Xikita nochi

Tlen kiualika

 TLAMACHTIL 11

Yejuan otlajkuilojkej itech Jesús

Yejuan otlajkuilojkej itech Jesús

¿Tikinmita tlakamej itech tlaixkopinal?... Omotokayotiayaj Mateo, Marcos, Lucas, Juan, Pedro, Santiago, Judas uan Pablo. Nochtin ninmej tlakamej okatkaj ijkuak Jesús okatka, uan otlajkuilojkej itech Jesús. Ma timomachtikan okachi itech yejuan.

¿Tlen tikmati itech ninmej tlakamej?

Eyi tlakamej akinmej otlajkuilojkej itech Jesús okatkaj tlatitlanilmej. ¿Tikmati tlen intoka?... Mateo, Juan uan Pedro. Tlatitlanilmej Mateo uan Juan kuali okixmatiayaj  Jesús, ik non, sejse yejuan okijkuilojkej se amochtli itech iyolilis Jesús. Tlatitlanil Juan noijki okijkuilo Apocalipsis uan eyi amatlajkuilolmej tlen intoka 1 Juan, 2 Juan uan 3 Juan. Tlatitlanil Pedro okijkuilo ome amatlajkuilolmej tlen katej itech Biblia. Intoka 1 Pedro uan 2 Pedro. Itech 2 Pedro, Pedro okijkuilo ijkuak Jehová oualtlajto itech iluikak uan okijto itech Jesús: ‘Nin nokone. Ne sapanoa niktlasojtla, itech niyolpaki’.

Oksekimej tlakamej akinmej katej itech tlaixkopinal, itech inamochuan noijki techmachtiaj itech Jesús. Se omotokayotiaya Marcos. Uelis ye okatka ijkuak Jesús okikitskijkej uan okitak nochi tlen okipanok. Okse omotokayotiaya Lucas. Ye otlapajtiaya uan uelis opejki tlaneltoka itech Jesús satepan ijkuak okimiktijkej.

Ok ome tlakamej tlen moitaj itech tlaixkopinal uan tlen noijki okijkuilojkej Biblia okatkaj ikniuan Jesús. ¿Tikmati ken intoka?... Omotokayotiayaj Santiago uan Judas. Achto yejuan amo otlaneltokayaj itech Jesús. Noijki okijtoayaj Jesús yokuatlapolo. Maski ijkon, satepan otlaneltokakej itech Jesús uan opejkej kichiuaj ken Cristo.

Saiktlami tlakatl tlen moita itech tlaixkopinal tlen okijkuilo Biblia itoka Pablo. Achto kichiuaskia ken Cristo omotokayotiaya Saulo. Ye okinkokoliaya akinmej kichiuaj ken Cristo uan okatka sapanoa amo yolkuali. ¿Tikmati tleka Pablo opejki kichiua ken Cristo?... Se tonal Pablo oyaya itech ojtli uan san niman okikak ikaj okinotsaya itech iluikak. ¡Okatka Jesús! Ye okitlajtlani Pablo: ‘¿Tleka tikintojtoka akinmej tlaneltoka notech?’. Satepan Pablo okipatlak inemilis uan opejki kichiua ken Cristo. Pablo okijkuilo 14 amochmej tlen katej itech Biblia, peua itech Romanos uan tlami itech Hebreos.

¿Tiktlajtoltiaj Biblia mojmostla?... Tla tiktlajtoltiaj Biblia uelis timomachtiskej okachi itech Jesús. ¿Mitspaktiskia timomachtis okachi itech Jesús?...