2 Corintios 6:1-18

  • Amo xikselikan itetliokolil toTajtsin Dios tlen kuali uan satepan xikilkauakan (1, 2)

  • Moijtoua ken otetlapoui Pablo (3-13)

  • “Amo ximosetilikan inuan akinmej amo tlaneltokaj” (14-18)

6  Tejuan tikpaleuiaj toTajtsin Dios uan timechtlatlaujtiaj amo xikselikan itetliokolil tlen kuali* uan satepan xikilkauakan.  Porque toTajtsin Dios kijtoua: “Ne onimitskaki ijkuak omonekiaya nimitsteochiuas uan onimitspaleui ijkuak omonekiaya nimitspaleuis”. ¡Axkan yoajsik tonal toTajtsin Dios techteochiuas! ¡Axkan yoajsik tonal toTajtsin Dios techpaleuis!  Amitlaj tikchiuaj tlen uelis kinmikxitlanuis oksekimej. Ijkon amikaj kijtos amo kuali tiktekichiuiliaj toTajtsin Dios.  Nochi tlen tikchiuaj kiteititia tiktekichiuiliaj toTajtsin Dios. Titlaxikouaj ijkuak techyejyekouaj, ijkuak titlajyouiaj, ijkuak itlaj techpoloua uan ijkuak tikixnamikij ouijkayotl.  Titlaxikouaj ijkuak techuitekij, ijkuak techtsakuaj, ijkuak techixnamikij, ijkuak chikauak titekipanouaj, ijkuak amo tikochij uan ijkuak amo titlakuaj.  Tejuan kuali tinemij, tikteititiaj tiixtlamatkej, tikmatij timochiaskej, titetlasojtlaj, tikkauiliaj espíritu santo matechyekana uan amo san ik tikchiuaj titetlasojtlaj.  Amo titlakajkayauaj, tikneltokaj techpaleuia ichikaualis toTajtsin Dios, yetoskia ken ika toyekma uan ika toopochma tikinkitskijtokej teposmej para tikchiuaskej tlen kuali.  Ualeua techueyitlaliaj uan ualeua amo techtlakaitaj. Ualeua kuali techitaj uan ualeua techtlauelitaj. Sekimej kijtouaj titlakajkayauaj maski tikijtouaj tlen melauak.  Sekimej kijtouaj amo techixmatij maski kuali techixmatij. Sekimej techitaj ken tiixpolitokej maski ok tiyoltokej. Sekimej techitaj ken yotechtlajyouiltijkej maski ayamo tiixpoliuij. 10  Sekimej techitaj timoyolkokouaj maski tejuan nochipa tipakij. Sekimej techitaj amitlaj tikpiaj maski tejuan tikinmakaj miak tlamantli oksekimej. Sekimej techitaj sepa amitlaj tikpiaj maski nochi tikpiaj. 11  Tokniuan tlen nanchantij Corinto, tejuan timechyektlapouiaj uan timechtlasojtlaj ika nochi toyolo. 12  Tejuan timechtlasojtlaj miak pero namejuan ayakmo okachi nantechtlasojtlaj. 13  Ne namechtlapouia ken nanyetoskiaj nannokoneuan. Ne namechiluia techtlasojtlakan ijkon ken tejuan timechtlasojtlaj. Techtlasojtlakan ika nochi namoyolo. 14  Amo ximosetilikan* inuan akinmej amo tlaneltokaj. ¿Tlen kipia kitas tlen kuali iuan tlen amo kuali? ¿Tlen kipia kitas tlauili iuan tlayoualotl? 15  ¿Kox mouikaj Cristo iuan Satanás? ¿Kox mouikaj akin tlaneltoka iuan akin amo tlaneltoka? 16  Imágenes amo uelis yetoskej itech itemplo toTajtsin Dios. Porque tejuan tikatej ken itemplo toTajtsin Dios uan ye yoltok. Ijkon ken ye okijto: “Ne inuan niyetos uan inuan ninemis. Ne niyetos inDios uan yejuan pouiskej itech noaltepe”. 17  “Jehová kijtoua: ‘Ayakmo inuan xiyetokan uan ximoxelokan. Ayakmo xikitskikan tlen amo chipauak’ ‘uan ne namechselis’”. 18  “Jehová akin kipia nochi chikaualistli kijtoua: ‘Ne niyetos namotajtsin uan namejuan nanyetoskej notelpochuan uan nochpochuan’”.

Notas

Xikita diccionario kanin kijtoua techtliokoliaj tlen kuali.
Noso “amo ximosepanokan”.