2 Corintios 2:1-17

  • Pablo okinekiaya mapakikan akinmej ochantiayaj Corinto (1-4)

  • Xiktlapojpoluikan akin otlajtlakolchi uan noijki xikselikan (5-11)

  • Pablo oyajki Troas uan satepan oyajki Macedonia (12, 13)

  • Ijkuak titetlapouiaj, toTajtsin Dios techyekana ken soldados tlen otlatlanitoj itech guerra (14-17)

    • Tejuan amo tiknemakaj iTlajtol toTajtsin Dios (17)

2  Yonikijto amo oksepa nias namechtlajpaloti para namechyolkokos.  ¿Akin nechpaleuis manipaki tla ne namechyolkokos? San yejuan akinmej onikinyolkoko.  Ne onamechtlajkuilili para ijkuak nias amo nantechyolkokoskej. Nikmati tlen kichiua manipaki noijki kichiua xipakikan.  Onichokak ijkuak onamechtlajkuilili porque onitlajyouiaya uan onimotekipachouaya. Ijkon onamechtlajkuilili para xikmatikan sapanoua namechtlasojtla uan amo para ximoyolkokokan.  Tla ikaj oteyolkoko amo ne onechyolkoko, namejuan onamechyolkoko pero sekimej okachi okinyolkoko. Pero amo nikneki okachi nikijtos nin tlamantli.  Xikselikan tlakatl tlen otlajtlakolchi porque yonankiyektlalijkej.  Axkan moneki nankitlapojpoluiskej ika nochi namoyolo. Noijki xikyolseuikan para amo sapanoua mamoyolkoko uan amo mamosotlaua.  Ikinon namechnauatia xikpaleuikan makita nankitlasojtlaj.  Noijki onamechtlajkuilili para nikitas kox nochipa nantetlakamatij.* 10  Tla ikaj nankitlapojpoluiskej ne noijki niktlapojpoluis. Ijkuak ne nitetlapojpoluia, nitetlapojpoluia para namechpaleuis ixpan Cristo. 11  Ijkon amo techkajkayauas Satanás porque tikmatij tlen kineki kichiuas. 12  Ijkuak oniajsito Troas para niktematiltis kuali tlajtoli tlen kijtoua akin Cristo, onechkauilijkej okachi maniktekichiuili toTeko. 13  Pero amo kuali onimomachili porque amo onikajsito tokni Tito. Ikinon onitlanauati yiniaskia uan satepan onia Macedonia. 14  ¡Tiktlasojkamatiliaj toTajtsin Dios! Ye nochipa techyekana iuan Cristo ken soldados tlen otlatlanitoj itech guerra. Ixtlamatilis toTajtsin Dios yetoskia ken itlaj ajuiak. Ye kichiua san kanin matiktematiltikan ixtlamatilis para oksekimej makijnekuikan. 15  ToTajtsin Dios techita ken itlaj ajuiak akinmej tiktematiltiaj akin Cristo. Nin kijnekuij akinmej momakixtiskej uan noijki akinmej ixpoliuiskej. 16  Akinmej ixpoliuiskej kijnekuij ken itlaj temikti uan kinmixpolos, pero akinmej momakixtiskej kijnekuij ken itlaj ajuiak uan kinpaleuis mayoltokan. ¿Uan akin uelis kichiuas nin tlamantli? 17  Tejuan uelis tikchiuaskej porque amo tiknemakaj iTlajtol toTajtsin Dios ken miakej kichiuaj. Amo titlakajkayauaj ixpan toTajtsin Dios ijkuak titetlapouiaj. Tejuan tiidiscípulos Cristo uan toTajtsin Dios otechnauati matikchiuakan nin tekitl.

Notas

Noso “nantlauelkakij”.