Romanos 6:1-23

  • Tikpiaskej se yankuik nemilistli porque otechapolaktijkej itech Cristo (1-11)

  • Amo xikkauilikan tlajtlakoli makinauati namocuerpo (12-14)

  • Otikatkaj tiitlakeualuan tlajtlakoli pero axkan tiitlakeualuan toTajtsin Dios (15-23)

    • “Tlajtlakoli tetlaxtlauia ika mikilistli, pero toTajtsin Dios techtliokolia yolilistli” (23)

6  ¿Tlen tikijtoskej? ¿Moneki titlajtlakolchijtoskej para okachi matechtliokolikan tlen kuali?  ¡Amo! Tejuan yotechmakixtijkej imak tlajtlakoli ikinon ayakmo moneki matitlajtlakolchiuakan.  ¿Amo nankimatij tinochtin tlen otechapolaktijkej itech Cristo Jesús kijtosneki noijki otechapolaktijkej itech imikilis?  Ijkuak otechapolaktijkej itech imikilis, otechtokakej iuan Cristo. Ijkon tejuan matikpiakan yankuik tonemilis ken Cristo kipia yankuik inemilis. ToTajtsin Dios okiyoliti ika ichikaualis.  Tla san sekan tikatej iuan Cristo porque tiixpoliuij ken ye oixpoliuik, noijki san sekan iuan tiyetoskej ijkuak techyolitiskej ijkon ken ye okiyolitijkej.  Tejuan tikmatij tonemilis tlen achto otikpiayaj okipilojkej itech kouitl iuan Cristo. Ijkon ayakmo matechtlani tlen amo kuali kineki kichiuas tocuerpo uan ayakmo matechnauati tlajtlakoli.  Porque ijkuak ikaj ixpoliui, kitlapojpoluiliaj itlajtlakol.  Tla tejuan yotiixpolikej iuan Cristo, tikneltokaj noijki tiyoltoskej iuan ye.  Porque tikmatij toTajtsin Dios okiyoliti Cristo uan ayakmo keman ixpoliuis. Mikilistli ayakmo kinauatia. 10  Ye san se uelta oixpoliuik para techkixtilis totlajtlakol uan ayakmo oksepa ixpoliuis. Pero axkan yoltok uan kichiua tlen kineki toTajtsin Dios. 11  Namejuan noijki xikitakan yonamixpolikej imak tlajtlakoli, pero nanyoltokej para nankichiuaskej tlen kineki toTajtsin Dios porque nankichiuaj ken Jesucristo. 12  Amo xikkauilikan tlajtlakoli manamechnauati xikchiuakan tlen kineki kichiuas namocuerpo.* 13  Ayakmo xitlajtlakolchiuakan ika namocuerpo uan ayakmo xikchiuakan tlen amo kuali. Xiyetokan imak toTajtsin Dios ken yetoskia onamixpolikej uan onamechyolitijkej. Xiktlalikan namocuerpo imak toTajtsin Dios uan xikchiuakan tlen kuali. 14  Tlajtlakoli amo moneki namechnauatis porque namejuan amo nankatej imak tlanauatil. Namejuan nankatej imak tetliokolil tlen kuali. 15  ¿Kijtosneki titlajtlakolchiuaj porque tikatej imak tetliokolil tlen kuali uan amo imak tlanauatil? ¡Amo! 16  Namejuan nankimatij tla ikaj nochipa nankitlakamatiskej,* nanyetoskej itlakeualuan. Ikinon namejuan nanmikiskej tla nanyetoskej itlakeualuan tlajtlakoli. Pero toTajtsin Dios namechitas nanyolkuamej tla nanyetoskej itlakeualuan uan tla nankitlakamatiskej.* 17  Tiktlasojkamatiliaj toTajtsin Dios porque maski namejuan onankatkaj itlakeualuan tlajtlakoli, opejki nankitlakamatij* ika nochi namoyolo nochi tlen onamechmachtijkej. 18  Namejuan yonamechmakixtijkej imak tlajtlakoli, ikinon onanmochijkej itlakeualuan toTajtsin Dios uan nankichiuaj tlen kuali. 19  Ne amo oui namechtlapouia para nankajsikamatiskej porque nantlajtlakolejkej. Achto onankichiuayaj tlen okinekiaya namocuerpo, onankichiuayaj tlen pitsotik uan tlen amo kuali. Pero axkan xikchiuakan tlen kuali uan tlen chipauak. 20  Porque ijkuak onankatkaj itlakeualuan tlajtlakoli, amo omonekiaya nankichiuaskej tlen kuali. 21  ¿Tlen onankitlankej ijkuak onankatkaj itlakeualuan tlajtlakoli? Onankichijkej tlen axkan kichiua xipinauakan uan nochi non kiualika mikilistli. 22  Pero axkan yonamechmakixtijkej imak tlajtlakoli uan onanmochijkej itlakeualuan toTajtsin Dios, ikinon xikchiuakan tlen chipauak uan ijkon nochipa nanyoltoskej. 23  Porque tlajtlakoli tetlaxtlauia ika mikilistli, pero toTajtsin Dios techtliokolia yolilistli tlen amo keman tlamis ika tlen okichi toTeko Cristo Jesús.

Notas

Ika griego moijtoua “namocuerpo tlen ixpoliui”.
Noso “nankiuelkakiskej”.
Noso “nankiuelkakiskej”.
Noso “nankiuelkakij”.