Hebreos 10:1-39

  • Ayakmo moneki kinmiktiskej yolkamej (1-4)

    • Iekauilo iTlanauatil Moisés (1)

  • Cristo san se uelta omotemakak uan amo moneki oksepa motemakas (5-18)

  • Se yankuik ojtli tlen techpaleuia matiyoltokan (19-25)

    • Nochipa matimonechikokan (24, 25)

  • ¿Tlen kinpanos akinmej tlajtlakolchiuaj maski yikimatij tlen melauak? (26-31)

  • Moneki titlaneltokaskej uan tiyetoskej tiyolchikauakej para titlaxikoskej (32-39)

10  ITlanauatil Moisés iekauilo nochi tlamantli kuali tlen satepan uits pero non amo kijtosneki ye tlamantli tlen kuali. Ikinon akinmej motokiaj inauak toTajtsin Dios amo kinkixtilis tlajtlakoli maski sejse xiuitl kinmiktiskej yolkamej.  Tla kinkixtiliskia tlajtlakoli ijkuak okinmiktiayaj yolkamej, ayakmo monekiskia kinmiktiskej yolkamej uan ayakmo momachiliskiaj tlajtlakolejkej.  Pero sejse xiuitl ijkuak okinmiktiayaj yolkamej okilnamikiayaj yejuan tlajtlakolejkej.  Porque inmieso toros uan inmieso tentsomej amo ueli kipojpoloua tlajtlakoli.  Ikinon ijkuak Cristo ouala tlaltikpak ye okilui toTajtsin Dios: “‘Amo otiknek mamitsmakakan tetliokolil nion amo otiknek mamitsinmiktilikan yolkamej pero te otechmakak se cuerpo.  Amo otikseli tetliokolil tlen kitlatiaj nion tetliokolil para titetlapojpoluis’.  Ne onikijto: ‘ToTajtsin Dios, oniuala onikchiuako tlen tejuatsin tikneki. Itech rollo ijkuilitok akin ne’”.  Achto okijto: “Amo otiknek nion amo otikseli mamitsinmiktilikan yolkamej, nion tetliokolil tlen kitlatiaj, nion tetliokolil para titetlapojpoluis”. Nochi non tetliokolil kitemakaj ijkon ken kijtoua iTlanauatil Moisés.  Satepan okijto: “Oniuala onikchiuako tlen tejuatsin tikneki”. Ye kipojpoloua tlen achto okijto uan ijkon kitlalis tlen satepan okijto. 10  Jesucristo otlapaleui matechchipauakan. Ye san se uelta okitemakak icuerpo uan amo moneki oksepa kitemakas. 11  Noijki nochtin teopixkej mojmostla kitekichiuiliaj toTajtsin Dios uan miak uelta san kinmiktiaj yolkamej. Pero non amo keman sepa kipojpoloua tlajtlakoli. 12  Pero Cristo san se uelta omotemakak uan amo oksepa motemakas por totlajtlakol uan omotlali iyekma toTajtsin Dios. 13  Desde ijkuakon mochixtok makintlalikan ikxitlampa akinmej kikokoliaj. 14  Porque ye san se tetliokolil okitemakak para kinkixtilis tlajtlakoli akinmej yolchipauakej. 15  Espíritu santo noijki ijkon techmatiltia ijkuak kijtoua: 16  “Jehová kijtoua: ‘Ne inuan nikchiuas nin acuerdo* ijkuak yopanokej nonmej tonalmej. Inyolipan nikintlalis notlanauatiluan uan nikinmijkuilos itech intlayejyekol’”.* 17  Satepan kijtoua: “Ayakmo nikilnamikis intlajtlakol nion tlen amo kuali okichijkej”. 18  Pero ijkuak toTajtsin Dios techtlapojpoluilia totlajtlakol kijtosneki ayakmo moneki tiktemakaskej se tetliokolil para matechtlapojpolui. 19  Nokniuan, tejuan tikneltokaj ieso Jesús techpaleuia matikalakikan kanin Santísimo. 20  Ye otechtlapoli se yankuik ojtli tlen techpaleuia matiyoltokan. Yetoskia ken tikpanouiaj se tsotsoli* tilauak uan non tsotsoli* kijtosneki icuerpo. 21  Tejuan yitikpiaj se teopixki tlen kimaluia ikalijtik toTajtsin Dios. 22  Ikinon matikueyichiuakan toTajtsin Dios ika nochi toyolo uan matikpiakan chikauak totlaneltokilis. Tikpiaj chipauak totlalnamikilis porque yokichipajkej toyolo uan tocuerpo okichipajkej ika atl chipauak. 23  Ika nochi toyolo nochipa matitetlapouikan tlen tikchiaj. Porque uelis tikneltokaskej akin okijto ijkon kichiuas. 24  Matikitakan ken timosepanpaleuiskej uan ijkon okachi timotlasojtlaskej uan tikchiuaskej tlen kuali. 25  Nochipa matimonechikokan uan amo matikchiuakan ken sekimej yomomatkej amo monechikouaj. Moneki timosepanyolchikauaskej porque tikitaj yiajsiki itonal toTajtsin Dios. 26  Tla titlajtlakolchiuaj maski yitikajsikamatij tlen melauak, ayakmo onka okse tetliokolil tlen motemakas por totlajtlakol. 27  San tikchixtoskej temomojti matechtlajyouiltikan uan ikualanilis toTajtsin Dios tlen yetoskia ken tlitl kinmixpolos akinmej kixnamikij. 28  Tla ome noso eyi testigos kijtoskej ikaj amo kitlakamati* iTlanauatil Moisés, kimiktiskej uan amo kiknomatiskej. 29  ¿Tlen nankijtouaj? Tla ikaj tlajtlaksa* ipan iKone toTajtsin Dios, tla amo okachi kipatioita estli tlen ika omochi acuerdo* uan tlen ika okichipajkej, tla kiuijuikaltia uan kitlauelita iespíritu toTajtsin Dios tlen kitetliokolia tlen kuali, ¿amo moneki okachi kitlajyouiltiskej? 30  Porque tikixmatij akin okijto: “Ne nimomakopas uan ne nikintlajyouiltis”. Noijki okijto: “Jehová kixkomakas ialtepe”. 31  Sapanoua temomojti tiuetsiskej imak toTajtsin Dios tlen yoltok. 32  Pero nochipa xikilnamikikan ijkuak onamechtlauilijkej. Namejuan onankixikojkej miak tlamantli tlen onamechtlajyouilti. 33  Ualeua teixpan onamechuijuikaltiayaj uan onamechtlajyouiltiayaj. Noijki ualeua onankatkaj inuan akinmej ijkon okinpanok. 34  Porque onankimiknomatkej akinmej otsaktokaj uan onanpakej maski onankipolojkej tlen onankipiayaj, porque nankimatij nankipiaj itlaj okachi kuali uan uejkauas. 35  Nochipa xiyetokan nanyolchikauakej ijkuak nantlajtouaj porque kuali namechtlaxtlauiskej. 36  Moneki nantlaxikoskej uan ijkon nankiseliskej tlen toTajtsin Dios yokijto namechmakas ijkuak yonankichijkej tlen ye kineki. 37  Porque “san niman” “ajsiki akin uits uan amo uejkauas”. 38  “Pero akin yolkuali yoltos porque tlaneltoka” uan “amo nechyolpaktis tla nechkauas porque momojtia”. 39  Tejuan amo tikchiuaj ken akinmej kikauaj toTajtsin Dios porque momojtiaj uan ixpoliuiskej. Tejuan tikchiuaj ken akinmej tlaneltokaj uan ijkon tiyoltoskej.

Notas

Noso “pacto”. Xikita diccionario.
Noso “intlanemilil”.
Noso “tlakemitl”, “tilmajtli”.
Noso “tlakemitl”, “tilmajtli”.
Noso “kiuelkaki”.
Noso “mokejketsa”.
Noso “pacto”. Xikita diccionario.