkuakan ninmej yolkamej tlen ome uelta kikuechouaj intlakual noso tlajkoxelitok inmiste: camello, conejo uan damán,* porque ome uelta kikuechouaj intlakual pero amo tlajkoxelitok inmiste, nonmej yolkamej sokiojkej para namejuan.
8 Noijki amo xikkuakan pitsotl* porque tlajkoxelitok iste pero amo kikuechoua itlakual ome uelta, non yolkatl sokio para namejuan. Amo xikinkuakan nonmej yolkamej nion xikinkitskikan ijkuak yomikej”.
9 “De nochtin yolkamej tlen katej ijtik atl, uelis nankinkuaskej nochtin yolkamej tlen kipiaj aletas uan escamas.
10 Pero amo xikkuakan se yolkatl tlen amo kipia aletas nion escamas, non sokio para namejuan”.
11 “Uelis nankikuaskej san tlen tototl* chipauak.
12 Pero amo xikinkuakan ninmej yolkamej: águila, águila tlen michkitskia, tsojpilotl tliliuik,
13 kuixi* chichiltik, kuixi tliliuik nion tlatlamantli kuixi,
14 nion tlatlamantli kakalotl,*
15 avestruz,* tekolotl,* gaviota,* nion tlatlamantli halcón,*
16 tekolotl tsikitsin, tekolotl tlen kinpia uejueyij inakasuan, cisne,*
17 pelícano, tsojpilotl, kakalotl* tlen michkitskia,
18 cigüeña,* nion tlatlamantli garza, tototl abubilla,* nion tsinaka.*
19 Noijki nochtin okuilimej tlen kinpiaj inmiajasuan* sokiojkej para namejuan, amo xikinkuakan.
20 Uelis nankinkuaskej nochtin yolkamej chipauakej tlen patlanij”.
21 “Amo xikkuakan tla nankajsiskej se yolkatl tlen yomiki. Uelis nankimakaskej akin oksekan uits tlen chanti namoaltepe uan ye uelis kikuas. Noso uelis nankinemakiltiskej akin uits itech okse altepetl porque para Jehová namoDios namejuan se altepetl santo”.
“Amo xikposonikan se tentsojkonetl ijtik ileche imama”.
22 “Sejse xiuitl nankitemakaskej se majtlaktli parte tlen kitemakas semilla tlen nankitokaskej tlala.
23 Ixpan Jehová namoDios kanin ye kipejpenas para mayeto itoka, nankikuaskej se majtlaktli parte namosemilla, namovino yankuik, namoaceite. Noijki ikone namotoro uan namovaca tlen achto nesis,* ikone namochka* uan namotentso tlen achto nesis. Ijkon nanmomachtiskej nochipa sapanoua nankitlakaitaskej* Jehová namoDios”.
24 “Tla uejka moneki nanyaskej uan amo uelis nankiuikaskej nochi non tlamantli, kanin Jehová namoDios kipejpenas mayeto itoka porque uejka mokaua (porque Jehová namoDios namechteochiuas),
25 non tlamantli uelis nankipatlaskej ika tomin uan non tomin nankiuikaskej ijkuak nanyaskej kanin Jehová namoDios kipejpenas.
26 Ompa uelis nankikouaskej tlen nankinekiskej: vacas, ichkamej,* tentsomej, vino, okseki tlamantli tlen teuintia uan tlen nankinekiskej. Ompa nantlakuaskej ixpan Jehová namoDios uan namejuan uan akinmej chantij namokalijtik nanpakiskej.
27 Amo xikkauakan iselti levita tlen kajki itech namoaltepeuan, porque ye amo okiseli nion okimakakej tlen namejuan onamechmakakej”.
28 “Ejeyi xiuitl moneki nankitemakaskej se majtlaktli parte tlen tlakis* itech tlali non xiuitl uan nankiuikaskej itech namoaltepeuan.
29 Ijkon levita tlen amo okiseli nion okimakakej tlen namejuan onamechmakakej, akin uits itech okse altepetl, iknotl uan siuatl tlen omiki inamik, nochtin yejuan tlen chantij itech namoaltepeuan uelis ompa yaskej uan tlakuaskej hasta ixuiskej,* ijkon Jehová namoDios kiteochiuas nochi tlen nankichiuaskej”.
Notas
^ Noso “borrego”.
^ Nin yolkatl mota ken masatl.
^ Nin yolkatl mota ken se conejo uan chanti kanin teyo.
^ Noso “kochi”.
^ Noso “pilinche”, “pájaro”.
^ Noso “milano real”. Ika tlajtoli hebreo nin kijtosneki se tototl tlen kajki Israel uan mota ken se kuixi.
^ Noso “tsanatl”, “cuervo”.
^ Nin yolkatl uejkapantik, kinpia iajasuan uan ijuio pero amo ueli patlani.
^ Noso “lechuza”.
^ Nin se tototl tlen nemi itempa mar.
^ Se tototl tlen mota ken kuixi.
^ Nin yolkatl mota ken se ganso pero okachi ueyi.
^ Noso “tsanatl”, “cuervo”.
^ Se tototl tlen mota ken se garza.
^ Nin yolkatsintli mota ken se tototl carpintero.
^ Noso “kimichpatla”.
^ Noso “inmajtlapaluan”, “inmastikapaluan”.
^ Noso “tlakatis”.
^ Noso “namoborrego”.
^ Noso “nankimauiliskej”.
^ Noso “borregos”.
^ Noso “mochiuas”, “pankisas”.
^ Noso “pachiuiskej”.
