Apocalipsis 19:1-21

  • Makiueyichiuakan Jehová porque tlaixkomaka (1-10)

    • Yimonamiktis Ichkatsin (7-9)

  • Akin oyaya ipan caballo istak (11-16)

  • ToTajtsin Dios tetlamakas (17, 18)

  • Yolkatl temomojti okimiktijkej (19-21)

19  Satepan ijkuak ijkon opanok, onikkak itech iluikak miakej chikauak otlajtojkej. Yejuan okijtouayaj: “¡Xikueyichiuakan Jah!* ToTajtsin Dios temakixtia, ueyititok uan iaxka chikaualistli.  Porque ye kuali uan melauak tlaixkomaka. Ye yokixkomakak siuatl tlen san monemaka uan omomakopki inpatka itlakeualuan tlen siuatl okinmikti. Non siuatl yokijtlako tlaltikpak porque auilnemi”.*  San niman oksepa okijtojkej: “¡Xikueyichiuakan Jah!* Ipokyo siuatl amo keman tlamis”.  Veinticuatro tlayekankej uan naui querubines* omotlankuaketskej uan okiueyichijkej toTajtsin Dios tlen kajki* ipan trono. Yejuan okijtojkej: “¡Amén! ¡Xikueyichiuakan Jah!”.*  Noijki ikaj otlajto kanin kajki trono uan okijto: “Xikueyichiuakan toTajtsin Dios nochtin namejuan nantlakeualmej, akinmej nankimauiliaj, akinmej nanueyititokej uan akinmej amo nanueyititokej”.  Noijki onikkak miakej otlajtouayaj, omokakiaya ken ijkuak ijkoyoka miak atl uan ken ijkuak chikauak tlatijtikuini. Yejuan okijtouayaj: “¡Xikueyichiuakan Jah!* ¡Porque yopejki tlanauatia toTajtsin Dios Jehová tlen kipia nochi chikaualistli!  Sapanoua matipakikan uan matikueyichiuakan porque yimonamiktis Ichkatsin uan isiua yimochixtok.  Isiua okikauilijkej mamotlakenti ika kuali tlakemitl de lino tlen petlani uan chipauak. Porque kuali tlakemitl de lino kijtosneki tlen kuali kichiuaj akinmej yolchipauakej”.  Ángel onechilui manikijkuilo nin: “Pakij akinmej okinmiluijkej matlakuatij ijkuak monamiktis Ichkatsin”. Noijki onechilui: “Nin melauak itlajtol toTajtsin Dios”. 10  Ijkuakon ikxitlan onimotlankuaketski para nikueyichiuas pero ye onechilui: “¡Amo! ¡Amo ijkon xikchiua! Ne san nitlakeuali ijkon ken te uan mokniuan tlen nankitematiltiaj akin Jesús. ¡Xikueyichiua toTajtsin Dios! Porque profecías tlapaleuiaj mamoijto akin melauak Jesús”. 11  Onikitak iluikak tlapotok uan omonexti se caballo istak. Akin oyaya ipan caballo itoka Yolmelauak uan Melauak. Ye kuali tlaixkomaka uan kimomaka ken moneki. 12  Ixtololouan okatkaj ken tlitl uan ipan itsonteko kinpia miakej coronas. Itech ijkuilitok se tokayotl tlen san ye kixmati uan amikaj okse kixmati. 13  Tlakentok ika se tsotsoli* tlen kipia estli uan ye kitokayotiaj iTlajtol toTajtsin Dios. 14  Miakej ángeles okitokayaj inpan incaballos istakej uan otlakentokaj ika kuali tlakemitl de lino, istak uan chipauak. 15  Ikamak kisa se espada ueyak tlen yektentitok para kinteuis akinmej chantij itech altepemej uan kinnauatis ika se bastón de tepostli. Noijki tlajtlaksa* ipan uvas kanin kipatskaj tlen kineskayotia ikualanilis toTajtsin Dios akin kipia nochi chikaualistli. 16  Itech itsotsol kanin kajki imets ijkuilitok se tokayotl: ye inTeko akinmej tlanauatiaj uan inTekiua tekiuajkej. 17  Noijki onikitak okse ángel moketok ipan tonaltsin. Ye chikauak okinmilui nochtin totomej tlen uejkapan patlantinemij: “¡Nikan xiualakan! Ximololokan porque toTajtsin Dios tetlamakas. 18  Xikkuakan innakayo tekiuajkej, akinmej kinyekanaj soldados uan tlakamej chijchikauakej. Xikkuakan innakayo caballos uan akinmej inpan yauij. Noijki xikkuakan innakayo nochtin akinmej tlakeualmej, akinmej amo tlakeualmej, akinmej ueyititokej uan akinmej amo ueyititokej”. 19  Noijki onikitak yolkatl temomojti, onikinmitak tekiuajkej tlen katej tlaltikpak uan insoldados. Nochtin omonechikojkej para kiteuiskej akin yaui ipan caballo uan noijki iángeles. 20  Yolkatl temomojti okikitskijkej. Noijki okikitskijkej profeta tekajkaya tlen ixpan okinchi milagros. Ika nonmej milagros okinkajkaya akinmej okiselijkej imarca yolkatl temomojti uan akinmej okiueyichijkej iimagen. Ijkuak yejuan ome ok oyoltokaj, okintlamotlakej kanin mantok tlitl ika azufre. 21  Pero oksekimej okinmiktijkej ika espada ueyak tlen okisaya ikamak akin oyaya ipan caballo. Nochtin totomej okikuajkej innakayo uan oixuikej.

Notas

Noso “¡Aleluya!”. Jah moijkuiloua ijkuak san tlajko moijtoua itoka Jehová.
Ika griego moijtoua pornéia. Xikita diccionario kanin kijtoua auilnemi.
Noso “¡Aleluya!”. Jah moijkuiloua ijkuak san tlajko moijtoua itoka Jehová.
Querubines kijtosneki ángeles tlen okachi tlanauatiaj.
Noso “euatok”, “yetok”.
Noso “¡Aleluya!”. Jah moijkuiloua ijkuak san tlajko moijtoua itoka Jehová.
Noso “¡Aleluya!”. Jah moijkuiloua ijkuak san tlajko moijtoua itoka Jehová.
Noso “tlakemitl”, “tilmajtli”.
Noso “mokejketsa”.