Apocalipsis 17:1-18

  • Kixkomakaskej “Ueyi Babilonia” (1-18)

    • Siuatl tlen auilnemi okatka ipan yolkatl temomojti uan chichiltik (1-3)

    • Yolkatl “okatka pero ayakmo kajki pero yiualkisas kanin tlauejkatlan” (8)

    • Majtlaktli kuakonmej kiteuiskej Ichkatsin (12-14)

    • Majtlaktli kuakonmej kikokoliskej siuatl tlen auilnemi (16, 17)

17  Se ángel tlen opouiaya inuan chikome ángeles tlen okinpiayaj chikome tazones, ouala uan onechilui: “Xiuiki, nimitsititis ken kixkomakaskej siuatl tlen san monemaka uan motlalia ipan miak atl.  Tekiuajkej tlen katej tlaltikpak oauilnenkej* iuan non siuatl. Akinmej chantij tlaltikpak ouintikej ika vino tlen kichiua makinekikan auilnemiskej”.*  Ika espíritu santo ye onechuikak kanin tlauaki. Ijkuakon onikitak se siuatl okatka* ipan se yolkatl temomojti. Non yolkatl okatka chichiltik tlen opetlantoka uan okinpiaya miakej tokayomej tlen kiuijuikaltiaj toTajtsin Dios. Noijki okinpiaya chikome itsontekonuan uan majtlaktli ikuakonuan.  Itlaken siuatl okatka morado uan chichiltik tlen opetlaniaya. Okipiaya miak oro, temej* kuajkualtsitsintin uan perlas. Okikitskijtoka se copa de oro tlen otentoka ika miak tlamantli tetlajyalti uan nochi tlen sokio kichiua ijkuak auilnemi.*  Ixkuak oijkuilitoka se tokayotl tlen amikaj okimatiaya: “Ueyi Babilonia inmama akinmej monemakaj uan nochi tlen tetlajyalti onka ipan tlaltikpak”.  Onikitak siuatl ouintik ika inmieso yolchipauakej uan ika inmieso itestigos Jesús. Sapanoua onimotlajtlachialti ijkuak onikitak.  Ikinon ángel onechilui: “¿Tleka timotlajtlachialtia? Ne nimitsiluis tlen kijtosneki non siuatl. Noijki nimitsiluis tlen kijtosneki yolkatl temomojti tlen ipan yaui uan kinpia chikome itsontekonuan uan majtlaktli ikuakonuan.  Yolkatl temomojti tlen otikitak okatka pero ayakmo kajki, pero yiualkisas kanin tlauejkatlan uan kipojpoloskej. Akinmej chantij tlaltikpak motlajtlachialtiskej ijkuak kitaskej yolkatl temomojti okatka pero ayakmo kajki uan oksepa monextis. Desde ijkuak ayamo ikaj okatka, yejuan intoka amo ijkuilitok itech rollo tlen kijtoua akinmej yoltoskej”.  “Moneki yetos ixtlamatki akin kineki kajsikamatis nin tlamantli: chikome itsontekonuan kijtosneki chikome tepemej tlen ipan motlalia siuatl. 10  Katej chikome tekiuajkej: makuili youetskej, se kajki uan okse ayamo kajki pero ijkuak yetos amo uejkauas. 11  Yolkatl temomojti tlen okatka pero ayakmo kajki, ye noijki chikueyi tekiua tlen kisa itech chikome tekiuajkej uan kipojpoloskej”. 12  “Majtlaktli kuakonmej tlen otikinmitak kijtosneki majtlaktli tekiuajkej tlen ayamo tlanauatiaj. Pero se hora tlanauatiskej ken tekiuajkej iuan yolkatl temomojti. 13  Yejuan san se tlamantli mokuayejyekouaj* ikinon kimakaj inchikaualis yolkatl temomojti uan kikauiliaj matlanauati. 14  Kiteuiskej Ichkatsin pero Ichkatsin kintlanilis porque ye inTeko akinmej tlanauatiaj uan inTekiua tekiuajkej. Noijki tlatlaniskej akinmej iuan katej tlen okinnotskej, okinpejpenkej uan amo keman kikauaj”. 15  Ye onechilui: “Nochi atl tlen otikitak kanin kajki* siuatl tlen monemaka kijtosneki altepemej, miakej personas, akinmej nouian chantij uan akinmej tlatlamantli intlajtol. 16  Majtlaktli kuakonmej tlen otikinmitak uan yolkatl temomojti kikokoliskej siuatl tlen monemaka, kikixtiliskej nochi tlen kipia uan kikauaskej xipetstik. Kikuaskej inakayo uan sepa kitlatiskej. 17  Porque toTajtsin Dios okitlali inyolipan makichiuakan tlen ye mokuayejyekoua.* Yejuan san se tlamantli mokuayejyekouaj.* Non kijtosneki kikauiliaj yolkatl temomojti matlanauati hasta mamochiua tlen okijto toTajtsin Dios. 18  Siuatl tlen otikitak kijtosneki ueyi altepetl tlen kinnauatia tekiuajkej tlen katej tlaltikpak”.

Notas

Ika griego moijtoua pornéia. Xikita diccionario kanin kijtoua auilnemi.
Ika griego moijtoua pornéia. Xikita diccionario kanin kijtoua auilnemi.
Noso “oeuatoka”, “oyetoka”.
Noso “tepejximej”.
Ika griego moijtoua pornéia. Xikita diccionario kanin kijtoua auilnemi.
Noso “monejneuiliaj”.
Noso “euatok”, “yetok”.
Noso “monejneuilia”.
Noso “monejneuiliaj”.