Okse carta para Corintios 13:1-14
13 Axkan yieyi uelta namechiluijtok nias namechtlajpaloti. “Nochi tlamantli moneki kuali moajsikamatis ika tlen kijtoskej ome noso eyi testigos”.
2 Maski axkan amo namouan nika, yetoskia ken oksepa namouan nika. Ikinon nannochtin xikmatikan tla oksepa nias amo nikintlapojpoluis akinmej otlajtlakolchijkej.
3 Porque namejuan nankinekij nankitaskej itlaj tlen makiteititi ne nitlajtoua ipatka Cristo. Tlen kichiua Cristo amo kiteititia amo kipia chikaualistli. Ye namechititia kipia chikaualistli.
4 Ye okimiktijkej itech kouitl ijkuak amo okatka chikauak, pero ichikaualis toTajtsin Dios okichi mayolto. Tejuan noijki amo tichikauakej ijkon ken ye okatka, pero ichikaualis toTajtsin Dios tlen namechpaleuia kichiuas matiyoltokan iuan Cristo.
5 Nochipa xikitakan kox melauak nantlaneltokaj. Namoneuian xikitakan ken nankatej. ¿Amo nankitaj Jesucristo namouan kajki? Pero amo namouan yetos tla toTajtsin Dios amo namechselia.
6 Ne nikneki xikajsikamatikan tejuan techselia toTajtsin Dios.
7 Tiktlatlaujtiaj toTajtsin Dios amo xikchiuakan itlaj amo kuali. Amo ijkon tikchiuaj para oksekimej matechitakan toTajtsin Dios techselia. Tejuan ijkon tikchiuaj para namejuan xikchiuakan tlen kuali maski oksekimej mokuayejyekouaj* toTajtsin Dios amo techselia.
8 Porque amo uelis itlaj tikchiuaskej tlen kixnamiki tlen melauak. Tejuan san tikpaleuiaj tlen melauak.
9 Melauak tipakij ijkuak namejuan nanchikauakej maski tejuan amo tichikauakej. Tejuan timotlatlaujtiaj para xikpatlakan tlen nanmokuayejyekouaj.*
10 Ijkon namechtlajkuililia maski ayamo namouan nika. Ijkon ijkuak namouan niyetos, amo chikauak namechtlapouis porque toTeko onechkauili manamechyolchikaua uan amo manamechyolkoko.
11 Nokniuan, saiktlami namechiluia xipakikan, xikpatlakan tlen nanmokuayejyekouaj,* xikinkauilikan oksekimej manamechyolseuikan, san se tlamantli ximokuayejyekokan* uan kuali ximouikakan. Tla ijkon nankichiuaskej, namouan yetos toTajtsin Dios tlen tetlasojtla uan teyolseuia.
12 Ika namoyolo chipauak ximoixpipitsokan* ijkuak nanmotlajpaloskej.
13 Namechontlajpalouaj nochtin tokniuan yolchipauakej.
14 ToTajtsin Dios manamechtlasojtla uan toTeko Jesucristo manamechtliokoli tlen kuali. Noijki xikpiakan espíritu santo tlen nannochtin namechpaleuia.
Notas
^ Noso “monejneuiliaj”.
^ Noso “nanmonejneuiliaj”.
^ Noso “nanmonejneuiliaj”.
^ Noso “ximonejneuilikan”.
^ Noso “ximoixtennamikikan”.
