2 Corintios 8:1-24

  • Tokniuan okololojkej tlen okipiayaj uan okinmakakej tokniuan tlen ochantiayaj Judea (1-15)

  • Tito okititlankej Corinto (16-24)

8  Nokniuan, axkan tiknekij xikmatikan toTajtsin Dios yokintliokoli tlen kuali akinmej monechikouaj* Macedonia.  Ijkuak okinyejyekojkej uan otlajyouijkej miak, yejuan opakej okitemakakej tlen okipiayaj maski amo okipiayaj miak tlamantli. Non okiteititi okinpaktiaya kitemakaskej tlen okipiayaj.  Ne namechiluia yejuan okitemakakej nochi tlen ouelik okitemakakej uan hasta okachi miak okitemakakej.  Yejuan inneuian otechtlatlaujtiayaj matikinkauilikan kitemakaskej ika tlasojtlalistli tlen okipiayaj para kinpaleuiskiaj tokniuan yolchipauakej.  Yejuan amo san okichijkej tlen otikchiayaj. Noijki omochijchikajkej ika nochi inyolo okitekichiuilijkej toTeko uan otechpaleuijkej ijkon ken kineki toTajtsin Dios.  Ikinon otikiluijkej Tito matlami makololo tlen nankitemakaj ika nochi namoyolo, porque ye opejki kichiua non tekitl.  Namejuan nochi kuali nankichiuaj. Nankipiaj chikauak namotlaneltokilis, nankimatij nantlajtoskej, namixtlamatkej, nanmochijchikauaj ijkuak itlaj nankichiuaj uan nantetlasojtlaj ijkon ken tejuan timechtlasojtlaj. Ijkon noijki nochipa xiktemakakan tlen nankipiaj ika nochi namoyolo.  Amo ijkon namechiluia para namechnauatis. Ijkon namechiluia para xikitakan oksekimej mochijchikauaj uan nikneki nikitas kox melauak nantetlasojtlaj.  Porque namejuan kuali nankimatij toTeko Jesucristo kitetliokolia tlen kuali. Ye okipiaya miak tlamantli pero nochi namopatka okika. Ye okika tlen okipiaya para namejuan xikpiakan miak tlamantli. 10  Ne namechiluis ken nikita nin tlamantli. Nin tekitl namechpaleuis porque yisexiuitl onankipeualtijkej. Noijki onankiteititijkej onankinekiayaj nankichiuaskej ika nochi namoyolo. 11  Ikinon xiktlamikan tekitl tlen onankipeualtijkej. Xikchiuakan ijkon ken ijkuak opejki nankichiuaj. 12  ToTajtsin Dios kiselia se tetliokolil tla tiktemakaj ika nochi toyolo, porque ye kineki matiktemakakan tlen tiuelij uan amo tlen amo tiuelij. 13  Amo nikneki namejuan xikitakan oui uan sekimej amo. 14  Axkan namejuan nankipiaj miak tlamantli uan non yejuan kinpaleuis. Noijki miak tlamantli tlen yejuan kipiaj namejuan namechpaleuis. Ijkon san se tlamantli nankipiaskej. 15  Ijkon ken ijkuilitok: “Akin okololo miak tlamantli amo okipiaya miak tlamantli uan akin amo miak okololo amitlaj okipolo”. 16  Tiktlasojkamatiliaj toTajtsin Dios porque Tito kitekipachoua tlen namechpanoua ijkon ken tejuan techtekipachoua. 17  Ye amo san okichi tlen otikiluijkej. Noijki sapanoua paki uan yas namechtlajpaloti porque ye kineki yas. 18  Noijki iuan Tito tiktitlanij tokni tlen nochi tlanechikolmej kitlakaitaj porque kitematiltia kuali tlajtoli. 19  Akinmej monechikouaj* noijki okipejpenkej nin tokni touan mauia ijkuak tikxejxelotiuij tlen nankitemakaj ika nochi namoyolo. Nin tekitl kichiuas makiueyitlalikan toTeko uan noijki tikteititiskej tiknekij titlapaleuiskej. 20  Ijkon amikaj techteneuas* ken tikxejxelouaj tlen onankitemakakej ika nochi namoyolo. 21  Porque ‘timochijchikauaj amo titlakajkayauaskej ixpan Jehová uan noijki inmixpan oksekimej’. 22  Noijki inuan timechtitlaniliaj okse tokni. Miak uelta yotikitakej kiteititia kimati kichiuas miak tlamantli. Pero axkan okachi mochijchikauas porque kimati nankichiuaskej tlen otimechiluijkej. 23  Tla ikaj namechtlajtlanis akin Tito, uelis nankiluiskej ye nouan tekipanoua para timechpaleuiskej. Noijki tla ikaj namechtlajtlanis akinmej ninmej tokniuan, uelis nankinmiluiskej yejuan apóstoles tlen pouij itech tlanechikolmej uan kiueyitlaliaj Cristo. 24  Ikinon xikteititikan nankintlasojtlaj. Noijki xikinmititikan akinmej monechikouaj* tleka nankichiuaj matipakikan.

Notas

Ika griego moijtoua “tlanechikolmej”.
Ika griego moijtoua “tlanechikolmej”.
Noso “techijtos”, “techpojpouas”.
Ika griego moijtoua “tlanechikolmej”.