Juan 9:1-41

  • Jesús okipajti se tlakatl tlen amo otlachiaya porque ijkon oneski (1-12)

  • Fariseos okitlajtlanijkej miak tlamantli tlakatl tlen amo otlachiaya (13-34)

  • Fariseos amo otlachiayaj (35-41)

9  Ijkuak Jesús onejnentiaya, okitak se tlakatl tlen amo otlachiaya porque ijkon oneski.*  Discípulos okitlajtlanijkej: “Rabí, ¿tleka ijkon oneski* nin tlakatl? ¿Akin otlajtlakolchi? ¿Ye noso ipapanuan?”.  Jesús okinnankili: “Ye amo otlajtlakolchi nion ipapanuan. Ye ijkon oneski* para mamota tlen ueli kichiua toTajtsin Dios.  Axkan ok tlanestok moneki tikchiuaskej tlen kineki akin onechualtitlanki, porque ijkuak tlayouas amikaj uelis tekipanos.  Ne nikintlauilijtos nochtin ijkuak ok niyetos nikan tlaltikpak”.  Ijkuak Jesús ijkon okijto, ochijchak ipan tlali uan ika ichijcha okichi sokitl.* Satepan okixauili ipan ixtololouan non tlakatl.  Ye okilui: “Ximijxamiti ijtik tanque ompa Siloam” (Siloam kijtosneki “okititlankej”). Tlakatl omijxamito uan yotlachiaya ijkuak omokopato.  Ijkuakon akinmej ik ompa ochantiayaj uan noijki akinmej okitayaj okitlajtlaniaya tomin, okijtojkej: “¿Amo ye nin tlakatl tlen okitlajtlaniaya tomin?”.  Sekimej okijtouayaj: “Ye non tlakatl”. Oksekimej okijtouayaj: “Ijkon mota pero amo ye”. Tlakatl okijtouaya: “Ye ne”. 10  Ijkuakon okitlajtlanijkej: “¿Ken yiueli titlachia?”. 11  Ye okinnankili: “Tlakatl tlen itoka Jesús okichi sokitl,* onechxauili ipan noixtololouan uan onechilui: ‘Ximijxamiti ijtik tanque ompa Siloam’. Ne onimijxamito uan opejki nitlachia”. 12  Satepan okitlajtlanijkej: “¿Kanin kajki non tlakatl?”. Ye okinnankili: “Amo nikmati”. 13  Yejuan okiuikakej tlakatl tlen yotlachiaya inmixpan fariseos. 14  Non tonal okatka sábado ijkuak Jesús okichi sokitl* uan okipajti tlakatl. 15  Fariseos noijki okitlajtlanijkej ken opejki tlachia. Ye okinmilui: “Onechxauili sokitl* ipan noixtololouan. Satepan onimijxamito uan axkan nitlachia”. 16  Sekimej fariseos okijtojkej: “Non tlakatl amo okiualtitlanki toTajtsin Dios porque amo kitlakaita tonal sábado”. Oksekimej okijtouayaj: “¿Ken uelis kinchiuas milagros se tlakatl tla tlajtlakole?”. Nochtin tlatlamantli okijtouayaj. 17  Satepan oksepa okitlajtlanijkej tlakatl: “¿Te tlen tikijtoua? ¿Akin non tlakatl tlen omitspajti?”. Tlakatl okinnankili: “Ye se profeta”. 18  Pero judíos amo okineltokayaj kox melauak amo otlachiaya non tlakatl ikinon okinnotskej ipapanuan. 19  Okintlajtlanijkej: “¿Nin namokone tlen nankijtouaj amo otlachiaya ijkuak oneski?* ¿Ken yitlachia axkan?”. 20  Yejuan okinnankilijkej: “Ye tokone uan tikmatokej amo otlachiaya ijkuak oneski.* 21  Pero amo tikmatij ken opejki tlachia nion amo tikmatij akin okipajti. Ye xiktlajtlanikan porque ayakmo konetl uan ye ineuian namechiluis”. 22  Ipapanuan ijkon okijtojkej porque okinmauiliayaj* judíos. Judíos yomotlapouijkaj ayakmo kinkauiliskiaj makalakikan itech sinagoga* akinmej kijtoskiaj Jesús okatka Cristo. 23  Ikinon ipapanuan okijtojkej: “Ye xiktlajtlanikan porque ye ayakmo konetl”. 24  Satepan oksepa okinotskej tlakatl tlen amo otlachiaya uan okiluijkej: “Xikueyichiua toTajtsin Dios. Tejuan tikmatokej non tlakatl tlajtlakole”. 25  Ye okinmilui: “Amo nikmati kox non tlakatl tlajtlakole. San nikmati amo onitlachiaya uan axkan nitlachia”. 26  Yejuan okitlajtlanijkej: “¿Tlen omitstokti? ¿Ken omitspajti?”. 27  Ye okinnankili: “Yonamechilui pero amo nantechneltokaj. ¿Tleka nankinekij oksepa manamechilui? ¿Noijki nankinekij nanmochiuaskej idiscípulos?”. 28  Ijkuak ijkon okijto, yejuan okiuijuikaltijkej uan okiluijkej: “Te tiidiscípulo non tlakatl pero tejuan tiidiscípulos Moisés. 29  Tejuan tikmatij toTajtsin Dios okitlapoui Moisés, pero non tlakatl amo tikmatij kanin okiski”. 30  Tlakatl okinmilui: “Nechtlajtlachialtia amo nankimatij kanin okiski tla ye onechpajti. 31  Tikmatij toTajtsin Dios amo kinkaki akinmej tlajtlakolchiuaj. Ye kinkaki akinmej kimauiliaj uan kichiuaj tlen ye kineki. 32  Amo keman otikkakiayaj se tlakatl makipajti ikaj tlen amo otlachiaya ijkuak oneski.* 33  Amitlaj uelis kichiuaskia non tlakatl tla amo kiualtitlaniskia toTajtsin Dios”. 34  Yejuan okiluijkej: “Te otineski* titlajtlakole, ¿uan axkan tikneki techmachtis?”. Satepan okikixtijkej. 35  Jesús okimatki okikixtijkej non tlakatl uan ijkuak okajsito, okitlajtlani: “¿Tikneltoka iKone Tlakatl?”. 36  Ye okinankili: “Noteko, ¿akin ye? Techilui uan ijkon nikneltokas”. 37  Jesús okilui: “Te yotikitak uan axkan iuan timotlapouijtok”. 38  Tlakatl okilui: “NoTeko, ne nikneltoka”, uan ixpan omotlankuaketski. 39  Jesús okijto: “Ne oniuala nikan tlaltikpak oniteixkomakako, ijkon tlachiaskej akinmej amo tlachiaj uan ayakmo tlachiaskej akinmej tlachiaj”. 40  Fariseos tlen ompa okatkaj okikakej uan okitlajtlanijkej: “¿Tejuan noijki amo titlachiaj?”. 41  Jesús okinnankili: “Amo namechtlajtlakoltiskiaj tla amo nantlachiaskiaj, pero namechtlajtlakoltia porque nankijtouaj nantlachiaj”.

Notas

Noso “otlakatki”.
Noso “otlakatki”.
Noso “otlakatki”.
Noso “akuitlatl”.
Noso “akuitlatl”.
Noso “akuitlatl”.
Noso “akuitlatl”.
Noso “otlakatki”.
Noso “otlakatki”.
Noso “okinmimakasiayaj”.
Xikita diccionario.
Noso “otlakatki”.
Noso “otitlakatki”.