Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Xikinmachti mokoneuan

 TLAMACHTIL 10

Jesús nochipa otetlakamatki

Jesús nochipa otetlakamatki

¿Tikita oui tikintlakamatis motatajuan?... Ualeua oui. ¿Tikmati tleka Jesús nochipa okitlakamatki Jehová uan itatajuan?... Ineskayo uelis mitspaleuis pampa tikintlakamatis motatajuan maski ualeua oui. Ma timomachtikan okachi itech ye.

Achto Jesús ualaskia itech Tlaltikpak, ye okatka itech iluikak iuan iTajtsin, Jehová. Maski ijkon, Jesús noijki okipiaya itatajuan nikan itech Tlaltikpak. Omotokayotiayaj José uan María. ¿Tikmati ken omochijkej itatajuan?...

Jehová okipanolti iyolilis Jesús, akin okatka iluikak, ijtik María uan ijkon oneski uan ochantik itech Tlaltikpak. ¡Nin se milagro! Jesús omoskalti ijtik María ijkon ken konemej moskaltiaj ijtik innantsin. Uan 9 metstli satepan oneski Jesús. Ijkon María uan inamik, José, omochijkej itatajuan Jesús nikan itech Tlaltikpak.

Ijkuak Jesús okipiaya 12 xiuitl, okichi itlaj tlen okiteititi sapanoa okitlasojtlaya iTajtsin, Jehová. Nin opanok ijkuak Jesús uan ikalchanejkauan oyajkej Jerusalén pampa iluichiuaskiaj itech Pascua. Ijkuak oualmokuepayaj ikalijtik, José uan María amo kanaj okajsiayaj Jesús. ¿Tikmati kanin okatka?...

¿Tleka Jesús okatka itech teokali?

José uan María san niman omokuepkej Jerusalén uan san kanin okitemojtinemiayaj Jesús. Yejuan sapanoa omotekipachojkej pampa amo okajsiayaj. Maski ijkon, eyi tonal satepan, ¡okajsikej itech teokali! ¿Tikmati tleka Jesús okatka itech teokali?... Pampa ompa uelis momachtiskia itech iTajtsin, Jehová. Ye okitlasojtlaya Jehová uan okinekiaya momachtis tlen kipaktia. Uan ijkuak omoskalti uan omochi se tlakatl, Jesús nochipa okitlakamatki Jehová. Jesús okitlakamatki maski okatka oui, maski otlajyoui. ¿Jesús noijki okintlakamatki José uan María?... Kema, Biblia techiluia ye okintlakamatki.

¿Tlen mitsmachtia ineskayo Jesús?... Moneki tikintlakamatis motatajuan, maski ualeua oui. ¿Tikintlakamatis?...

XIKTLAJTOLTI ITECH MOBIBLIA

  • Lucas 1:30-35; 2:45-52

  • Efesios 6:1

  • Hebreos 5:8