Achto carta para Timoteo 5:1-25
-
¿Ken timouikaskej inuan telpochmej uan akinmej yikipiaj miak xiuitl? (1, 2)
-
Matikinpaleuikan siuamej tlen yoixpoliuik innamik (3-16)
-
Matikinmaluikan akinmej touan chantij (8)
-
-
Matikintlakaitakan tlayekankej tlen kuali kiyekanaj tlanechikol (17-25)
-
“Xikoni tepitsin vino para ayakmo mamitskoko moijtik” (23)
-
5 Amo xikajua se tlakatl tlen yokokoxkatik.* Xikyektlapoui ken yetoskia mopapa. Telpochmej xikintlapoui ken yetoskiaj mokniuan.
2 Siuamej tlen yikipiaj miak xiuitl xikintlapoui ken yetoskiaj momamanuan. Ichpochmej xikintlapoui ika moyolo chipauak ken yetoskiaj mokniuan.
3 Xikintlakaita siuamej tlen yoixpoliuik innamik uan amo kipiaj akin kinpaleuis.
4 Pero tla se siuatl yoixpoliuik inamik uan kinpia ikoneuan noso ixuiuan, yejuan achto makimaluikan infamilia para makiteititikan kiueyichiuaj toTajtsin Dios. Makinmakakan tlen kinpoloua inpapanuan uan inmiabuelitos porque toTajtsin Dios ijkon kipaktia.
5 Siuatl tlen yoixpoliuik inamik uan amitlaj kipia kineltoka toTajtsin Dios. Tlajka uan youak kitlapouia toTajtsin Dios uan kitlatlaujtia.
6 Pero siuatl tlen san moyolpaktia kijtosneki miktok maski yoltok.
7 Te nochipa xikintemaka ninmej tlanauatilmej uan ijkon amikaj kiteluiskej.
8 Pero tla ikaj amo kimaluia ifamilia uan okachi akinmej inuan chanti, ye ayakmo tlaneltoka uan kijtosneki okachi amo kuali kichijtok amo ken akinmej amo tlaneltokaj.
9 Uelis kipaleuiskej siuatl tlen yoixpoliuik inamik tla yikipia kanaj 60 xiuitl uan tla okipixki san se inamik.
10 Noijki tla kixmatij okichi tlen kuali, non kijtosneki okinmiskalti ikoneuan, kuali okinseli oksekimej, okinmikxipajpakak tokniuan yolchipauakej, okinpaleui akinmej tlajyouiaj uan nochipa omochijchika okichi tlen kuali.
11 Pero amo makinpaleuikan ichpochmej tlen yoixpoliuik innamik, porque yejuan monamiktiaj ijkuak kinekij motekaskej iuan se tlakatl uan ayakmo kitekichiuiliaj Cristo.
12 Yejuan kinmixkomakaskej porque amo okichijkej tlen yokijtojkaj.
13 Noijki yomomatkej amitlaj kichiuaj uan techan kalaktinemij. Pero amo san amitlaj kichiuaj, noijki san tlateneuaj,* mokajkalakiaj kanin amo kinnotsaj uan kijtojtinemij tlen amo moneki kijtoskej.
14 Ikinon nikneki mamonamiktikan ichpochmej tlen yoixpoliuik innamik, makinpiakan inkoneuan, makimaluikan inchan uan amo makinkauilikan akinmej techkokoliaj matechteneuakan.*
15 Sekimej yokikajkej tlen melauak uan kichiuaj ken Satanás.
16 Tla se siuatl tlen tlaneltoka kinpia ifamiliares tlen yoixpoliuik innamik, makinpaleui para amo makitekimakakan tlanechikol. Ijkon tlanechikol uelis kinpaleuis siuamej tlen yoixpoliuik innamik uan amo kipiaj akin kinpaleuis.
17 Tlayekankej tlen kuali kiyekanaj tlanechikol moneki okachi makintlakaitakan. Okachi akinmej mochijchikauaj tetlapouiaj iTlajtol toTajtsin Dios uan tlamachtiaj.
18 Porque iTlajtol toTajtsin Dios kijtoua: “Amo xikkamatsakua toro ijkuak tlajtlaksa* ipan trigo”. Noijki kijtoua: “Akin tekipanoua kimotlanilia itlaxtlauil”.
19 Amitlaj xikchiua tla ikaj kiteluia se tlakatl tlen yokokoxkatik.* Pero uelis itlaj tikchiuas tla kiteluiaj ome noso eyi testigos.
20 Teixpan xikinmajua akinmej tlajtlakolchijtinemij uan ijkon oksekimej mamomojtikan.
21 Ne nimitsnauatia ixpan toTajtsin Dios, ixpan Cristo Jesús uan inmixpan ángeles tlen okinpejpenkej, xikchiua tlen nimitsnauatia uan nochi tlamantli kuali xikita uan amo xitechikoita.
22 Amo san niman xikintlali momauan ipan se tlakatl.* Noijki amo xikinpaleui akinmej tlajtlakolchiuaj. Xikpia chipauak monemilis.
23 Ayakmo xikoni san atl. Xikoni tepitsin vino para ayakmo mamitskoko moijtik porque san timokokoua.
24 San niman momati ijkuak sekimej tlajtlakolchiuaj uan san niman kinmixkomakaj, pero oksekimej satepan momati ijkuak tlajtlakolchiuaj.
25 Noijki san niman momati ijkuak tikchiuaj tlen kuali, pero amo nochipa tlatitos tla tikchiuaj tlen amo kuali.
Notas
^ Noso “youeuejtik”.
^ Noso “teijtouaj”, “tepojpouaj”.
^ Noso “matechijtokan”, “matechpojpouakan”.
^ Noso “mokejketsa”.
^ Noso “youeuejtik”.
^ Kijtosneki amo san niman kipejpenaskia se tlakatl.
