Timoteo okatka se telpochtli tlen okipaktiaya kinpaleuis tlaltikpaktlakamej. Ye onentinenki itech miakej altepemej pampa kinpaleuis. Pampa ijkon okichiuaya, sapanoa oyolpakiaya. ¿Tikneki tikakis nin?...

Inantsin uan isitsin Timoteo okimachtijkej itech Jehová

Timoteo omoskalti itech se altepetl tlen omotokayotiaya Listra. Ijkuak okatka se konetl, isitsin Loida uan inantsin Eunice, opejkej kimachtiaj itech Jehová. Ijkuak Timoteo omoskalti okinek kinpaleuis oksekimej uan kinmachtis itech Jehová.

Ijkuak Timoteo okatka se telpochtli, Pablo okilui iuan ma uia pampa ma tetlapouikan itech okseki altepemej. Timoteo  okinankili: ‘¡Kema!’ Nikan nika pampa nias uan nikinpaleuis oksekimej.

Timoteo oyajki iuan Pablo itech se altepetl tlen itoka Tesalónica tlen okatka itech Macedonia. Pampa ompa ajsiskiaj, omonekiaya uejka nejnemiskej uan noijki yaskiaj itech barco. Ijkuak oajsitoj, okinpaleuijkej miakej tlaltikpaktlakamej ma momachtikan itech Jehová. Maski ijkon, sekimej okualankej uan okinekiayaj kintlajyouiltiskej. Ik non, Pablo uan Timoteo oyajkej uan otetlapouijkej itech okseki altepemej.

Timoteo oyolpakik itech inemilis

Seki metstli satepan, Pablo okilui Timoteo mokuepaskej Tesalónica pampa kitaskej tlen okichiuayaj ikniuan. ¡Omonekiaya miak chikaualistli pampa mokuepaskej itech non altepetl! Maski ijkon, Timoteo oyajki pampa omotekipachoaya itech ikniuan. Timoteo ouala ik Pablo ika kuali tlajtolmej. ¡Ikniuan tlen okatkaj Tesalónica, okichijtokaj tlen kuali!

Miak xiuitl Timoteo otekitik iuan Pablo. Se tonal Pablo okijkuilo, Timoteo okatka se kuali tlakatl tlen okititlanki pampa kinpaleuis tlanechikolmej. Timoteo okitlasojtlaya Jehová uan tlaltikpaktlakamej.

¿Tikintlasojtla tlaltikpaktlakamej uan tikneki tikinpaleuis ma momachtikan itech Jehová?... ¡Tla tikchiua, uelis tiyolpakis ijkon ken Timoteo!