Achto carta para Timoteo 1:1-20
1 Ne niPablo, niiapóstol Cristo Jesús porque onechtlali toTajtsin Dios tlen temakixtia. Noijki onechtlali Cristo Jesús tlen techpaleuia itlaj matikchiakan.
2 Nimitstlajkuililia Timoteo,* te titlaneltoka ken ne nitlaneltoka uan nimitsita ken tinokone:
ToTajtsin Dios uan toTeko Cristo Jesús mamitstliokolikan tlen kuali, mamitsiknomatikan uan mamitsmakakan yolseuilistli.
3 Ne onimitsilui ximokaua Éfeso ijkuak yiniaskia Macedonia. Axkan nimitsiluia xikinnauati oksekimej amo matlamachtikan okse tlamantli.
4 Amo makinkakikan akinmej tlakajkayajtinemij nion amo makinkakikan akinmej kitemouaj intoka inuejkatatajuan. Non tlamantli san kichiua okachi matlatemokan uan san tetonalpolo. Noijki amo poui itech tlen toTajtsin Dios techmaka para okachi matitlaneltokakan.
5 Ijkon nitlanauatia para nochtin mamotlasojtlakan ika inyolo chipauak, makipiakan chipauak intlalnamikilis uan matlaneltokakan ika nochi inyolo.
6 Sekimej yokikajkej non tlamantli ikinon san motlapouiaj tlen amitlaj ipati.
7 Yejuan kinekij tlamachtiskej tlen kijtoua tlanauatil, pero amo kajsikamatij tlen kijtouaj nion tlen sapanoua kinekij tlamachtiskej.
8 Pero tejuan tikmatij iTlanauatil Moisés tlapaleuia tla tikchiuaj ken moneki.
9 Noijki tikmatij tlanauatil amo okintlalilijkej akinmej yolkualmej. Okintlalilijkej akinmej amo kitlakamatij* tlanauatil, akinmej teixnamikij, akinmej amo yolkualmej, akinmej tlajtlakolchiuaj, akinmej amo tetlasojtlaj, akinmej kixtopeuaj tlen iaxka toTajtsin Dios, akinmej kinmiktiaj inpapanuan, akinmej temiktiaj,
10 akinmej auilnemij,* tlakamej tlen motekaj inuan tlakamej, akinmej teichtekij, akinmej tlakajkayauaj, akinmej amo kichiuaj tlen kijtouaj uan nochi tlen kixnamiki kuali tlamachtil.
11 Non kuali tlamachtil iaxka toTajtsin Dios tlen paki, uan mouika ika tetlajtlachialti kuali tlajtoli tlen onechmakakej.
12 ToTeko Cristo Jesús onechmakak chikaualistli uan niktlasojkamatilia porque ye okitak uelis nikchiuaskia tekitl tlen onechmakak.
13 Maski onikuijuikaltiaya toTajtsin Dios, onitetlajyouiltiaya uan onimoueyinekiaya. Pero Cristo onechiknomatki porque amo onikmatiaya tlen onikchiuaya uan amo onitlaneltokaya.
14 ToTajtsin Dios sapanoua onechtliokoli tlen kuali uan onechpaleui manikneltoka. Noijki Cristo Jesús onechtlasojtlak porque niidiscípulo.
15 Nin tlamantli uelis kineltokaskej uan moneki nochtin kiseliskej: Cristo Jesús ouala tlaltikpak okinmakixtiko tlajtlakolejkej pero ne okachi nitlajtlakole.
16 Cristo Jesús onechiknomatki maski ne okachi nitlajtlakole uan ijkon okiteititi kimati mochia. Ye onechtlali ken se neskayotl* para akinmej kineltokaskej uan nochipa yoltoskej.
17 Nochipa makitlakaitakan uan makiueyichiuakan san toTajtsin Dios. Ye tekiua tlen nochipa yoltos, amo keman ixpoliui uan amikaj kita. Amén.
18 Nokone Timoteo, tlen nimitsnauatia mouika ika tlen okijtojkej profetas tikchiuaskia. Non mitspaleuis xiyeto ken se soldado tlen kimati kimomakas.
19 Noijki nochipa xitlaneltoka uan xikpia chipauak motlalnamikilis porque sekimej ayakmo ijkon kichiuaj, ikinon ayakmo tlaneltokaj ijkon ken ijkuak apolaki se barco.
20 Ijkon okichijkej Himeneo uan Alejandro, ikinon onikinmaktili Satanás uan ijkuak tlajyouiskej kimatiskej amo moneki kiuijuikaltiskej toTajtsin Dios.
Notas
^ Nin kijtosneki “akin kitlakaita toTajtsin Dios”.
^ Noso “kiuelkakij”.
^ Xikita diccionario kanin kijtoua auilnemi.
^ Noso “ejemplo”.
