Juan 5:1-47

  • Jesús okipajti se tlakatl ompa Betzata (1-18)

  • TeKone okijto iTajtsin okitlali matlanauati (19-24)

  • Akinmej yoixpolikej kikakiskej itlajtol Jesús (25-30)

  • Motematiltia akin Jesús (31-47)

5  Satepan Jesús oajsito Jerusalén ijkuak judíos oiluichijkej.  Ompa Jerusalén, inakastlan Ichkapuerta kajki se tanque kanin mantok atl. Non tanque ika hebreo itoka Betzata uan kinpia makuili korredortin.  Ompa okatkaj miakej kokoxkej, akinmej amo otlachiayaj, akinmej amo onejnemiayaj uan akinmej amo ueli omoliniayaj.  *  Ompa okatka se tlakatl tlen yokipiaya 38 xiuitl omokokouaya.  Jesús okitak non tlakatl ompa ouetoka. Noijki okimatiaya miak xiuitl yomokokouaya ikinon okitlajtlani: “¿Tikneki tipajtis?”.  Kokoxki okinankili: “Noteko, amo nikpia akin nechpaleuis manikalaki ijtik tanque ijkuak molinia atl. Ijkuak nikneki nikalakis okse achto kalaktikisa”.  Jesús okilui: “¡Ximoketsa! Xikonana mopetl uan xinejnemi”.  Tlakatl san niman opajtik, okonanki ipetl uan opejki nejnemi. Non tonal okatka sábado 10  ikinon judíos okiluijkej tlakatl tlen opajtik: “Axkan sábado uan amo uelis tikuikas mopetl”. 11  Pero ye okinmilui: “Tlakatl tlen onechpajti onechilui manikonana nopetl uan maninejnemi”. 12  Yejuan okitlajtlanijkej: “¿Akin non tlakatl tlen omitsilui xikonana mopetl uan xinejnemi?”. 13  Tlakatl amo okimatiaya akin okipajti, porque ompa okatkaj miakej uan ayakmo kanaj okitak Jesús. 14  Satepan Jesús okajsito non tlakatl itech templo uan okilui: “Axkan yotipajtik ikinon ayakmo xitlajtlakolchiua porque uelis mitspanos itlaj okachi amo kuali”. 15  Tlakatl oyajki uan okinmiluito judíos ye Jesús okipajti. 16  Ikinon judíos okinekiayaj kikitskiskej Jesús porque otepajtiaya sábado. 17  Pero ye okinmiluiaya: “NoTajtsin nochipa tekipanoua uan ne noijki nochipa nitekipanoua”. 18  Judíos okachi okinekiayaj kimiktiskej porque amo okitlakaitaya tonal sábado uan okijtouaya toTajtsin Dios okatka iTajtsin ken yetoskia ye noijki toTajtsin Dios. 19  Pero Jesús okinmilui: “Ne melauak namechiluia, teKone amo ueli kichiua san tlen ye kineki. Ye kichiua tlen kita kichiua iTajtsin. Nochi tlen kichiua iTajtsin ye noijki ijkon kichiua. 20  Porque toTajtsin kitlasojtla teKone uan kimachtia tlen ye kichiua. Noijki kimachtis okachi uejueyij tlamantli tlen namejuan namechtlajtlachialtis. 21  ToTajtsin kinyolitia akinmej yoixpolikej uan teKone noijki kiyolitia akin ye kineki kiyolitis. 22  ToTajtsin amikaj kixkomaka porque okilui teKone ye matlaixkomaka. 23  Ijkon nochtin kitlakaitaskej teKone ijkon ken kitlakaitaj toTajtsin. Akin amo kitlakaita teKone amo kitlakaita toTajtsin porque ye okiualtitlanki. 24  Ne melauak namechiluia, nochipa yoltos uan amo kixkomakaskej akin kikaki notlajtol uan kineltoka akin onechualtitlanki. Yetoskia ken yoixpolika uan axkan oksepa yoltok”. 25  “Ne melauak namechiluia, ajsis tonal akinmej yoixpolikej kikakiskej itlajtol iKone toTajtsin Dios uan yoltoskej akinmej otetlakamatkej.* Non tonal yoajsiko. 26  ToTajtsin Dios kitemaka yolilistli, uan noijki kikauilia teKone makitemaka yolilistli. 27  Noijki kikauilia matlaixkomaka porque ye iKone Tlakatl. 28  Amo ximotlajtlachialtikan, porque ajsis tonal ijkuak nochtin tlen yoixpolikej* kikakiskej itlajtol 29  uan moyolitiskej. Akinmej okichijkej tlen kuali, nochipa yoltoskej. Pero kinmixkomakaskej akinmej okichijkej tlen amo kuali. 30  Ne amo ueli nikchiua san tlen ne nikneki. Nitlaixkomaka ken noTajtsin nechiluia uan nikchiua ken moneki. Ne nikchiua tlen kineki akin onechualtitlanki, uan amo nikchiua san tlen ne nikneki”. 31  “Amikaj nechneltokaskia tla san nitetlapouiskia tlen ne nikchiua. 32  Pero onka okse akin kitematiltia tlen nikchiua uan ne nikmati melauak tlen ye kitematiltia. 33  Namejuan onankintitlankej sekimej tlakamej mamotlapouitij iuan Juan, uan ye okitematilti tlen melauak. 34  Ne amo nikneki se tlakatl makitematilti akin ne, pero ijkon namechiluia para ximomakixtikan. 35  Non tlakatl okatka ken se tlauili tlen oxotlatoka uan opetlaniaya, pero namejuan amo ouejka onanpakej ika itlauil. 36  Ne niktematiltia itlaj okachi ipati uan amo ijkon ken Juan okitematilti. Ne nikchiua tlen noTajtsin onechnauati manikchiuaki, uan non kiteititia ye onechualtitlanki. 37  NoTajtsin onechualtitlanki uan ye kitematiltia tlen nikchiua. Namejuan amo keman nankikakij tlajtoua nion amo keman nankitaj. 38  Noijki iTlajtol amo kalaki namoyolipan porque amo nankineltokaj akin ye okiualtitlanki”. 39  “Namejuan kuali nanmomachtiaj iTlajtol toTajtsin Dios porque nanmokuayejyekouaj* ijkon nochipa nanyoltoskej, pero iTlajtol toTajtsin Dios kitematiltia akin ne. 40  Pero namejuan amo nankinekij nanuitsej nonauak para nanyoltoskej. 41  Ne amo nikneki oksekimej manechueyichiuakan. 42  Ne nikmati namejuan amo nankitlasojtlaj toTajtsin Dios. 43  Ne oniuala porque noTajtsin onechualtitlanki uan namejuan amo nantechseliaj. Pero nankiseliskiaj tla ikaj ineuian kinekiskia uits. 44  ¿Ken nantechneltokaskej tla nankinekij manamechueyichiuakan uan amo nankitemouaj manamechseli toTajtsin Dios? 45  Amo ximokuayejyekokan* ne namechteluis ixpan noTajtsin. Namechteluia ye Moisés akin namejuan nankineltokaj. 46  Tla melauak nankineltokaj Moisés, noijki nantechneltokaskiaj porque ye okijkuilo tlen nikchiuaskia. 47  Pero ¿ken nankineltokaskej tlen nikijtoua tla amo nankineltokaj tlen ye okijkuilo?”.

Notas

Seki biblias kipiaj nin versículo pero tlen yiuejkika omoijkuilo ika griego amo kipia.
Noso “otlauelkakej”.
Nin kijtosneki nochtin akinmej yoixpolikej tlen toTajtsin Dios kinmilnamiktok.
Noso “nanmonejneuiliaj”.
Noso “ximonejneuilikan”.