Achto icarta Juan 1:1-10
1 Tejuan timechijkuililiaj akin kiualika iTlajtol toTajtsin Dios tlen kitemaka yolilistli. Ye yokatka yiuejkika, otikkakej, otikyekitakej, otikkitskijkej uan otikitakej tlen okichi.
2 Yotikmatkej uan yotikajsikamatkej yolilistli tlen amo keman tlamis tlen kitemaka toTajtsin. Tejuan tiktematiltiaj uan noijki namejuan timechmatiltiaj.
3 Timechmatiltiaj tlen otikitakej uan tlen otikkakej para touan xiyetokan. Tejuan tikatej iuan toTajtsin uan noijki tikatej iuan iKone tlen itoka Jesucristo.
4 Timechijkuililiaj nin tlamantli para sapanoua matipakikan.
5 Ye otechkakiti nin tlamantli uan timechmatiltiaj: toTajtsin Dios ye tlauili uan itech amo onka tlayoualotl.
6 Tla tikijtouaj iuan tikatej pero tinemij kanin tlayoua, kijtosneki titlakajkayauaj uan amo tikchiuaj tlen melauak.
7 Pero san sekan tikatej tla tinemij kanin onka tlauili ijkon ken ye kajki kanin onka tlauili. Noijki ieso Jesús kichipaua nochi totlajtlakol. Jesús iKone toTajtsin Dios.
8 Tla tikijtouaj amo titlajtlakolejkej, kijtosneki san tejuan timokajkayauaj uan amo tikneltokaj tlamachtil tlen melauak.
9 Tla timoyolkuitiaj, toTajtsin Dios techtlapojpoluilis totlajtlakol uan kichipauas nochi tlen amo kuali otikchijkej. Porque ye nochipa kichiua tlen kijtoua uan yolkuali.
10 Tla tikijtouaj amo titlajtlakolchiuaj, yetoskia ken tikijtoskiaj ye tlakajkayaua uan amo tikneltokaj tlen kijtoua.
