Apocalipsis 2:1-29

  • Okintlajkuililijkej tlanechikolmej Éfeso (1-7), Esmirna (8-11), Pérgamo (12-17), uan Tiatira (18-29)

2  “Xiktlajkuilili ángel tlen kajki itech tlanechikol Éfeso. Nin tlen kijtoua akin iyekma kinpia chikome sitlalimej uan nejnemi intlajko chikome candelabros de oro:  ‘Nikmati tlen tikchiua, chikauak titekipanoua uan titlaxikoua. Noijki nikmati amo tikinxikoua akinmej amo yolkualmej. Otikinyejyeko akinmej kijtouaj yejuan apóstoles pero amo melauak apóstoles uan otikitak san tlakajkayauaj.  Miak tlamantli yotikxiko, yotikxiko miak ouijkayotl ipatka notoka uan amo timosotlaua.  Pero amo nipaki porque ayakmo tiktlasojtla toTajtsin Dios ken achto otikchiuaya’”.  “‘Ikinon xikilnamiki tlen otikka, ximoyolkopa uan oksepa xikchiua tlen achto otikchiuaya. Tla amo timoyolkopas, niuits nimitskixtiliki mocandelabro kanin kajki.  Pero te tikchijtok itlaj kuali porque tikkokolia tlen kichiua ireligión Nicolás ijkon ken ne nikkokolia.  Akin kinpia inakasuan makikaki tlen espíritu kinmiluia tlanechikolmej: akin tlatlanis nikkauilis makikua itlakilo kouitl tlen kitemaka yolilistli. Non kouitl kajki itech ixochitlal toTajtsin Dios’”.  “Xiktlajkuilili ángel tlen kajki itech tlanechikol Esmirna. Nin tlen kijtoua ye, akin Achto uan Saiktlami tlen oixpolika pero axkan oksepa yoltok:  ‘Nikmati titlajyouia uan amitlaj tikpia maski noixpan tikpia miak tlamantli. Noijki nikmati mitsuijuikaltiaj akinmej kijtouaj yejuan judíos pero amo melauak judíos. Yejuan iaxkauan Satanás. 10  Amo mamitsmomojti tlen tikijyouis. Diablo ok kichiuas nansekimej manamechtsakuakan para ajsitok namechyejyekoskej. Nantlajyouiskej majtlaktli tonal. Xiktlakamati* toTajtsin Dios hasta ijkuak timikis uan ne nimitsmakas yolilistli ken se corona. 11  Akin kinpia inakasuan makikaki tlen espíritu kinmiluia tlanechikolmej: akin tlatlanis amo keman itlaj kitoktis ojpa mikilistli’”. 12  “Xiktlajkuilili ángel tlen kajki itech tlanechikol Pérgamo. Nin tlen kijtoua akin kipia se espada ueyak tlen ojka tlateki uan yektentitok: 13  ‘Nikmati tichanti kanin kajki itrono Satanás. Pero te amo keman techkaua. Nochipa otikteititi techneltoka hasta ijkuak okatka Antipas. Ye notestigo yolmelauak tlen namonakastlan okimiktijkej kanin chanti Satanás’”. 14  “‘Pero amo nipaki porque tikinkauilia mouan mayetokan akinmej kichiuaj tlen otlamachtiaya Balaam. Ye okimachti Balac makinyejyeko israelitas para makikuakan nakatl tlen okinmaniliayaj imágenes uan maauilnemikan.* 15  Noijki tikinkauilia mouan mayetokan akinmej kichiuaj tlen tlamachtia ireligión Nicolás. 16  Ikinon ximoyolkopa. Tla amo timoyolkopas, san niman niuits uan inuan nikmomakas ika espada ueyak tlen nikpia itech nokamak’”. 17  “‘Akin kinpia inakasuan makikaki tlen espíritu kinmiluia tlanechikolmej: akin tlatlanis nikmakas maná tlen tlatitok uan nikmakas se tetsintli istak. Ompa ijkuilitok se yankuik tokayotl tlen san kixmati akin kiselia’”. 18  “Xiktlajkuilili ángel tlen kajki itech tlanechikol Tiatira. Nin tlen kijtoua iKone toTajtsin Dios tlen ixtololouan katej ken tlitl uan ikxiuan petlanij ken cobre: 19  ‘Nikmati tlen tikchiua, titetlasojtla, titlaneltoka, titlapaleuia uan titlaxikoua. Noijki nikmati saiktlami otikchi okachi miak tlamantli uan amo ken achto’”. 20  “‘Pero amo nipaki porque tikxikoua Jezabel tlen kijtoua ye profeta. Ye kinkajkayaua notlakeualuan ika tlen tlamachtia para maauilnemikan* uan makikuakan nakatl tlen kinmaniliaj imágenes. 21  Onikkauili seki tonal mamoyolkopa pero ye auilnemi* uan amo kineki moyolkopas. 22  Nikchiuas chikauak mamokoko uan ayakmo uelis meuas. Noijki sapanoua nikintlajyouiltis akinmej iuan auilnemij. Pero amo nikintlajyouiltis tla moyolkopaskej uan ayakmo kichiuaskej tlen ye okinmititi makichiuakan. 23  Ikoneuan nikinmiktis ika kokolistli. Ijkon nochi tlanechikolmej kimatiskej ne nikita tlen kipia iyolipan tlakatl uan tlen mokuayejyekoua.* Ne sejse namechtlaxtlauis ijkon ken nankichiuaskej’”. 24  “‘Pero oksekimej tlen katej Tiatira uan amo kiseliaj tlen tlamachtia Jezabel uan amo kixmatij tlen tlamachtia Satanás, ne nikinmiluia: “Amo namechnauatia xikchiuakan okse tlamantli. 25  Pero amo xikkauakan tlen nankipiaj hasta ijkuak ne niuits. 26  Akin tlatlanis uan kichiuas tlen ne onikchi hasta ijkuak tlatlamis, nikkauilis makinnauati altepemej 27  ijkon ken noTajtsin onechkauili manitlanauati. Ye kinnauatis akinmej chantij tlaltikpak ika se bastón de tepostli uan yetoskej ken tepalkamej tlen tlajtlapanij. 28  Noijki nikmakas sitlali tlen kisa kualkan. 29  Akin kinpia inakasuan makikaki tlen espíritu kinmiluia tlanechikolmej”’”.

Notas

Noso “xikuelkaki”.
Xikita diccionario kanin kijtoua auilnemi.
Xikita diccionario kanin kijtoua auilnemi.
Ika griego moijtoua pornéia. Xikita diccionario kanin kijtoua auilnemi.
Noso “monejneuilia”.