Xikita nochi

Tlen kiualika

 TLAMACHTIL 5

Samuel nochipa okichi tlen kuali

Samuel nochipa okichi tlen kuali

Ijkuak ok chokotsin okatka Samuel ochantito uan otekitito itech tabernáculo, kanin tlaltikpaktlakamej oyayaj pampa kiueyichiuaskej Jehová. ¿Tikmati ken oajsito itech tabernáculo? Achto ma timomachtikan itech Ana, inantsin Samuel.

Yokipiaya miak xiuitl Ana okinekiaya se konetl, maski ijkon, amo ueli okipiaya. Ik non, omotlatlaujti itech Jehová uan okitlajtlanili ma kipaleui. Ye okilui tla kipiaskia se konetl, kitemakaskia pampa ma chanti uan ma tekiti itech tabernáculo. Jehová okinankili uan ye okipixki se konetl. Ye okitokayoti Samuel. Uan axkan Ana okichi ken okijto, ijkuak Samuel okipiaya kanaj 3 noso 4 xiuitl, Ana okiuikak itech tabernáculo pampa ma kitekichiuili toTajtsin Dios.

Elí okatka ueyi teopixki itech tabernáculo. Ome ikoneuan noijki ompa otekitiaj. Xikilnamiki, tabernáculo okatka ikal toTajtsin Dios kanin tlaltikpaktlakamej okiueyichiuayaj, uan ompa yejuan okichiuayaj tlen kuali. Maski ijkon, ikoneuan Elí okichiuayaj miak tlamantli tlen amo kuali. Samuel okitak tlen okichiuayaj. ¿Samuel okichi tlen amo kuali ken ikoneuan Elí?... Amo, ye okichiuaya tlen kuali ijkon ken okimachtijkej itatajuan.

¿Tlen tikneltoka omonekiaya kichiuas Elí ika ome ikoneuan?... Omonekiaya kintlajyouiltiskia. Ayakmo kinkauiliskia ma tekitikan itech iteokal Jehová. Maski ijkon, Elí amo ijkon okichi, ik non, Jehová okualanki iuan Elí uan ome itelpokauan. Ik non, Jehová okintlajyouilti.

Samuel okilui Elí tlen Jehová okijto

Se yoak ijkuak Samuel okochtoka okikak ikaj okinotsaya: ‘¡Samuel!’. Ye omotlalo kanin okatka Elí, maski ijkon, Elí okilui: ‘Ne amo onimitsnotski’. Ijkon opanok ok ome uelta. Ipan eyi uelta, Elí okilui Samuel ijkuak oksepa kikakis kinotsaj, ma kijto: ‘Nimitstlatlaujtia, Jehová, xitlajto, ne nimitskaki’. Ijkon okichi Samuel. Ijkuakon Jehová okilui Samuel: ‘Xikilui Elí ne nikintlajyouiltis ikalchanejkauan pampa  okichijkej tlamantli tlen amo kuali’. ¿Timokuayejyekoa oui okatka pampa Samuel kiluis Elí nin tlanauatil?... Kema. Maski Samuel omomojti, ye okichi tlen Jehová okilui ma kichiua. Tlen okijto Jehová omochi. Ome ikoneuan Elí okinmiktijkej uan noijki Elí omikik.

Samuel se kuali neskayotl pampa tejuan. Ye okichi tlen kuali maski okinmitak oksekimej okichiuayaj tlen amo kuali. ¿Uan te? ¿Ok tikchiuas tlen kuali ken Samuel? Tla tikchiuas uelis tikinyolpaktis mokalchanejkauan uan Jehová.

XIKTLAJTOLTI ITECH MOBIBLIA

  • 1 Samuel 2:22-26; 3:1-21