2 Corintios 7:1-16

  • Matikkauakan nochi tlen kisokiotia tocuerpo (1)

  • Tokniuan tlen ochantiayaj Corinto okichijkej mapaki Pablo (2-4)

  • Tito okijto kuali tlen okichiuayaj tokniuan (5-7)

  • “Akinmej moyolkokouaj ken kineki toTajtsin Dios, kinpaleuia mamoyolkopakan” (8-16)

7  Nokniuan, toTajtsin Dios yotechilui nin tlamantli ikinon matikkauakan nochi tlen kisokiotia tocuerpo uan tlen kisokiotia totlayejyekol.* Matiktlakaitakan toTajtsin Dios uan okachi matimoyolchipauakan.  Namejuan techtlasojtlakan. Tejuan amikaj itlaj otiktoktijkej, amikaj otikyolkokojkej nion amikaj otikkajkayajkej para timopaleuiskej.  Amo ijkon namechiluia para namechtlajtlakoltis, porque achto yonamechiluijka timechtlasojtlaj maski timikiskej noso tiyoltoskej.  Ne namechyektlapouia. Namejuan nankichiuaj manipaki. Nimoyolseuia uan sapanoua nipaki maski titlajyouiaj.  Amo kuali otikatkaj ijkuak otiajsitoj Macedonia porque ok otitlajyouijtokaj. Sekimej otechtlajyouiltiayaj uan noijki otechtekipachouayaj tokniuan.  Pero toTajtsin Dios kinyolchikaua akinmej moyolkokouaj ikinon ye otechyolchika ijkuak oajsiko Tito.  Amo otimoyolchikajkej san porque ye oajsiko. Noijki otimoyolchikajkej porque opakiaya namejuan onankiyolchikajkej. Ye otechilui onankinekiayaj ne nantechitaskej. Noijki otechilui onanmoyolkokouayaj iuan onamechtekipachouaya tlen nechpanoua. Non okichi okachi manipaki.  Amo nimoyolkokoua tla onamechyolkoko nocarta, maski achto onimoyolkoko porque onikitak onamechyolkoko nocarta kanaj keski tonal.  Axkan amo nipaki porque onamechyolkoko. Nipaki porque onanmoyolkopkej maski onanmoyolkokojkej. Namejuan onanmoyolkokojkej ken kineki toTajtsin Dios ikinon amo onamechtlajyouilti tlen otimechiluijkej. 10  Porque akinmej moyolkokouaj ken kineki toTajtsin Dios, kinpaleuia mamoyolkopakan uan ijkon momakixtiskej. Pero ixpoliuiskej akinmej moyolkokouaj ken oksekimej kichiuaj. 11  ¡Xikitakan ken yonamechpaleui onanmoyolkokojkej ken kineki toTajtsin Dios! Yonankiteititijkej amitlaj namotlajtlakol, onamechkualani tlen amo kuali onankichijkej, opejki nankitlakaitaj toTajtsin Dios, onanmoyolkopkej, opejki nankitekichiuiliaj toTajtsin Dios ika nochi namoyolo uan ayakmo onankichijkej tlen amo kuali. Kuali onankiyektlalijkej tlen onankichijtokaj. 12  Ijkuak onamechtlajkuilili, amo san oniktlajkuilili akin otlajtlakolchi nion amo san oniktlajkuilili akin otlajyoui. Onamechtlajkuilili para nikitas kox nankiteititiskej ixpan toTajtsin Dios melauak nankinekij nantechkakiskej. 13  Non tlen otechyolchika. Pero amo san otimoyolchikajkej, noijki otipakej ijkuak otikitakej Tito opakiaya porque nochtin namejuan onankiyolchikajkej. 14  Amo onantechpinauijkej ixpan Tito ijkuak onikijto kuali tlen nankichiuaj. Tejuan otimechiluijkej tlen melauak uan noijki yomoteititi melauak tlen otikiluijkej Tito. 15  Ye okachi namechtlasojtla porque kilnamiki namejuan nantetlakamatij* uan onankitlakaitakej ijkuak onankiselijkej. 16  Nipaki porque nechyolchikaua nochi tlen nankichiuaj.

Notas

Noso “totlanemilil”.
Noso “nantlauelkakij”.